Read Northwest Gbaya GBOA-A 29 Bible Online

GBOA-A 29 - Northwest Gbaya bible

GBOA-A 29

¹«Do-mɔ nɛ mɛ tɛ de ha̧ wa mɛ duk wi-ɗaf'am nɛ mɔ'ɔ: mɛ̀ bá daŋa wiwii-ndai in vala-sami yiitoo nɛ ŋma mɔ ɗaŋ tɛ-wa na,

²in o brɛt nɛ̀ hao bó sɛnɛ na, in o makala nɛ hao bo sɛnɛ na nɛ‘i ha̧na nɛ nɔ̧́, ká bá nɛ̀ o geɗek makala nɛ hao bo sɛnɛ na nɛ‘i sɔ̧ɔ̧ nɔ̧́ sɛnɛ, nɛ‘i dee nɛ fuu-alkamaari.

³Mɛ̀ káí wa lɛŋ a kɔ̧ gɛsɛ ɓɛɛ mɛ̀ há̧ wa ha̧‘m ŋgimbi nɛ mɛ tɛ ha̧ nɛ daŋa wiwii-ndai in o vala-sami yiitoo.

⁴«Mɛ̀ mgbɔ́ Arɔŋ in o bem kɔ‘i nɛnɛ si nu tua-kpa-ŋmaa, ɓɛɛ mɛ̀ zúí wa.

⁵Hɔ-ɗoŋ-aa, mɛ̀ káí o laa á̧ mɛ̀ á tɛ Arɔŋ, mɛ̀ pí̧ be gɔna laa nɛti, sɛka ɗuka gasa laa zu a̧, in laa nɛ‘i sa'e Efod, ba nɛ laa-kpe-yí-ŋguɗi, ɓɛɛ mɛ́ màrá kanda gasa laa sɛnɛ.

⁶Mɛ tɛ hɛr mɛtɛwol zu a̧, ɓɛɛ mɛ baa mɔ nɛ‘i yɔra'e, nɛ́ ko GASA WAN, gu sɛnɛ.

⁷Sɛka mɛ baa nɔ̧́-wan tɛn a zu a̧.

⁸«Mɛ̀ sá o bem ko Arɔŋ mbɛt, ɓɛɛ mɛ̀ á o be gɔna laa tɛ-wa.

⁹Mɛ̀ hɛ́r kanda ha̧ Arɔŋ in o bem kɔ‘i, ɓɛɛ mɛ̀ hɛ́r zu o bem kɔ̧-a̧ nɛ mɔɔ-hɛr-zu. Tom-ɗafa-sɔ̧ kɔ-wa tɛ duk nɛ heembea nɛ‘i beka gbin na, nɛ tɛ duk kpoo nɛ kpoo. Nɛ́ hegɔ‘i a̧ mɛ tɛ e nɛ Arɔŋ in o bem kɔ‘i ha̧ Sɔ̧.

¹⁰«Mɛ tɛ ba daŋa wiwii-ndai'i e nu tua-kpa-ŋmaa, ɓɛɛ Arɔŋ in o bem kɔ‘i aa er zu a̧.

¹¹Mɛ tɛ gɔn daŋa wiwii ndai'i ti GASA WAN mgbák nu tua-kpa-ŋmaa.

¹²Mɛ tɛ di̧ tɔk-aa nɛ er-mɛ, ɓɛɛ mɛ sɔ̧ɔ̧ tɛ zak nɛ duk fara-ɗafi-sɔ̧‘i, ɓɛɛ mɛ̀ gbáí oi tɔk-aa a gun fara-ɗafi-sɔ̧.

¹³Mɛ̀ káí nɔ̧́ nɛ yuɓuri zu nyak-zaŋ-aa in o wan mɛ ɗoŋ see-aa, o gbaazaa yiitoo nɛ oi nɔ̧́ ɗoŋ wa lɛŋ, ɓɛɛ mɛ́ dɔ̀ɔ́ sɛn fara-ɗafi-sɔ̧.

¹⁴Ɓɛɛ nɛ̀ ko kpoo daŋa wiwii-ndai'i, in ndàrá-a, ká bá nɛ̀ ɗɔr-aa, mɛ̀ nɛ́ɛ̀ dɔ́ ɗoŋ ye mɛ, wen i̧i̧ nɛ kpoo-ɗafi-sɔ̧ wen zu ɗaŋmɔ.

¹⁵«Mɛ tɛ ba kuti vala-sami mbɛt, ɓɛɛ Arɔŋ in o bem kɔ‘i aa er-wa zu a̧;

¹⁶mɛ tɛ gɔn vala-sami'i, ɓɛɛ mɛ misa̧ tɔk-aa zik nɛ fara-ɗafi-sɔ̧.

¹⁷Mɛ tɛ gba vala-sami'i tɛ fara naar; mɛ̀ fɔ́r zaŋ-aa, in o mbayo-a, ɓɛɛ mɛ̀ á zu wan nɛ‘i gbaa, in zu-a.

