Read Northwest Gbaya GBOA-A 30 Bible Online

GBOA-A 30 - Northwest Gbaya bible

GBOA-A 30

¹«Mɛ̀ ɗáfí fara-dɔ-fuu-nyama; mɛ̀ ɗáfí fara'i nɛ te akasia.

²Dura-a in pɛsa-a tɛ nyɛm ŋmaa tɛ reeta mɛtrɛ, ɓɛɛ kusa-a tɛ duk nɛ mɛtrɛ kpɔk; o zak mɛ mgbii-aa tɛ ndaɗi ŋmaa in a̧ kpɔk.

³Mɛ tɛ lati sa̧a̧ lɔr zik kpa nú-a in o zak sɛnɛ mbɛt lɛŋ.

⁴Mɛ tɛ dui kana-lɔr mɛ́ à ka̧ nú-a yiitoo wen pi̧i̧ te sɛnɛ gɔ nɛnɛ.

⁵Mɛ tɛ de te-gɔ-nɛnɛ‘i nɛ te akasia, ɓɛɛ mɛ sɔ̧ɔ̧ lɔr ɗoŋ wa.

⁶Mɛ̀ bá fara-dɔ-fuu-nyama e ti babir-laa nɛ gɔna ti kuɓa nɔɔ-tɔk. Babir-laa'i duk ti mɔɔ-kpe-nú kuɓa nɛ duk zu ta nɛ‘i yɔra gba̧a̧-wen nɔɔ-tɔk sɛnɛ‘i; nɛ́ fara'i a̧‘m tɛ kpa mɛ sɛnɛ.

⁷Arɔŋ tɛ dɔ fuu-nyama sɛnɛ mɛ tutuyɛ ɓɔnsɛnɛ ŋgimbi n'aa tɛ ɗafi o lamba.

⁸Ɓɛɛ ŋgimbi n'aa tɛ a o lamba mɛ ga̧a̧mɔ, a̧ tɛ dɔ fuu-nyama woyo. Ha̧a̧mɔ dɔɔ-fuu-nyama'i tɛ duk mgbara o be Israɛl kpoo nɛ kpoo sɛn ti GASA WAN.

⁹K’ɛ́nɛ́ dɔ ŋma fuu-nyama nɛtɛ zu a̧ na, kóó dɔɔ ŋma kpoo saɗi zu a̧ na; k’ɛ́nɛ́ ha̧ mɔ zu a̧, kóó tɛna dɔ̧ɔ̧ zu a̧ na mbɛt.

¹⁰War kpɔk tɛ pɛ kpɔk, Arɔŋ tɛ de do kpaa ea-ɗaŋmɔ zu zak fara-ɗafi-sɔ̧ nɛ tɔk tɛ saɗi n'aa ɗafa wen zu ɗaŋmɔ ko o bezaŋ‘nɛ́ mɛ ɗoŋ. À̧ a̧ dé hegɔ fara-ɗafi-sɔ̧‘i ɓɔnsɛnɛ; fara-ɗafi-sɔ̧‘i tɛ duk nɛ sa̧a̧-a̧ wen GASA WAN.»

¹¹GASA WAN tɔ̧ɔ̧ ha̧ Moisɛ:

¹²«Ŋgimbi nɛ mɛ tɛ tɔr o be Israɛl, ɓɛɛ o wan nɛ mɛ tɔra kaɗi a̧ yoɓi ŋma sede ha̧ GASA WAN gɔn nɛ zu duka-a kɔ-wa, wen ká ŋgamɔ tɛɛ tik zu wa ŋgimbi tɔra wa.

¹³Kóó o nde nɛ mɛ yɔra, a̧ ha̧ reeta kɔya-sede wan mɛ sa̧a̧-fara. Kɔya-sede sa̧a̧-fara tɛ kpa nɛ́ gera[12] ɓu-yiitoo. Sede nɛ wa tɛ ha̧‘i tɛ duk nɛ ko GASA WAN.

¹⁴O bíí lɛŋ nɛ wa tɔra, bíí nɛ a̧a̧ nɛ pɛ ɓu-yiitoo, kóó gana mbɛt, tɛ yoɓi kana sede'i ha̧ GASA WAN.

¹⁵Garama ko o wanmbɔi in ko o wisan nɛ wa tɛ gbo ha̧ GASA WAN wen gɔna zu wa nɛ tɛ-wa beka yak ŋmaa na.

¹⁶Sede gɔna-zu-bíí nɛ mɛ tɛ ba er o be Israɛl, mɛ̀ dé nɛ̀ tom tua-kpa-ŋmaa, wen ha̧ tɛ GASA WAN mɛ mbaŋ ɗoŋ o be Israɛl; ɓɛɛ mɔ‘i tɛ duk nɛ sede wen gɔna zu'nɛ́.»

¹⁷GASA WAN tɔ̧ɔ̧ ha̧ Moisɛ:

¹⁸«Mɛ̀ nɔ̧́í̧ ndɛrɛ ɓu nɛ kpánà in dek-a wen fɔra tɛ. Mɛ̀ bá a̧ e mgbara tua-kpa-ŋmaa in fara-ɗafi-sɔ̧, ɓɛɛ mɛ̀ á yì kɔ̧ a̧,

¹⁹wen ha̧ Arɔŋ in o bem kɔ‘i mɛ ɗu yì‘i wen taia-a nɛ er in fɔra-a nɛ naŋ.

