Read Northwest Gbaya GBOA-A 22 Bible Online

GBOA-A 22 - Northwest Gbaya bible

GBOA-A 22

¹«Kà wa ba wi-zuzu nɛ kom ŋgeŋ mɛ zu̧ mɔ, kà wa gus'a gbɛ, wa beka ha̧ mɔɔ-oi-tɔk tɛ-a nɛ aa nu'i na;

²ɓɛɛ kà mɔ‘i a̧ dee nɛ̀ wese, wi tɛ kifi er zu tɔk-tɛ wi-zuzu'i. Kà wi-zuzu nɛ bòò nɛ́ mɔ mɛ yoɓi nɛ̀ mɔ n'aa zu̧a̧‘i na, ɓɛɛ wi ɗɔra a̧ oi mɔ n'aa zu̧a̧‘i.

³Kà wa nɛ kpaa ndai, tuifuu, kóó sami n'aa zu̧u̧ so'i nɛ kpasa sɛn er-a, a̧ tɛ ha̧ mbe-a war yiitoo.»

⁴«Kà ŋma bíí e mɔ-dai kɔ‘i mɛ ɗaŋ fɔ, kóó fɔ-nyak-dɔ̧ɔ̧ ko ŋma-a, a̧ tɛ yoɓi mɔ nyɛm nɛ ɗoŋ mbɔi nɛ wi’ɛi tɛ̀ɛ́ kpa so nyɛm ɗoŋ nyak-dɔ̧ɔ̧‘i, ɓɛɛ kà o mɔ-dai nɔ‘i nyɔŋ mɔ kpɛɛfɔ ko bíí, wan mɔ-dai tɛ yoɓi mɔ nɛ̀ o de o nyɔnɔ kpɛɛfɔ kɔ‘i, kóó kpɛɛfɔ-nyak-dɔ̧ɔ̧ kɔ‘i ha̧ wi’ɛi.

⁵«Kà wee dar tik tɛ o yiŋga-tɛn, ɓɛɛ kà a̧ dɔ sika-alkamaari, kóó wan nɛ ɓɔn fara yora-a, kóó a̧ dɔɔ nɛ fɔ lɛŋ, wi-pi̧-wee'i tɛ yoɓi mɔ nɛ ɗaŋa.

⁶«Kà ŋma bíí e mbɔi kɔ‘i er ŋma bíí woyo, kà wi-zu̧zu̧ nɛ́ɛ̀ zu̧ mɔ‘i sɛn er wi’ɛi yinɛ, ɓɛɛ kà wa ba wi-zu̧zu̧‘i, a̧ tɛ ha̧ mɔ hee mɔ‘i ga war yiitoo.

⁷«Kà wa kpa wi-zu̧zu̧‘i na, wan-tua'i tɛ kan mɔ sɛn ti Sɔ̧ mɛ usi'e, er-a hɔ tɛ gɔni mɔ ko wan-aa na.

⁸Tɛ mɔ ko zu̧u̧ ndai, tuifuu, sami, gasa laa, kóó nɛ ŋma mɔ nɛ yɔa, kà wa tɔ̧‘e, nɛ́ wi’ɛi a̧ zu̧a̧, wan-mɔ‘i in wi-zuzu tɛ kan mɔ sɛn ti Sɔ̧. Ɓɛɛ wi nɛ Sɔ̧ tɛ usi'e, nɛ́ a̧ a̧ zu̧a̧ wó, tɛ ha̧ mbɔi war yiitoo ha̧ ɓii bíí.

⁹«Kà ŋma bíí e wiwii-ndai, tuifuu, kóó sami, kóó nɛ ge saɗi ge er ŋma bíí, kà saɗi'i nɛ́ fea, kóó a̧ baa nɛ da̧i̧, kóó wa zu̧u̧ nɛ a̧ nɛ bo nɛ wi zɔka nɛ̀ yí-wi na,

¹⁰o wi nɔ‘i yiitoo'i tɛ kan mɔ nɛ nin GASA WAN mɛ usi'e, wi ba mɔ ko ŋma bíí na. Wan-mɔ‘i tɛ ba oi mɔ kɔ‘i mbɛt, ɓɛɛ a̧ beka ak ŋma mɔ er wi nɛ kasa mɔ‘i na.

¹¹Ɓɛɛ kà wa nɛ zu̧u̧ saɗi'i zu̧u̧ er-a, a̧ tɛ yoɓi mɔ ha̧ wan-aa.

¹²Kà bó nɛ́ boko-nam a̧ nyɔŋa saɗi'i, a̧ tɛ kai kana o be ɓira kpoo-aa tɛnɛ ha̧ wan-aa mɛ zɔk sɛ, ɓɛɛ a̧ beka yoɓi ŋma mɔ na.