¹⁸Mɛ̀ dɔ́ kpoo sami'i lɛŋ zu fara-ɗafi-sɔ̧; mɔ‘i tɛ duk nɛ dɔɔ-kpoo-sɔ̧ ha̧ GASA WAN, tɛ duk nɛ de pɛr dɔɔ-nyɔŋmɔ ha̧ GASA WAN.

¹⁹«Mɛ tɛ ba yiitoo vala-sami'i, ɓɛɛ Arɔŋ in o bem kɔ‘i aa er-wa zu-a.

²⁰Mɛ tɛ gɔn vala-sami'i; mɛ tɛ duɓi tɔk-aa e ndɔŋ nu zer Arɔŋ in o bem kɔ‘i nɛ war wii-er; mɛ tɛ e tɔk'i tɛ gbogoto-er in gbogoto-naŋ-wa nɛ war wii-er mbɛt, ɓɛɛ mɛ misa̧ oi tɔk'i zik fara-ɗafi-sɔ̧.

²¹Mɛ tɛ ɗu tɔk nɛ duk zu fara-ɗafi-sɔ̧, mɛ̀ bá nɔ̧́-wan, ɓɛɛ mɛ misa̧ a tɛ Arɔŋ in laa kɔ̧-a̧ ká bá nɛ̀ o bem kɔ̧-a̧ mbɛt; hegɔ‘i, war-tɛ Arɔŋ in o bem kɔ‘i, ká bá nɛ̀ o laa kɔ-wa, tɛ sa̧.

²²«Mɛ̀ káí mɔ nɛ nɔ̧́ a̧a̧ sɛnɛ tɛ vala-sami'i, dom-aa, nɔ̧́ zu zaŋ-aa, nɔ̧́ see-aa, o gbaazaa-a yiitoo in nɔ̧́-a̧, in ku-a mɛ wiiko, wen vala-sami'i usi'e tom-ɗafa-sɔ̧ a̧a̧ er-wa.

²³Mɛ̀ bá brɛt alkamaari in makala kpɔk nɛ‘i ha̧na nɛ nɔ̧́, in be geɗek makala kpɔk kɔ̧ gɛsɛ nɛ duk ti GASA WAN.

²⁴Mɛ̀ é mɔɔ nɔ‘i lɛŋ er Arɔŋ in o bem kɔ‘i, ɓɛɛ mɛ̀ yɛ́k nɛ ha̧a̧mɔ ti GASA WAN.

²⁵Hɔ-ɗoŋ-aa, mɛ̀ káí mɔɔ nɔ‘i lɛŋ yinɛ er Arɔŋ in o bem kɔ‘i, ɓɛɛ mɛ̀ dɔ́ zu fara-ɗafi-sɔ̧ e zu dɔɔ-kpoo-sɔ̧. Mɔ‘i tɛ duk nɛ de pɛr dɔɔ-nyɔŋmɔ ha̧ GASA WAN.

²⁶«Mɛ̀ bá tote vala-sami ee-tom-er-wi, war ko Arɔŋ‘i, a̧ mɛ̀ yɛ́k ti GASA WAN; i̧i̧ tɛ duk nɛ war kɔ-mɛ.

²⁷«Mɛ tɛ tɔ̧‘e nde, tote vala-sami ko Arɔŋ in o bem, in ku-a nɛ‘i kaia a nɛtɛ, ka'i yɛk ha̧ GASA WAN, nɛ́ sa̧a̧ kpoo.

²⁸Mɔ‘i nɛ ŋma heembea nɛ tɛ duk ɓɔnsɛnɛ. War mɔ nɛ Arɔŋ in o bem kɔ‘i tɛ kpa er o be Israɛl nɛ mɔ‘i. Mɔ‘i nɛ ha̧a̧mɔ nɛ o be Israɛl tɛ ba e nɛtɛ zu ɗafa-sɔ̧-gaŋmɔ kɔ-wa. Mɔ‘i nɛ ha̧a̧mɔ nɛ wa tɛ e nɛtɛ ha̧ GASA WAN.

²⁹«Kà Arɔŋ bo na, wa tɛ kai laa kɔ̧-a̧ ha̧ o bem kɔ̧-a̧ mɛ a, wen tɛna nɔ̧́ a zu wa, wen dee tom-ɗafa-sɔ̧.

³⁰Bem ko Arɔŋ nɛ tɛ ba tom oi-aa wen ɗafa-sɔ̧ sɛn kɔ̧ tua-kpa-ŋmaa, kɔ̧ sa̧a̧-fara, tɛ pi̧ laa'i hegɔɔ zɛ mɔɔrɔ-ɗoŋ-yiitoo.

³¹«Mɛ tɛ ba kpoo sami wen ee tom-ɗafa-sɔ̧ er-wi, ɓɛɛ mɛ́ gìí kpoo-aa tɛ ŋmaa sa̧a̧ fara.

