Read Northwest Gbaya GBOA-A 25 Bible Online

GBOA-A 25 - Northwest Gbaya bible

GBOA-A 25

¹GASA WAN tɔ̧ɔ̧ ha̧ Moisɛ:

²«Mɛ̀ tɔ̧́ ha̧ o be Israɛl mɛ ndɛm zu-mɔ ha̧‘m. Ɛnɛ tɛ ba nɛ mɔ er wi nɛ tɛ ha̧ mɔ nɛ ta-tɛ nɛ desee.

³Mɔ n’ɛnɛ tɛ ba er wa hee demɔ ga nɛ lɔr, bu-mbɔi ká bá nɛ̀ ndɛrɛ;

⁴tu̧ zɔ̧-laa, gbɛ̧ zɔ̧-laa, kóó gbɛ̧ zɔ̧-laa nɛ tok tok, yɛm-yɛm zɔ̧-laa in buma gbadua;

⁵o ndàrá vala sami nɛ wa sɔ̧ɔ̧ nɛ́ gbɛ̧ mɔ sɛnɛ, ŋga ndàrá in te akasia.

⁶Ɛnɛ tɛ ba nɔ̧́-e-wee, nɔ̧́-nyama wen sɔ̧a̧-a in fuu-nyama wen dɔa-a.

⁷Ɛnɛ tɛ ba o de toka ta kɛn-kɛn wen laa-ɗafi-sɔ̧ nɛ‘i saa'e Efod in laa-kpe-yí-ŋguɗi ko wi-ɗafi-sɔ̧.

⁸Wa tɛ de tua-laa-gas'am, ha̧‘m mɛ duk mgbara wa.

⁹Mi tɛ usi yuwar dee tua-laa'i in yuwar mɔɔ kɔ̧ a̧ lɛŋ ha̧ mɛ. Ɛnɛ tɛ de kana hee mɔ‘i ga.»

¹⁰«Wa tɛ kai te akasia de nɛ ŋma kuɓa nɛ zi̧a̧-a̧ tɛ duk nɛ mɛtrɛ kpɔk nɛ ŋma mɔ zu-a, pɛsa-a tɛ duk nɛ reeta mɛtrɛ nɛ ŋma mɔ zu-a, kusa-a nɛ kpɔk mɔ.

¹¹Mɛ tɛ lati de lɔr sɛnɛ lɛŋ, nɛ ɗoŋ-aa in nɛ kɔ̧ a̧ mbɛt, ɓɛɛ mɛ tɛ mbo be lɔr zik nɛ nú-a lɛŋ.

¹²Mɛ tɛ dui gasa wele naar nɛ mɛ tɛ pi̧ dam naŋ-a naar'i; mɛ tɛ a yiitoo nɛ war mgbɔɔr, yiitoo nɛ war mgbɔɔr.

¹³Mɛ tɛ de ɓira-te akasia nɛ mɛ tɛ yɔk ɗoŋ-aa nɛ lɔr.

¹⁴Mɛ tɛ a o te nɔ‘i sɛn kɔ̧ wele nɔ‘i; nɛ́ te nɔ‘i a̧ tɛ ya wen gɔɔ kuɓa'i.

¹⁵Ɓira-te nɔ‘i tɛ ya kana sɛn kɔ̧ wele nɔ‘i kpoo nɛ kpoo, wi beka dak wa sɛnɛ yinɛ na.

¹⁶Nɛ́ sɛn kɔ̧ kuɓa'i a̧ mɛ tɛ a o sɛka-ta-heembea n'am tɛ ha̧ mɛ‘i sɛnɛ.

¹⁷«Mɛ tɛ de mɔɔ-kpe-zu kuɓa'i nɛ lɔr lɛŋ: zi̧a̧-a̧ nɛ mɛtrɛ kpɔk nɛ ŋma mɔ zu-a; pɛsa-a nɛ reeta mɛtrɛ nɛ ŋma mɔ zu-a.

¹⁸Mɛ tɛ de keribim yiitoo nɛ lɔr; mɛ tɛ dui wa yiitoo a ndɔŋ nu mɔɔ-kpe-zu kuɓa.

¹⁹Mɛ̀ dé keribim kpɔk e nú-a nɛ war mgbɔɔr; ɓɛɛ mɛ́ dèé ɓii-aa e ɓii nú-a. Mɛ tɛ de o keribim nɔ‘i ndaɗi zu kuɓa.

²⁰Ɓɛɛ o keribim tɛ nyar ɓaa-wa si ŋgɔn kpe nɛ zu mɔɔ-kpe-nú kuɓa. Wa tɛ yor tan ŋmaa zɔk nɛ mɔɔ-kpe-nú kuɓa.

²¹Mɛ tɛ ba mɔɔ-kpe-nú kuɓa gu nú-a, ɓɛɛ mɛ aa o sɛka-ta-heembea n'am tɛ ha̧ mɛ‘i.

