Read Northwest Gbaya GBOA-A 23 Bible Online

GBOA-A 23 - Northwest Gbaya bible

GBOA-A 23

¹«Mɛ beka dali wen nɛ̀ nú-tum na. Mɛ beka ye ɗoŋ wi-de-ɗaŋmɔ nɛ ndela na mbɛt.

²Mɛ beka zɔk ɗoŋ mɔ ko o dɔka bíí nɛ kɔ̧ɔ̧ nɛ ɗaŋmɔ na, in mɛ beka zii wen ko o dɔka bíí gɔn nɛ kita zu bíí e nɛ yuwar heembea duk na.

³Mɛ beka ye ɗoŋ ɓɔsa bíí nɛ dee ɗaŋmɔ tɛ kita na.

⁴«Kà mɛ̀ kpa ndai, kóó tuifuu ko wisɛn kɔ-mɛ fara yambala-a, mɛ̀ káí wa sinɛ ha̧ wan-aa.

⁵Kà mɛ̀ zɔk tuifuu ko wisɛn kɔ-mɛ fara tika-a ɗɔɔ dita tui, ká mɛ́ e a̧ duk na, ɓɛɛ mɛ̀ gbák wan-saɗi'i nɛ̀ ɗáfá tui.

⁶Mɛ beka de ha̧ kita ko wisan mɛ ɗaŋ na.

⁷«Ká mɛ́ gbɛ wi nɛ duk zóóŋ gee na, in wi-de-mɔ nɛ yuwar-a na, wen mi beka tu̧ ndaa wi-de-ɗaŋmɔ na.

⁸Mɛ beka kpɛk ha̧a̧mɔ nɛ hu̧sa̧-a̧ na, wen pɛrti ha̧a̧mɔ‘i kpe nɛ yi wi-gɔn-kita, wen ká wa tɛɛ zɔk demɔ ko wi-de-mɔ nɛ yuwar-a.

⁹«Mɛ beka usi bɔnɛ ha̧ gɛnɛ na, wen ɛnɛ iŋa duka-a ko gɛnɛ; ɛnɛ baa ya so nɛ o gɛnɛ sɛn nú Egiptɛ.»

¹⁰«Mɛ tɛ gun nyɔnɔ sɛn kpɛɛfɔ kɔ-mɛ sɛn tɛ pɛ mɔɔrɔ-ɗoŋ-kpɔk, ɓɛɛ mɛ mɔi̧a nyɔnɔ-a.

¹¹Sɛn tɛ mɔɔrɔ-ɗoŋ-yiitoo pɛ, mɛ tɛ e fɔ‘i ha̧ a̧ mɛ ɔm tɛ wen ha̧ o wisan mɛ nyɔŋ nyɔnɔ-a mbɛt; ɓɛɛ oi-aa nɛ tɛ ɓɔn, nɛ́ wen ha̧ o saɗi-zaŋbɛɛ mɛ nyɔŋ. Nɛ́ kalemɔ‘i a̧ mɛ tɛ de in fɔ-nyak-dɔ̧ɔ̧ in te-nɔ̧́ kɔ-mɛ.

¹²«Mɛ tɛ de tom kɔ-mɛ tɛ zɛ mɔɔrɔ-ɗoŋ-kpɔk, ɓɛɛ sɛn tɛ mɔɔrɔ-ɗoŋ-yiitoo-aa, mɛ tɛ ɔm tɛ-mɛ ha̧ ndai kɔ-mɛ in tuifuu kɔ-mɛ mɛ ɔm tɛ in ha̧ bem ko bara kɔ-mɛ in gɛnɛ mɛ ɔm tɛ mbɛt.»

¹³«Ɛnɛ tɛ kasi o mɔ lɛŋ n'am tɔ̧ɔ̧ h’ɛ́nɛ́‘i, ɓɛɛ ɛnɛ beka sa nin o ŋma sɔ̧ na. Wi beka zii gee zia-a sɛn nú‘nɛ́ na.

¹⁴«Sɛn tɛ pɛ kpɔk, mɛ tɛ de gbaŋa ha̧‘m war taar.

¹⁵Mɛ̀ zɔ́k gbaŋa brɛt nɛ hao bo sɛnɛ na nɛ de-a. Mɛ tɛ nyɔŋ kana nɛ brɛt nɛ̀ hao bó sɛnɛ na tɛ zɛ mɔɔrɔ-ɗoŋ-yiitoo, hee mɔ'ɔ n'am baa tɔ̧ so ha̧ mɛ ga; ŋgimbi-a tɛ duk nɛ zɛ sɔi-woo nɛ‘i gɔna so, wen mɛ nɛ tɛ zɛ‘i a̧ mɛ baa gbo nɛnɛ nú Egiptɛ. Wi beka tɛ sɛn ti'm nɛ gee er na.

¹⁶«Mɛ tɛ zɔk gbaŋa-zu-nyɔnɔ nɛ de-a, gbaŋa-kuti-nyɔnɔ nɛ mɛ baa gun sɛn kpɛɛfɔ, in gbaŋa-mɔi̧a-nyɔnɔ sɛn tɛ kaɗa pɛ mbɛt, ŋgimbi nɛ mɛ kai nɛ mɔɔ-oi-tom kɔ-mɛ si sɛn saaye.

