Read Northwest Gbaya GBOA-A 27 Bible Online

GBOA-A 27 - Northwest Gbaya bible

GBOA-A 27

¹«Mɛ tɛ de fara-ɗafi-sɔ̧ nɛ te akasia nɛ dura-a in pɛsa-a tɛ duk nɛ mɛtrɛ yiitoo nɛ reeta, kusa-a tɛ duk nɛ mɛtrɛ kpɔk nɛ reeta.

²Mɛ tɛ a o zak dam mgbii-aa naar, ha̧ wa mɛ ya ndaɗi ŋmaa in fara-ɗafi-sɔ̧, ɓɛɛ mɛ tɛ sɔ̧ ndɛrɛ ɗoŋ-aa lɛŋ.

³Mɛ tɛ de o nyɛk wen kaia bùk fara-ɗafi-sɔ̧, o mɔɔ-ɗu-mɔ, o pɛsa tasi, o boi-kɔk-mɔ in o tasi-aŋ-wee; mɛ tɛ dui o nyɛk nɔ‘i nɛ ndɛrɛ.

⁴Mɛ tɛ sin ŋma be háŋányáŋá-mɔ nɛ ndɛrɛ hee mɛ nɛ yɔk ga, ɓɛɛ mɛ tɛ a kana ndɛrɛ naar dam mgbii háŋányáŋá-mɔ‘i.

⁵Mɛ tɛ ba sina-mɔ‘i e ɗɔɔ ká̧ nu fara-ɗafi-sɔ̧ nɛ ɗɔɔ, hɔ reeta ká̧ fara-ɗafi-sɔ̧.

⁶Mɛ tɛ de o gbaŋ fara-ɗafi-sɔ̧ nɛ te akasia, ɓɛɛ mɛ sɔ̧ɔ̧ ndɛrɛ ɗoŋ-wa;

⁷wi tɛ a o gbaŋ nɔ‘i kana ha̧ wa mɛ gbo nɛ ká̧ fara-ɗafi-sɔ̧ ŋgimbi nɛ‘i tɛ gɔ nɛ a̧.

⁸Mɛ tɛ de fara-ɗafi-sɔ̧‘i nɛtɛ, ɓɛɛ kɔ̧ a̧ tɛ duk ɓuɗuk nyɛm nɛ ɗoŋ mɔ n'am usa ha̧ mɛ sɛn zu kaya.»

⁹«Mɛ tɛ de nú-zala zik nɛ sa̧a̧-fara nɛ yɛm-yɛm toka-zɔ̧-laa: dura-a si war ká̧-zan-mɛ́-ɗɔɔ nɛ mɛtrɛ ɓu-mɔɔrɔ.

¹⁰O mbiŋ ɓu-yiitoo nɛ‘i dee nɛ ndɛrɛ tɛ ya zu o gun-aa ɓu-yiitoo nɛ‘i dee nɛ ndɛrɛ mbɛt; wi tɛ de o boi-kɔk-mɔ zu o mbiŋ in o mɔɔ-ga̧i-laa nɛ bu-mbɔi.

¹¹Nɛ̀ war ká̧-zan-mɛ́-ŋgɔn, mɛ tɛ de o toka-zɔ̧-laa nɛ dura-a nɛ mɛtrɛ ɓu-mɔɔrɔ, ɓɛɛ mɛ dee o mbiŋ ɓu-yiitoo in o gun-aa ɓu-yiitoo nɛ ndɛrɛ, ká bá nɛ̀ o boi-kɔk-mɔ in o mɔɔ-ga̧i-laa nɛ bu-mbɔi.

¹²Dura toka-zɔ̧-laa kpe-nú-zala nɛ war yee-wese tɛ duk nɛ mɛtrɛ ɓu-yiitoo-zua-mɔɔrɔ nɛ duk zu mbiŋ-tua ɓu, in zu gun-aa ɓu.

¹³Nɛ̀ war daŋa-wese, toka-zɔ̧-laa-kpe-nu tua tɛ duk nɛ mɛtrɛ ɓu-yiitoo-zua-mɔɔrɔ nyɛm nɛ pɛsa nu zala.

¹⁴Nɛ̀ ká̧ nu tua nɛ mgbɔɔr, toka-zɔ̧-laa-kpea-a tɛ duk nɛ mɛtrɛ mɔɔrɔ-ɗoŋ-yiitoo nɛ reeta, nɛ mbiŋ taar in gun-aa taar.

¹⁵Nɛ ɓii ká̧ nu tua, toka-zɔ̧-laa kpea a̧ tɛ duk nɛ mɛtrɛ mɔɔrɔ-ɗoŋ-yiitoo nɛ reeta, nɛ mbiŋ taar in gun-aa taar mbɛt.

¹⁶«Ɓɛɛ nu tua zala tɛ duk nɛ mɛtrɛ mɔɔrɔ-ɗoŋ-naar. Zɔ̧ laa-kpe-nú-a tɛ duk nɛ tu̧ laa, gbɛ̧ laa, gbɛ̧ laa zóŋ-zóŋ in yɛm-yɛm laa nɛ wi-tok-laa dee tom-aa, o mbiŋ-a tɛ ya naar, in gun-aa naar.

¹⁷O mɔɔ-ga̧i-laa nɛ wa dee nɛ bu-mbɔi tɛ mɔi̧ o mbiŋ lɛŋ e nu ŋmaa. O boi-kɔk-mɔ lɛŋ tɛ duk nɛ́ bu-mbɔi, ɓɛɛ o gun-aa tɛ duk nɛ́ ndɛrɛ.

¹⁸Zi̧a̧ nú-zala tɛ duk nɛ mɛtrɛ ɓu-mɔɔrɔ, pɛsa-a tɛ duk nɛ mɛtrɛ ɓu-yiitoo-zua-mɔɔrɔ, ɓɛɛ kusa-a duka nɛ mɛtrɛ yiitoo nɛ reeta. O zɔ̧-laa kpe-nú-a lɛŋ tɛ duk nɛ yɛ́m-yɛ́m toka-zɔ̧-laa, ɓɛɛ o gun-aa tɛ duk nɛ́ ndɛrɛ.

¹⁹O nyɛk-de-tom in o te-mgboi-tua e nu tɛ duk nɛ ndɛrɛ.»

²⁰«Mɛ tɛ tɔ̧ ha̧ o be Israɛl mɛ ha̧ mbe gɛɗa nɔ̧́-tè-nɔ̧́ ha̧ mɛ wen ee wee, ha̧ wee mɛ ba mɛ ga̧a̧mɔ ɓɔnsɛnɛ.

²¹Arɔŋ in o bem kɔ‘i tɛ e wee tɛ lamba sɛn kɔ̧ tua-kpa-ŋmaa ti babir-laa nɛ kpe Kuɓa nɔɔ-tɔk, wen ha̧ wee mɛ ba mɛ ga̧a̧mɔ mɔ sa̧ nɛnɛ sɛn ti GASA WAN. Mɔ‘i nɛ ŋma heembea nɛ beka kaɗi na, wen o be Israɛl in o bezaŋ-wa kpoo nɛ kpoo.