¹³Kà ŋma bíí gbak mɔ-dai ko ŋma bíí woyo mɛ nɛ̀ɛ́ de nɛ tom kɔ‘i, kà mɔ-dai ba da̧i̧, kóó a̧ fea oi-wan-aa, wi-ba-a'i tɛ ha̧ mbɔi oi-aa.

¹⁴Kà mɔ‘i nɛ́ dee nɛ̀ gbaayí wan-mɔ-dai, wi-ba-a'i beka ha̧ mbɔi na. Ka a̧ nɛ yoɓa yoɓi, a̧ tɛ ba mbɔi-yoɓa a̧‘i tɛnɛ.»

¹⁵«Kà ŋma bíí ɔr ŋma boko-bem nɛ tɛ iŋ tɛ in nɛ wa tɛ har hɔ̧ɔ̧ na, ɓɛɛ ɔ in a̧, wi’ɛi tɛ ha̧ mbɔi ɗoŋ-aa, ɓɛɛ baa a̧ nɛ kóò.

¹⁶Kà dáà ko be okoo'i nɛ kɔ̧ɔ̧ ha̧a̧ kóò ha̧ a̧ na, a̧ tɛ ha̧ mbɔi nɛ wa yɔra wen wi nɛ ɗaŋ boko-bem nɛ tɛ iŋ tɛ na.

¹⁷«Mɛ beka e okoo-de-mɔɔ-kifi mɛ́ duk kpasa na.

¹⁸«Wi tɛ gbɛ wi nɛ ɔ in saɗi yinɛ.

¹⁹«Wi nɛ ɗafi o géé-sɔ̧, nɛ bo nɛ GASA WAN na, wi tɛ gbɛ a̧ yinɛ.

²⁰«Mɛ beka kai mɔ er o gɛnɛ, kóó dee ŋma ŋgayamɔ in wa na, wen ɛnɛ mbɛt baa ya so nɛ gɛnɛ sɛn nú Egiptɛ.

²¹«Ɛnɛ beka de ŋgamɔ in ko-gera, in o be-oi na.

²²K’ɛ̀nɛ̀ de ɗaŋmɔ in wa, kà wa ai nú-wa ha̧‘m, mi tɛ yeŋ zer-am tɛ aia-nú kɔ-wa.

²³Nyimsea kɔ‘m tɛ kur, mi tɛ gbɛ‘nɛ́ nɛ gba-paa, ɓɛɛ o kóò k’ɛ́nɛ́ in o bem k’ɛ́nɛ́ tɛ ya nɛ o ko-gera in o be-oi.

²⁴«Kà mɛ̀ ha̧ nyamandoi-sede ha̧ ŋma bíí kɔ‘m, kóó ha̧ ŋma wisan nɛ duk in mɛɛ, mɛ beka de mɔ in wa hee wanmbɔi ga na, kóó ha̧ wa mɛ e ŋma mbe sede zu a̧ na.

²⁵Kà ŋma bíí e gasa laa er-mɛ nɛ ziŋina, mɛ̀ bá si ɗoŋ ha̧ a̧ nɛti sɛka wese yea;

²⁶wen kpɔk laa-kpe-tɛ-a a̧‘i, ɓɛɛ nɛ́ ge a̧ a̧ tɛ ɔ nɛnɛ ge? Kà a̧ ai nú pii tɛ‘m, mi tɛ zii, wen kɔ‘m, mi nɛ wan-de-ko.

²⁷«Mɛ beka da̧ Sɔ̧ na; mɛ beka fom wi nɛ duk nɛ gasawi mgbara o bíí kɔ-mɛ na.

²⁸«Mɛ beka ha̧ zu gbɛ̧ waya-te kɔ-mɛ in dɔ̧ɔ̧ kɔ-mɛ ha̧ ŋma sɔ̧ na. Mɛ tɛ ha̧ kaya-bem kɔ-mɛ ha̧‘m.

²⁹Nɛ́ kalemɔ‘i a̧ mɛ tɛ de nɛ ndai in sami kɔ-mɛ. Kuti be-a tɛ duk in naa kɔ‘i zɛ mɔɔrɔ-ɗoŋ-yiitoo, ɓɛɛ nɛ́ sɛn tɛ mɔɔrɔ-ɗoŋ-taar zɛ, a̧ mɛ tɛ ha̧ nɛ a̧ ha̧‘m.

³⁰Ɛnɛ tɛ ya nɛ o sa̧a̧ bíí kɔ‘m. Ɛnɛ beka nyɔŋ kpoo nɛ boko-nam baa na, ɛnɛ tɛ ha̧ ha̧ toyo.»