Read Northwest Gbaya GBOA-A 21 Bible Online

GBOA-A 21 - Northwest Gbaya bible

GBOA-A 21

¹«O heembea nɛ mɛ tɛ usi ha̧ o be Israɛl nɛ mɔɔ nɔ'ɔ:

²Ŋgimbi nɛ mɛ tɛ hi̧fi bara be hébreu, a̧ tɛ de tom ha̧ mɛ tɛ pɛ mɔɔrɔ-ɗoŋ-kpɔk, ɓɛɛ sɛn tɛ mɔɔrɔ-ɗoŋ-yiitoo pɛ, ɓɛɛ a̧ kpaa zu, a̧ beka yoɓi ŋma mɔ na.

³Kà a̧ nɛ́ tɛɛ so ɛnɛ-a, a̧ tɛ yak kana ɛnɛ-a; kà a̧ nɛ́ boo so nɛ̀ kóò, a̧ tɛ gbo kana in kóò kɔ̧-a̧.

⁴Kà bo nɛ dáa-bara kɔ̧-a̧ a̧ baa kóò ha̧ a̧, kà kóò‘i nɛ kòò o be-wiwii, kóó o be-okoo ha̧ a̧, wese gboa-a, kóò‘i in o bem nɔ‘i tɛ ɓɔn in dáà-bara, ɓɛɛ a̧ yaka ɛnɛ-a.

⁵Ɓɛɛ kà bara'i nɛ tɔ̧ɔ̧‘e, wi kɔ̧ɔ̧ wan kɔ‘i, kóò kɔ‘i in o bem kɔ‘i, wi kɔ̧ mɛ gbo na wo,

⁶wan kɔ̧-a̧ tɛ mgbɔ a̧ nɛnɛ mɛ nɛ̀ɛ́ usi ha̧ Sɔ̧; a̧ tɛ de ha̧ a̧ mɛ ɗɔli si ká̧ nu tua, kóó si ká̧ te-nú-tua, a̧ tɛ ɗɔi zer-aa nɛ gu-zu, ɓɛɛ bara'i tɛ de tom ha̧ a̧ ɓɔnsɛnɛ.

⁷«Kà ŋma bíí a̧ ɗɔra boko-bem kɔ‘i mɛ duk bara, boko-bem’ɛi beka kpa zu hee o wiwii-bara ga na.

⁸Kà a̧ nɛ dee tɛ wan kɔ̧-a̧ ha̧ wan kɔ̧-a̧ mɛ ba a̧ nɛ kóò na, wan kɔ̧-a̧ tɛ ɗɔr a̧ siti, ɓɛɛ bo nɛ ha̧ gɔni-duk na, wen mɔ‘i tɛ duk nɛ pi̧i̧ foe tɛ a̧.

⁹Kà a̧ ha̧ a̧ nɛ kóò ha̧ bem kɔ̧-a̧, a̧ tɛ de kana mɔ in a̧ nɛ de-a hee mɔ nɛ‘i de in boko-bem kɔ‘i ga.

¹⁰Kà a̧ nɛ baa mbe kóò, kóó nɛ nyɔŋmɔ, kóó o laa, kóó yuwar deemɔ kɔ-wa in ŋmaa nɛti beka yak ŋmaa na.

¹¹Sɛn tɛ mɔɔ nɔ‘i taar'i, kà a̧ kɔ̧ naŋ-a tɛ ŋma kpɔk, kóò kɔ̧-a̧ tɛ yak sɔɔ gee, ɓɛɛ wa beka ha̧ mbɔi kɔ̧-a̧ ha̧ a̧ woyo ɓɔna.»

¹²«Kóó o nde nɛ gusi ŋma-wi gbɛ, wa tɛ gbɛ a̧ mbɛt.

¹³Kà bo nɛ a̧ a̧ kɔ̧ɔ̧ mɛ gbɛ ŋma-a na, ɓɛɛ kà bo nɛ Sɔ̧ a̧ kɔ̧ɔ̧ hegɔ, mi tɛ usi ŋma fara n'aa tɛ yu mɔ si sɛnɛ.

¹⁴Kà see ŋma bíí a̧ nyima zu ŋma-a ha̧ a̧ mɛ gbɛ a̧ nɛ gɔna kɔ̧ zaŋ, mɛ tɛ gbɛ a̧, kóó a̧ nɛɛ hɛr nɛ fara-ɗaf'am mbɛt.

¹⁵«Wi nɛ tɛ gusi dáà kɔ‘i kóó naa kɔ‘i, wi tɛ gbɛ a̧ yinɛ.

¹⁶«Wi nɛ zu̧ kìì-bíí, kóó a̧ ɗɔra wi’ɛi kaɗi, kóó a̧ ɗɔr a̧ na, wi tɛ gbɛ a̧ yinɛ.

¹⁷«Wi nɛ da̧ dáà kɔ‘i, kóó naa kɔ‘i, wi tɛ gbɛ a̧.

¹⁸«Kà bíí yiitoo kpɛr in ŋmaa, ɓɛɛ kà ɓii wi yo ɓii-aa nɛ ta, kóó sɔma nɛ a̧ nɛ er, kà a̧ fe sɛnɛ na, kà a̧ ɔ nɛ zɛɛ,

¹⁹kà a̧ nɛ nyɛma mɛ kasi dɔra gbo nɛnɛ, wi nɛ gusa a̧ tɛ yoɓi mɔ, wen ɔɔ nù n'aa ɔa, ɓɛɛ a̧ dee nyina ha̧ a̧ hɔ ŋgimbi n'aa tɛ kpa nɛ haya-tɛ.