³²Arɔŋ in o bem kɔ‘i tɛ nyɔŋ kpoo sami in brɛt nɛ wa aa kɔ̧ gɛsɛ sɛn nu tua-kpa-ŋmaa.

³³Wa tɛ nyɔŋ mɔ nɛ wa ɗafa nɛ war-tɛ-wa, ŋgimbi nɛ wa ee nɛ tom ɗafa-sɔ̧ er-wa, e nɛ wa ha̧ Sɔ̧. Bíí nɛ̀ bó nɛ́ wi-ɗafi-sɔ̧ na beka nyɔŋ na, wen mɔ‘i nɛ sa̧a̧ nyɔŋmɔ.

³⁴Kà oi kpoo in brɛt ɔ mɔ sa̧, ɓɛɛ ɛ̀nɛ̀ gbáí oi-aa a tɛ wee. Bíí beka nyɔŋ oi-aa na, wén nɛ sa̧a̧ nyɔŋmɔ.

³⁵«Mɛ̀ dé mɔ‘i ha̧ Arɔŋ in o bem kɔ‘i hee mɔ'ɔ n'am usa ha̧ mɛ ga. Mɛ tɛ de mɔ‘i hegɔɔ zɛ mɔɔrɔ-ɗoŋ-yiitoo wen ee tom er-wa.

³⁶Wese kpɔk kpɔk, mɛ̀ gbɛ́ wiwii-ndai ɗafi nɛ sɔ̧ wen dee do-mɔ nɛ usi kpaa-ea-ɗaŋmɔ. Hegɔ‘i, mɛ tɛ de do kpaa ea-ɗaŋmɔ zu fara-ɗafi-sɔ̧, sɛka mɛ sɔ̧ɔ̧ nɔ̧́ sɛnɛ wen ea-a ha̧ Sɔ̧.

³⁷Tɛ zɛ mɔɔrɔ-ɗoŋ-yiitoo, mɛ tɛ ɗafi sɔ̧ wen kpaa ea-ɗaŋmɔ zu fara-ɗafi-sɔ̧, wen ha̧ fara'i mɛ duk nɛtɛ, nɛ sa̧a̧-a̧ mbɛt; kà ŋma mɔ fo fara'i, ɓɛɛ mɔ‘i sa̧a̧ mbɛt.»

³⁸«Kpoo nɛ mɛ tɛ dɔ sɛn fara-ɗafi-sɔ̧ nɛ mɔ'ɔ: be-sami yiitoo nɛ dee pɛ kpɔk, wese kpɔk kpɔk hegɔ kpoo nɛ kpoo.

³⁹Mɛ tɛ dɔ kpoo kuti sami'i mɛ tutuyɛ, ɓii-aa mɛ ga̧a̧mɔ.

⁴⁰Mɛ tɛ ha̧ kpoo kuti be-sami'i in kilo fuu alkamaari naar nɛ‘i vata nɛ mbe nɔ̧́, litrɛ kpɔk nɛ reeta, in zu-dɔ̧ɔ̧ tɛ litrɛ kpɔk nɛ reeta.

⁴¹Ɓɛɛ nɛ yiitoo be-sami'i, mɛ dɔ mɛ ga̧a̧mɔ, ɓɛɛ mɛ ha̧ o kpɔk ha̧a̧mɔ nɛ mɛ ha̧a̧ mɛ tutuyɛ, in zu-dɔ̧ɔ̧ mbɛt. Mɔ‘i nɛ de pɛr dɔɔ-nyɔŋmɔ ha̧ GASA WAN.

⁴²Yuwar dɔɔ-kpoo-sɔ̧ nɛ tɛ duk kpoo nɛ kpoo hɔ tɛ o bezaŋ-mɛ nɛ mɔ‘i. Mɔ‘i tɛ de nu tua-kpa-ŋmaa ti GASA WAN, fara n'am tɛ kpa'nɛ́ sɛnɛ wen tɔ̧ɔ̧ wen in'nɛ̀ɛ́.

⁴³Mi tɛ kpa o be Israɛl fara'i, ɓɛɛ gasamɔ kɔ‘m tɛ de ha̧ fara'i mɛ duk nɛ kɔ‘m.

⁴⁴Mi tɛ de ha̧ tua-kpa-ŋmaa in ha̧ fara-ɗafi-sɔ̧ mɛ ya nɛ sa̧a̧-a̧, ɓɛɛ Arɔŋ in o bem kɔ‘i tɛ ya nɛtɛ wen ɗafa'm.

⁴⁵Mi tɛ duk mgbara o be Israɛl, ɓɛɛ mi tɛ duk nɛ Sɔ̧ kɔ-wa.

⁴⁶Wa tɛ iŋ‘e, mi nɛ GASA WAN Sɔ̧ kɔ-wa nɛ mgbɔɔ so wa gbonɛ nu Egiptɛ. Nɛ́ mi GASA WAN a̧ duk nɛ Sɔ̧ kɔ-wa.»