Read Northwest Gbaya GBOA-A 32 Bible Online

GBOA-A 32 - Northwest Gbaya bible

GBOA-A 32

¹O bíí zɔka'e Moisɛ zir nɛ zu kaya nɛ haya-a na, nɛ mɔ'ɔ nɛ wa mɔi̧a sitɛ Arɔŋ, ɓɛɛ wa tɔ̧ ha̧ a̧: «Ɛ̀nɛ̀ dé k’ɛ́nɛ́ ŋma sɔ̧ nɛ tɛ yak ti h’ɛ́ɛ́, wen ɛɛ iŋ k’ɛɛ mɔ nɛ kpaa Moisɛ nɛ mgbɔɔ so ɛɛ gbonɛ nɛ Egiptɛ na.»

²Arɔŋ tɔ̧ɔ̧ ha̧ wa: «Ɛ̀nɛ̀ káí o mɔɔ-zer ko o kóò k’ɛ́nɛ́ in o bem k’ɛ́nɛ́ mɛ wiwii in okoo-a nɛ wa dee nɛ lɔr tɛnɛ ha̧‘m.»

³Dukbíí nɛ oi-aa lɛŋ kaia o mɔɔ-zer nɛ a̧a̧ zer-wa tɛnɛ ha̧ Arɔŋ.

⁴A̧ mɔi̧a mɔɔ nɔ‘i er-wa kaɗi, ɓɛɛ a̧ nɔ̧́í̧ dui nɛ be ndai. Ɓɛɛ wa gai mɔ: «Israɛl, o sɔ̧ kɔ-mɛ nɛ mgbɔɔ mɛ gbonɛ nú Egiptɛ nɛ mɔ'ɔ nɔ'ɔ!»

⁵Arɔŋ zɔka mɔ‘i, ɓɛɛ a̧ de fara-ɗafi-sɔ̧ e ti be ndai, ɓɛɛ a̧ he mbéá‘e: «Ɛnɛ tɛ de gbaŋa tu̧ nɛ tɛ GASA WAN mɛ sa̧a̧mɔ.»

⁶Mɔ sa̧a̧, ɓɛɛ wa dɔ kpoo ɗafi nɛ sɔ̧, ɗafi nɛ sɔ̧-gaŋmɔ mbɛt; o bíí yaa nyɔŋ nɛ mɔ, nɔ nɛ mɔ, sɛka wa biti kur mɛ de saa.

⁷GASA WAN tɔ̧ɔ̧ ha̧ Moisɛ: «Mɛ̀ zír bee, wen o bíí kɔ-mɛ nɛ mɛ mgbɔɔ so gbonɛ nɛ nú Egiptɛ yɔɔ kɔya-tɛ-wa kaɗi.

⁸Wa a̧ra̧ yuwar n'am usa so ha̧ wa mɛ ba'i! Wa duia be ndai nɛ lɔr, nɛ mɔ'ɔ nɛ wa gbɛɛ zugur-wa nu ti a̧ gasi nɛ a̧. Wa dɔɔ kpoo ɗafi nɛ a̧, ɓɛɛ wa tɔ̧‘e: ‹Israɛl, sɔ̧ kɔ-mɛ nɛ mgbɔɔ mɛ gbonɛ nɛ nú Egiptɛ nɛ mɔ'ɔ.› »

⁹GASA WAN tɔ̧ɔ̧ ha̧ Moisɛ: «Mi zɔka'e o wi nɔ'ɔ nɛ o wi-ŋgazu.

¹⁰Kinii, ká mɛ́ tɔ̧ kɔ-mɛ wen na; mɛ̀ é‘m ha̧ nyimsea kɔ‘m kur in wa; mi tɛ kum wa a nu gbuɗuk! Ɓɛɛ nɛ̀ war kɔ-mɛ, mi tɛ de ha̧ gasa dukbíí mɛ gbo nɛ tɛ-mɛ.»

¹¹Ɓɛɛ Moisɛ ga̧a̧ see GASA WAN Sɔ̧ kɔ‘i, tɔ̧ nɛnɛ: «GASA WAN, nyimsea k’ɛ́nɛ́ tɛ kur zu dukbíí k’ɛ́nɛ́ n’ɛnɛ mgbɔɔ so gbonɛ nɛ nú Egiptɛ zaŋ ŋgayamɔ in ŋgai k’ɛ́nɛ́ wen ge?

¹²Bo nɛ o be Egiptɛ tɛ tɔ̧‘e, ɛnɛ mgbɔɔ wa gbonɛ nú Egiptɛ nɛ gɔn-ta, h’ɛ́nɛ́ mɛ ɔr wa si zu kaya mɛ kum wa yinɛ zu nu’ɛ na nde? K’ɛ́nɛ́ de ŋga nyimsea k’ɛ́nɛ́ na, k’ɛ́nɛ́ pi̧ bɔnɛ zu dukbíí k’ɛ́nɛ́ na.

¹³Tɛ‘nɛ́ a̧ mbaŋ ɗoŋ o wi-de-tom k’ɛ́nɛ́ Abraham, Izak in Israɛl n’ɛnɛ tɔ̧ɔ̧ so ha̧ wa, kan nɛ mɔ nɛ nin'nɛ́‘e: ‹Mi tɛ de ha̧ o bezaŋ‘nɛ́ mɛ dɔk hee o sɔra mɛ yiwese ga, ɓɛɛ nù n'am tɔ̧ɔ̧ so wen-aa h’ɛ́nɛ́‘i tɛ duk nɛ ko o bezaŋ‘nɛ́ nɛ mɔɔ-oi kɔ-wa kpoo nɛ kpoo.› »

¹⁴Nɛ́ wen'i a̧ dee ha̧ GASA WAN mɛ kaɗi dee ŋgamɔ in o bíí kɔ‘i.