²⁰«Kà ŋma bíí nɛ mbɛra bara kɔ‘i mɛ wiwii, kóó mɛ okoo-a gbɛ, wi tɛ de kpɔk kale mɔ‘i in a̧ mbɛt;

²¹ɓɛɛ kà o bara nɔ‘i nɛ fee na ɗoŋ zɛ kpɔk kóó yiitoo, wi beka de ɗaŋmɔ in wi’ɛi ɓɔna, wen wa duk nɛ mbɔi kɔ̧-a̧.

²²«Sɛn tɛ kpɛri, kà o bíí nɛ ira ŋma naa-zaŋ pi̧ nu, nɛ tɛ de ha̧ zaŋ-aa mɛ hɔ a nu, kà kóò‘i fe na, wi nɛ ira a̧‘i tɛ ha̧ mbɔi nɛ wíì ko kóò‘i tɛ gɔn ha̧ a̧ sɛn ti o wi-kɛ̧-mgbara-mɔ.

²³Ɓɛɛ kà kóò‘i fe, wa tɛ gbɛ wi’ɛi mbɛt.

²⁴Kà bó nɛ́ yí kóò‘i a̧ oa, wa tɛ o yí wi’ɛi mbɛt; kà bó nɛ́ nin kóò‘i a̧ gbina, wa tɛ gbin nin wi’ɛi mbɛt; kà bó nɛ́ naŋ-a a̧ gbina, wa tɛ gbin naŋ wi’ɛi mbɛt; kà bó nɛ́ er-a a̧ gbina, wa tɛ gbin er wi’ɛi mbɛt.

²⁵Kóó nɛ wee a̧ a̧ dɔɔ nɛ kóò‘i, wa tɛ dɔ wi’ɛi mbɛt; kóó nɛ da̧i̧ a̧ baa kóò‘i, wa tɛ e da̧i̧ tɛ wi’ɛi mbɛt; tɛ kóò‘i nɛ kpɔ̧i̧a̧, wa tɛ de ha̧ tɛ wi’ɛi mɛ kpɔ̧i̧ mbɛt.

²⁶«Kà ŋma bíí mbɛr yí bara kɔ‘i mɛ wiwii-a, kóó mɛ okoo-a o, a̧ tɛ e ha̧ a̧ mɛ kpa zu wen n'aa oo ɓii yí-a kaɗi.

²⁷Kà bó nɛ́ nin wii-bara kóó okoo-a a̧ a̧ gusa gbin, a̧ a̧ e ha̧ a̧ mɛ kpa zu wen n'aa gbina nin-a kaɗi.

²⁸«Kà wiwii-ndai nɛ gɔma ŋma wiwii, kóó okoo gbɛ, wi tɛ yo ndai'i nɛ ta gbɛ. Wi beka nyɔŋ kpoo ndai'i na, ɓɛɛ wen beka bo zu wan-aa na.

²⁹Kà ndai'i nɛ kia wen kii nɛti, kà‘i nɛ mbaŋa tɛ wan-aa, ɓɛɛ kà wan-aa nɛ kuna a̧ na, kà a̧ nɛ gɔma bíí, kóó okoo, kóó wiwii gbɛ, wa tɛ yo a̧ nɛ ta gbɛ; wi tɛ gbɛ wan-aa mbɛt.

³⁰Kà wa gɔn mɔ ha̧ wan-aa mɛ yoɓi, a̧ tɛ ha̧ nɛ mbɔi gɔn nɛ zu fio kɔ̧-a̧, a̧ tɛ ha̧ mɔ lɛŋ nɛ wa ak er-a.

³¹Kà ndai'i nɛ gɔma nɛ be okoo, kóó nɛ be wiwii gbɛ, nɛ́ kpɔk mɔ‘i a̧‘i tɛ de kana.

³²Kà ndai'i a̧ gɔma nɛ bara gbɛ, wan ndai'i tɛ ha̧ mbɔi ha̧ dáà-bara tɛ kɔya sede ɓu-taar, ɓɛɛ wa tɛ yo ndai'i nɛ ta gbɛ mbɛt.

³³«Kà ŋma bíí kpe nú gɔna-yì kɔ‘i na, kóó a̧ za̧a̧ nɛ mbe-a, kà a̧ kpe nú-a na, kà wiwii ndai, kóó tuifuu a̧ tika sɛnɛ,

³⁴wan gɔna-yì‘i tɛ yoɓi mɔ; a̧ tɛ ha̧ mbɔi ha̧ wan saɗi'i, ɓɛɛ wi nɛ ha̧a̧ mbɔi'i baa wɔr-saɗi'i.

³⁵Ŋgimbi nɛ wiwii-ndai ko ŋma bíí tɛ gɔm ko ŋma gbɛ, o wan-ndai nɔ‘i tɛ ɗɔr wan nɛ duk kpasa'i, ɓɛɛ wa kɛ̧ɛ̧ mbɔi-a in ŋmaa; wa tɛ kɛ̧ kana kpoo wan nɛ fea'i in ŋmaa mbɛt.

³⁶Kà ndai nɛ duk kpasa'i nɛ́ duka nɛ́ ndai-kii-wen nɛti, kà wan kɔ̧-a̧ nɛ kuna so a̧ na, a̧ tɛ yoɓi nɛ̀ kpasa ndai, ɓɛɛ a̧ baa kɔ̧-a̧ nɛ́ wan nɛ fea'i.»

³⁷«Kà ŋma bíí a̧ zu̧u̧ wiwii-ndai, kóó sami, kà a̧ gbɛ, kóó a̧ ɗɔra, wi’ɛi tɛ ha̧ mbe ndai mɔɔrɔ oi ndai'i, kóó a̧ tɛ ha̧ mbe sami naar oi sami'i.