Read Northwest Gbaya GBOA-A 24 Bible Online

GBOA-A 24 - Northwest Gbaya bible

GBOA-A 24

¹Sɔ̧ tɔ̧ɔ̧ so ha̧ Moisɛ: «Mɛ̀ dáŋ in Arɔŋ, Nadab, Abihu in o kuti-wi Israɛl ɓu-mɔɔrɔ-ɗoŋ-yiitoo si sɛn tɛ GASA WAN, ɓɛɛ ɛ̀nɛ̀ tɛ́ɛ̀ gú nù nɛ nyɛi̧a-a.

²Nɛ́ Moisɛ ɛ̀nɛ̀ ɓɛɛ a̧ tɛ ɗɔŋ si katɛ GASA WAN, wa beka nɛ in a̧ na. Ɓɛɛ o dɔka bíí beka daŋ in a̧ na mbɛt.»

³Moisɛ pia ɗoŋ we ɗoŋ o wen ko GASA WAN in o heembea lɛŋ ha̧ o bíí. Dukbíí lɛŋ kifa nú hee kpɔk bíí ga: «Wen nɛ GASA WAN tɔ̧a̧‘i lɛŋ, ɛɛ tɛ mbo zu sɛnɛ.»

⁴Moisɛ yɔra o wen ko GASA WAN lɛŋ: a̧ kura mɛ tutuyɛ sut, ɓɛɛ a̧ mbo fara-ɗafi-sɔ̧ sɛn ka̧ naŋ kaya, in ta-zu-nu ɓu-zua-yiitoo dam nɛ̀ ɗoŋ zuduk be Israɛl ɓu-zua-yiitoo.

⁵A̧ toma o be-ŋgaiwi Israɛl; wa dɔɔ kpoo-sɔ̧, ɓɛɛ wa gbɛ o be wiwii ndai ɗafi nɛ GASA WAN.

⁶Moisɛ kɛ̧ɛ̧ reeta tɔk'i a kɔ̧ nyɛk, a̧ baa oi tɔk misi̧ a fara-ɗafi-sɔ̧.

⁷A̧ baa kalata nɔɔ-tɔk, ɓɛɛ a̧ tɔr ha̧ dukbíí nɛ tɔ̧a̧: «Wen nɛ GASA WAN tɔ̧a̧ lɛŋ, ɛɛ tɛ zii, ɓɛɛ ɛɛ mboo zu sɛnɛ.»

⁸Moisɛ baa tɔk'i misi̧ a zu dukbíí, ɓɛɛ tɔ̧: «Tɔk nɔɔ-tɔk nɛ̀ GASA WAN baa nɔ in'nɛ̀ɛ́ zu mɔ lɛŋ n'aa tɔ̧a̧ nɛ mɔ'ɔ.»

⁹Ɓɛɛ Moisɛ daŋ in Arɔŋ, Nadab, Abihu in o kuti-wi Israɛl ɓu-mɔɔrɔ-ɗoŋ-yiitoo.

¹⁰Wa zɔka Sɔ̧ ko Israɛl, ɓɛɛ fara n'aa e naŋ-a sɛnɛ tok tok hee gba̧a̧-yí-zan nɛ tura-zan bo sɛnɛ na ga.

¹¹Sɔ̧ fo o gasawi ko o be Israɛl na. Wa zɔka Sɔ̧, wa nyɔŋa mɔ, ɓɛɛ wa nɔ mɔ mbɛt.

¹²GASA WAN tɔ̧ɔ̧ ha̧ Moisɛ: «Mɛ̀ dáŋ pii tɛ‘m sɛn zu kaya’ɛ, a̧ mɛ duk hɛ̧ɛ̧ ha̧‘m ha̧ sɛka-ta n'am yɔra Heembea sɛnɛ‘i in o mɔ nɛ wa tɛ de wen ha̧ mɛ mɛ usi ha̧ wa!»

¹³Moisɛ kura in Josue wi-gbak-a, ɓɛɛ wa daŋ si zu kaya ko Sɔ̧.

¹⁴A̧ tɔ̧ɔ̧ so ha̧ o kuti-wi'e: «Ɛ̀nɛ̀ pɛ́m yɛ sɛn hɛ̧ɛ̧ hɔ ŋgimbi n’ɛɛ tɛ pii ɗoŋ. Arɔŋ in Hur tɛ duk kɔ-wa in'nɛ̀ɛ́. Wi nɛ a̧a̧ nɛ ŋma wen, a̧ a̧ tɔ̧ ha̧ wa.»

¹⁵Moisɛ daŋa si zu kaya, ɓɛɛ tura-zan kpe zu kaya lɛŋ.

¹⁶Gasamɔ ko GASA WAN duka zu kaya Sinai zɛ mɔɔrɔ-ɗoŋ-kpɔk, ɓɛɛ tura-zan kpe zu a̧. A̧ saa Moisɛ tɛ mɔɔrɔ-ɗoŋ-yiitoo zɛ nɛ mgbara tura-zan.

¹⁷Gasamɔ ko GASA WAN usa tɛ ha̧ o be Israɛl hee leɓe-wee ga, ndar nɛ mɔ sɛn zu kaya.

¹⁸Moisɛ yee ɗɔɔ tura-zan, ɓɛɛ a̧ daŋ si zu kaya. A̧ duka hi̧i̧ zɛ ɓu-naar.