Read Northwest Gbaya GBOA-A 31 Bible Online

GBOA-A 31 - Northwest Gbaya bible

GBOA-A 31

¹GASA WAN tɔ̧ɔ̧ ha̧ Moisɛ:

²«Mi hoka Besalɛl, bem ko Urii, be-koo Hur tɛ zuduk ko Juda.

³Mi ha̧a̧ ɔmi ko Sɔ̧ ha̧ a̧ mɛ iŋ mgbara mɔ, ha̧ a̧ mɛ iŋ mɔ, in ha̧ a̧ mɛ iŋ dee mɔ lɛŋ zaŋnu.

⁴Hegɔ, a̧ tɛ nyɛm iŋa mgbara duia mɔ nɛ lɔr, bu-mbɔi in ndɛrɛ;

⁵a̧ tɛ iŋ mgbara sɛka o de ta nɛ gɛnɛ-a ɔ ŋgaya in sɛka te, in dee o tom nɛtɛ nɛtɛ.

⁶Mi ha̧a̧ Oholiab, bem ko Ahisamak, be zuduk ko Dan ha̧ a̧ mɛ gbak a̧, ɓɛɛ mi ha̧ iŋa-mgbara-mɔ ha̧ o wi-iŋ-mgbara-mɔ, ha̧ wa mɛ de mɔ lɛŋ n'am usa ha̧ mɛ mɛ de.

⁷O mɔɔ nɔ‘i nɛ: tua-kpa-ŋmaa, kuɓa nɔɔ-tɔk, in gu-zu-nu-a nɛ duk zu-a'i in o nyɛk nɛ ya kɔ̧ tua-kpa-ŋmaa lɛŋ,

⁸taŋe-nyɔŋ-mɔ in o nyɛk-a lɛŋ, dek-e-wee nɛ‘i dee nɛ lɔr in o mɔɔ-ɗɔɔ-aa lɛŋ; fara-dɔ-fuu-nyama mbɛt,

⁹fara-dɔ-kpoo-sɔ̧ in o nyɛk-a lɛŋ, kpáná-ndɛrɛ in dek-a,

¹⁰o laa tom-ɗafa-sɔ̧, laa nɛ‘i ee nɛtɛ ha̧ Arɔŋ wi-ɗafi-sɔ̧, o laa nɛ o bem kɔ̧-a̧ tɛ pi̧ wen dee tom-ɗafa'm,

¹¹nɔ̧́-wan in de pɛr nɔ̧́-nyama wen dɔa-a kɔ̧ sa̧a̧-fara-laa. Wa tɛ de mɔ lɛŋ nyɛm nɛ ɗoŋ mɔ n'am tɔ̧ɔ̧ ha̧ mɛ.»

¹²GASA WAN tɔ̧ɔ̧ ha̧ Moisɛ:

¹³«Mɛ̀ tɔ̧́ ha̧ o be Israɛl ndé, wa a̧ zɔk wese-ɔm-tɛ kɔ‘m nɛ de-a; wese-ɔm-tɛ duk nɛ gasamɔ mgbara'm in'nɛ̀ɛ́ ɓɔnsɛnɛ kpoo nɛ kpoo mɛ usi'e nɛ́ mi GASA WAN a̧ de ha̧ war-tɛ‘nɛ́ mɛ sa̧.

¹⁴Ɛ̀nɛ̀ zɔ́k wese-ɔm-tɛ nɛ de-a wen a̧ duk nɛ mɔ nɛ ɔ sa̧a̧ wen'nɛ́. Bíí nɛ gbin heembea wese-ɔm-tɛ, ɛ̀nɛ̀ gbɛ́ a̧ yinɛ; bíí nɛ de tom wese-ɔm-tɛ, ɛ̀nɛ̀ fó a̧ yinɛ mgbara o bíí kɔ̧-a̧.

¹⁵Ɛ̀nɛ̀ dé tom zɛ mɔɔrɔ-ɗoŋ-kpɔk; mɔɔrɔ-ɗoŋ-yiitoo-aa tɛ duk nɛ wese-ɔm-tɛ nɛ‘i ee nɛtɛ ha̧ GASA WAN. Wi tɛ gbɛ kóó o nde nɛ de tom wese-ɔm-tɛ yinɛ.

¹⁶O bem ko Israɛl tɛ kasi heembea wese-ɔm-tɛ hegɔ kpoo nɛ kpoo. Nɛ́ ŋma nɔɔ-tɔk nɛ beka kaɗi na.

¹⁷Wese-ɔm-tɛ tɛ duk mgbara'm in o be Israɛl ɓɔnsɛnɛ hee mɔɔ-usi-mɔ ga, wen GASA WAN dee yiwese in nu tɛ zɛ mɔɔrɔ-ɗoŋ-kpɔk, ɓɛɛ a̧ ɔm tɛ-a tɛ mɔɔrɔ-ɗoŋ-yiitoo zɛ.»

¹⁸GASA WAN kaɗa tɔ̧ɔ̧ wen in Moisɛ sɛn zu kaya Sinai, ɓɛɛ a̧ ha̧ ta-heembea yiitoo n'aa yɔra mɔ sɛnɛ nɛ er-a ha̧ Moisɛ.