²⁰Ŋgimbi nɛ wa tɛ ye tua-kpa-ŋmaa kóó nɛa-a si fara-ɗafi-sɔ̧ wen ɗaf'am, wa tɛ fɔr tɛ-wa sɛ, wen ká wa tɛɛ fe.

²¹Wa a̧ tai er-wa in fɔr naŋ-wa nɛti sɛ, wen ká wa tɛɛ fe. Mɔ‘i nɛ heembea nɛ tɛ duk wen Arɔŋ in o bezaŋ-aa kpoo nɛ kpoo.»

²²GASA WAN tɔ̧ɔ̧ ha̧ Moisɛ:

²³«Mɛ̀ hí̧fí o de pɛr nyama. Mɛ̀ hí̧fí yí-nyama nɛ‘i sa'e mir tɛ kilo mɔɔrɔ, in fuu-nyama nɛ‘i sa'e sinamɔn nɛ pɛr-aa nun nɛ de-a tɛ kilo yiitoo nɛ reeta, in de pɛr saɗa-te nɛ‘i sa'e kanɛl tɛ kilo yiitoo nɛ reeta.

²⁴Mɛ̀ hí̧fí nyama nɛ‘i sa'e kasɛ tɛ kilo mɔɔrɔ nyɛm ɗoŋ kilo wan mɛ sa̧a̧-fara in litrɛ nɔ̧́ te-nɔ̧́ mɔɔrɔ-ɗoŋ-kpɔk.

²⁵Mɛ tɛ mɔi̧ wa wen dea-a nɛ sa̧a̧ nɔ̧́-wan. Wi nɛ iŋa kpa̧i̧a̧ nɔ̧́ a̧ tɛ de mɔ‘i; nɔ̧́-nyama'i tɛ duk nɛ sa̧a̧ nɔ̧́-wan.

²⁶Mɛ̀ sɔ̧́ nɔ̧́‘i tɛ tua-kpa-ŋmaa in tɛ kuɓa nɔɔ-tɔk,

²⁷tɛ taŋe-nyɔŋ-mɔ, ká bá nɛ̀ o nyɛk-a lɛŋ, in dek-e-wee ká bá nɛ̀ o mɔɔ-ɗɔɔ-aa lɛŋ, in fara-dɔ-fuu-nyama,

²⁸fara-dɔ-kpoo-sɔ̧ in o nyɛk-a lɛŋ, in kpáná-ndɛrɛ in dek-a mbɛt.

²⁹Mɛ̀ é wa nɛtɛ ha̧ GASA WAN ha̧ wa mɛ duk nɛ sa̧a̧-a̧, ɓɛɛ mɔ nɛ tɛ fo tɛ-wa lɛŋ tɛ sa̧.

³⁰Mɛ tɛ tɛn nɔ̧́ a zu Arɔŋ in o bem kɔ‘i ha̧ wa mɛ duk nɛtɛ wen dee tom ɗaf'am.

³¹Ɓɛɛ mɛ̀ tɔ̧́ ha̧ o be Israɛl nde: ‹Nɔ̧́‘i nɛ́ sa̧a̧ nɔ̧́-wan nɛ tɛ duk nɛ kɔ‘m kpoo nɛ kpoo;

³²wi beka sɔ̧ nɔ̧́‘i tɛ bíí nɛ nú-tum na, wi beka de ŋma pɛrti nɔ̧́‘i na mbɛt; nɔ̧́‘i duk nɛ sa̧a̧-a̧ h’ɛ́nɛ́ mɛ kasi nɛ sa̧a̧-a̧ mbɛt.

³³Kóó o nde nɛ tɛ we dee pɛrti nɔ̧́‘i, kóó sɔ̧a̧-a̧ tɛ gee bíí, nɛ̀ bó nɛ́ wan-ɗafi-sɔ̧ na, wi tɛ fo a̧ yinɛ mgbara o bíí kɔ̧-a̧.› »

³⁴Ɓɛɛ GASA WAN tɔ̧ ha̧ Moisɛ: «Mɛ̀ bá o de pɛr nɔ̧́ nɛ‘i sa'e stɔrak, oniks, galbanum in o nyama nɛ pɛr-aa nun nɛ de-a ha̧ dɔka-a mɛ nyɛm ŋmaa.

³⁵Wi-de-nɔ̧́-nyama tɛ zaŋ wa nɛ ŋmaa in tɔŋ ha̧ mɛ duk nɛ de-a in nɛ sa̧a̧-a̧.

³⁶Mɛ̀ tó be ŋma nɛ fuu-aa, mɛ̀ á̧ ti kuɓa nɔɔ-tɔk, kɔ̧ tua-kpa-ŋmaa, fara n'am tɛ kpa mɛ sɛnɛ; mɔ‘i tɛ duk nɛ sa̧a̧-a̧ wen'nɛ́.

³⁷K’ɛ́nɛ́ de ŋma nɔ̧́-nyama mɛ sɔ̧ tɛ‘nɛ́ hee i̧i̧ ga na. Ɛ̀nɛ̀ íŋ‘e nɔ̧́-nyama'i duk nɛtɛ wen GASA WAN ɓɛɛ.

³⁸Bíí nɛ tɛ ɗafi pɛrti nɔ̧́-nyama'i wen nuna pɛr-aa gee, wi tɛ fo a̧ yinɛ mgbara o bíí kɔ̧-a̧.»