²²Mɛ̀ nɛ́ sɛn hi̧i̧ a̧‘m tɛ kpa ŋmaa in mɛɛ, sɛn zu Kuɓa nɔɔ-tɔk mgbara o keribim yiitoo tɔ̧ nɛ mɔ nɛ mɛ tɛ tɔ̧ ha̧ o be Israɛl ha̧ mɛ.»

²³«Mɛ tɛ de ŋma taŋe-nyɔŋ-mɔ nɛ te akasia, zi̧a̧-a̧ nɛ mɛtrɛ kpɔk, ɓɛɛ pɛsa-a nɛ reeta mɛtrɛ; kusa-a nɛ reeta mɛtrɛ nɛ ŋma mɔ zu-a.

²⁴Mɛ tɛ yɔk ɗoŋ-aa nɛ de sa̧a̧ lɔr, mɛ tɛ a lɔr zik nɛ nú-a lɛŋ.

²⁵Mɛ tɛ de o ndota nú-a nɛ lɔr: pɛsa-a hee ŋgɛɗɛ-er-wi ga si ŋgɔn, ɓɛɛ mɛ ɓoo lɔr zik nɛ nú-a.

²⁶Mɛ tɛ dui o kana naar nɛ lɔr, ɓɛɛ mɛ tɛ a o kana nɔ‘i tɛ mgbii-aa naar.

²⁷O kana nɔ‘i tɛ ya o mgbii-aa, nɛ‘i tɛ a o te sɛnɛ, wen gɔa-a.

²⁸Mɛ tɛ de o te nɔ‘i nɛ akasia, ɓɛɛ mɛ tɛ yɔk ɗoŋ-wa nɛ lɔr. O te nɔ‘i tɛ ya wen gɔɔ taŋe-nyɔŋ-mɔ.

²⁹Mɛ tɛ de o tasi, o be ɗele, o ɓii, o be-yee; nɛ́ mɔɔ nɔ‘i a'i tɛ a mɔ kɔ̧ a̧ wen aa-a nɛ zɛzɛ ha̧ Sɔ̧. Mɛ tɛ de wa nɛ sa̧a̧ lɔr.

³⁰Ɓɛɛ mɛ tɛ ba brɛt tɛnɛ ɓɔnsɛnɛ e zu taŋe-nyɔŋ-mɔ‘i sɛn ti'm.»

³¹«Mɛ tɛ de ŋma dek-e-wee nɛ sa̧a̧ lɔr, wa tɛ dui a̧ nɛ lɔr, naŋ-a in gun-aa; o be-yee-a, o kpoi-a in o dap-aa tɛ ya kpɔk in a̧.

³²Gbaa-er-a tɛ ya mɔɔrɔ-ɗoŋ-kpɔk gbo nɛ katɛ a̧, taar tɛ ya nɛ mgbɔɔr, taar nɛ mgbɔɔr.

³³Sɛn tɛ gbaa-er-a kpɔk, o be yee taar hee gba̧a̧-baŋa[9] ga tɛ ya sɛnɛ nɛ o kpoi-a in o dap-aa, ɓɛɛ sɛn tɛ ŋma gbaa-er-a woyo, o be yee taar nɛ o kpoi-a in o dap-aa a̧a̧ sɛnɛ, hegɔ dam nɛ o gbaa-er-a mɔɔrɔ-ɗoŋ-kpɔk.

³⁴War ko dek-e-wee, nɛ́ be yee naar nɛ duk hee gba̧a̧ ndɛŋgɛ ga, nɛ̀ a̧a̧ nɛ kpoi-a in o dap-aa sɛnɛ.

³⁵Kpoi-a kpɔk tɛ duk wen gbaa-er-a yiitoo, nɛ gboo nɛ tɛ dek-e-wee. Mɛ̀ nɛ́ kalemɔ‘i a̧ tɛ de wen o gbaa-er-a yiitoo yiitoo dam wa mɔɔrɔ-ɗoŋ-kpɔk lɛŋ.

³⁶O kpoi-a in o gbaa-er-a tɛ ndaɗi ŋmaa in a̧; wi tɛ mboɗ‘a dui kpɔk nɛ sa̧a̧ lɔr.

³⁷Hɔ-ɗoŋ-aa, mɛ tɛ de o lamba mɔɔrɔ-ɗoŋ-yiitoo; wi tɛ e wee tɛ o lamba nɔ‘i ha̧ wa mɛ nyɛk sɛn ti dek'i.

³⁸Mɛ tɛ de o be mɔɔ-ɓam-mɔ in o nyɛk-a-bùk nɛ sa̧a̧ lɔr.

³⁹Mɛ tɛ de dek'i nɛ kilo sa̧a̧ lɔr ɓu-taar-zua-mɔɔrɔ gu nɛ o mɔɔ-aa lɛŋ.

⁴⁰Mɛ zɔk mɔ‘i in mɛ de mɔ‘i nyɛm ɗoŋ yuwar-a n'am usa ha̧ mɛ zu kaya Sinai mɛ.»