¹⁷Sɛn zaŋ pɛ kpɔk, o wiwii lɛŋ tɛ mɔi̧ ŋmaa tɛnɛ, sɛn ti GASA WAN Sɔ̧ war taar.

¹⁸«Mɛ beka ɗaf'am nɛ tɔr kpoo in brɛt nɛ hao a̧a̧ sɛnɛ na. Nɔ kpoo-saɗi nɛ wa gbɛɛ de nɛ gbaŋa ha̧‘m beka ɔ ŋgɔn na.

¹⁹«Mɛ tɛ kai nɛ de kuti zu-nyɔnɔ kɔ-mɛ tɛnɛ sɛn kɔ̧ tua ko GASA WAN Sɔ̧ kɔ-mɛ. Mɛ beka gi be gbadua nɛ yibere ko naa kòò-a na.»

²⁰«Mi tɛ tom ŋma betom yak ti h’ɛ́nɛ́ wen pɛma'nɛ́ sɛn yuwar in wen mgbɔɔ‘nɛ́ hɔ fara n'am ɗafa wen'nɛ́.

²¹Ɛ̀nɛ̀ mbó zu ha̧ a̧, in ɛ̀nɛ̀ zíí wen kɔ̧-a̧. K’ɛ́nɛ́ de ŋgazu in a̧ na. K’ɛ̀nɛ̀ de ŋgazu in a̧, a̧ beka e ɗaŋmɔ h’ɛ́nɛ́ na, wen nin-am a̧a̧ tɛ a̧.

²²K’ɛ̀nɛ̀ mbo zu ha̧ a̧ nɛ de-a, in k’ɛ̀nɛ̀ de mɔ lɛŋ n'am tɔ̧ h’ɛ́nɛ́‘i, mi tɛ kifi duk nɛ wisɛn ko o wisɛn k’ɛ́nɛ́, in wi-bi-biro wen o wi nɛ bi biro in'nɛ̀ɛ́.

²³Ŋgimbi nɛ betom kɔ‘m tɛ yak ti h’ɛ́nɛ́, n'aa tɛ fo'nɛ́ hɔ tɛ ko o be Amɔr, o be Hit, o be Periz, o be Kanaŋ, o be Hiv in o be Jebus, ɓɛɛ n'am tɛ kum wa yinɛ,

²⁴ɛnɛ beka gasi o sɔ̧ kɔ-wa na, kóó dee tom ha̧ o sɔ̧ nɔ‘i na mbɛt; ɛnɛ beka zɔk ɗoŋ naŋanɔ ko o bíí nɔ‘i na, ɓɛɛ ɛnɛ tɛ gbin o mboo-sɔ̧ kɔ-wa a nu.

²⁵K’ɛ̀nɛ̀ de tom ha̧ GASA WAN Sɔ̧ k’ɛ́nɛ́, a̧ tɛ tok de yoŋgo a zu nyɔnɔ in o yì k’ɛ́nɛ́, ɓɛɛ zɛɛ beka hɛɗi katɛ‘nɛ́ na.

²⁶Sɛn tɛ nù k’ɛ́nɛ́, zaŋ ŋma okoo kpɔk beka hɔ a nù na; ŋma kpɔk beka yar ndɔra na. Mi tɛ e kana ha̧ zɛ duka-a k’ɛ́nɛ́ zu nù mɛ dam.

²⁷«Mi tɛ tom gasa mɔɔ-kíì kɔ‘m yak ti h’ɛ́nɛ́. Mi tɛ ndur o giiwi lɛŋ n’ɛnɛ tɛ ye tɛ nù kɔ-wa a nù, ɓɛɛ mi dee ha̧ o wisɛn k’ɛ́nɛ́ mɛ yu mɔ yak sɛn ti'nɛ́.

²⁸Mi tɛ de ha̧ o gɔ̧-gua mɛ yak ti h’ɛ́nɛ́ wen ndaka o be Hiv, o be Kanaŋ, in o be Hit;

²⁹mi beka ndak o wi nɔ‘i yinɛ sɛn tɛ pɛ kpɔk na, wen ká nù tɛɛ kifi duk nɛ ŋga-gbárà nɛ o boko-nam tɛ nyɛɓi sɛnɛ wen dea ɗaŋmɔ in'nɛ̀ɛ́.

³⁰Mi tɛ ndak wa mɔktɛ mɔktɛ hɔ wese nɛ o bezaŋ‘nɛ́ tɛ dɔk wen baa nù k’ɛ́nɛ́ lɛŋ sɛ.

³¹Mi tɛ de ha̧ nù k’ɛ́nɛ́ mɛ ku̧ naŋ nɛ Gbɛ̧ gba-tɔp hɔ gba-tɔp ko o be Filistii, ŋga-gbárà in nana-yì Efrat. Ŋgimbi n'am tɛ e o be-nu ɗɔɔ ŋgai k’ɛ́nɛ́, ɓɛɛ n’ɛnɛ tɛ ndak wa yinɛ ti'nɛ́,

³²ɛnɛ beka nɔ tɔk in wa, in o sɔ̧ kɔ-wa na mbɛt.

³³Wa beka de ye sɛn nù k’ɛ́nɛ́ na, ká wa tɛɛ de h’ɛ́nɛ́ mɛ de ɗaŋmɔ in am, k’ɛ́nɛ́ tɛɛ gasi o sɔ̧ kɔ-wa, ká kifi sak wen'nɛ́.»