¹⁵Moisɛ zira zu kaya mɛ si ɗoŋ sitɛ o bíí kɔ‘i, nɛ o sɛka-ta-heembea yiitoo er-a, nɛ o yɔramɔ a̧a̧ zu wa nɛ mgbɔɔr in nɛ mgbɔɔr mbɛt.

¹⁶O sɛka-ta nɔ‘i, nɛ́ Sɔ̧'ɔ̧ dea; o yɔramɔ nɔ‘i, nɛ́ Sɔ̧'ɔ̧ yɔra.

¹⁷Josue zia hiɗamɔ nɛ o bíí hiɗi, ɓɛɛ a̧ tɔ̧ ha̧ Moisɛ: «Hiɗimɔ-biro a̧ de mɔ kɔ̧ gbagari k’ɛɛ‘i!»

¹⁸Moisɛ kifa nú ha̧ a̧: «Bo nɛ giti gima gbina-biro na, bo nɛ hiɗimɔ ko o bíí nɛ biro gana na mbɛt; hiɗimɔ n'am zii'i nɛ gima desee.»

¹⁹Nɛ̀ Moisɛ hɛɗa kɔ̧ gbagari, a̧ zɔka mboo be ndai in yɔyɛ nɛ o bíí yɔ. See Moisɛ nyima, ɓɛɛ siŋ o sɛka-ta-heembea nɔ‘i a nu gba ɗɛsɛ-ɗɛsɛ sɛn ká̧ naŋ kaya'i.

²⁰Nɛ mɔ'ɔ n'aa baa mboo be ndai'i nɛ wa dea'i, ɓɛɛ a̧ dɔ, hɔ̧n fuu-aa a ɗɔɔ yì ha̧ o be Israɛl mɛ nɔ.

²¹Moisɛ aka Arɔŋ: «O wi nɔ'ɔ dee nɛ ge in mɛɛ, sa mɛ fo gasa ɗaŋmɔ hegɔ pi̧ zu wa ge?»

²²Arɔŋ kifa nú: «K’ɛ́nɛ́ kpa tu̧u̧-see na, wen ɛnɛ iŋa, ɓan na, o wi nɔ'ɔ dee ɗaŋmɔ kaɗi.

²³Nɛ́ wa a̧ tɛɛ ak am nde, a̧‘m de ŋma sɔ̧ nɛ tɛ yak ti ha'i wen wi iŋ mɔ nɛ kpaa ɛ̧ɛ̧ Moisɛ'ɛ, wi nɛ mgbɔɔ wi gbonɛ nɛ nú Egiptɛ na.

²⁴Ɓɛɛ mi ak wa woyo'e, lɔr a̧a̧ er o nde? Nɛ̀ mɔ'ɔ nɛ wa ha̧a̧ o mɔɔ-zer-wa lɛŋ ha̧‘m, ɓɛɛ mi kai kɔ‘m a tɛ wee, nɛ mɔ'ɔ nɛ be ndai’ɛ gboo nɛnɛ'ɛ.»

²⁵Moisɛ zɔka'e, Arɔŋ ee o bíí ha̧ wa mɛ de mɔ nɛ see-wa kɔ̧a̧, ɓɛɛ wa ya nɛ mɔɔ-zɛkɛɗi ko o wisɛn kɔ-wa.

²⁶Moisɛ yora nu gbagari, ɓɛɛ tɔ̧: «O bíí ko GASA WAN a̧ tɛ pii tɛ‘m hɛ̧ɛ̧,» ɓɛɛ o bezaŋ Levii lɛŋ mɔi̧ pii katɛ a̧.

²⁷A̧ tɔ̧ɔ̧ ha̧ wa: «GASA WAN Sɔ̧ ko Israɛl‘e nde: Ɛ̀nɛ̀ hɛ́r gba-paa k’ɛ́nɛ́ guntir'nɛ́. Ɛ̀nɛ̀ ndɛ́n nɛ nu tua kpɔk kpɔk dam kɔ̧ gbagari lɛŋ, ɓɛɛ kóó o nde a̧ gbɛ nya-wi, sɛm kɔ‘i in nam kɔ‘i!»

²⁸O be Levii dee mɔ nyɛm nɛ ɗoŋ tɔ̧ɔ̧-wen ko Moisɛ; o be Israɛl nɛ wa gbɛɛ wese'i dee hee booro-taar ga.

²⁹Moisɛ tɔ̧a̧: «Ɛ̀nɛ̀ é tɛ‘nɛ́ ha̧ GASA WAN, kóó ɛnɛ ha̧a̧ nɛ bem k’ɛ́nɛ́, kóó nya'nɛ́ ha̧ GASA WAN wen ha̧ a̧ mɛ tok de yoŋgo zu'nɛ́.»

³⁰Mɔ sa̧a̧, ɓɛɛ Moisɛ tɔ̧ ha̧ dukbíí: «Ɛnɛ dee gasa ɗaŋmɔ nyɛmna! Ɓɛɛ kinii, mi tɛ daŋ sitɛ GASA WAN; ŋmafara mi tɛ kii ha̧ a̧ mɛ e ɗaŋmɔ k’ɛ́nɛ́ h’ɛ́nɛ́.»

³¹Moisɛ daŋa si ɗoŋ tɛ GASA WAN, ɓɛɛ tɔ̧: «O wi nɔ'ɔ dee gasa ɗaŋmɔ, wen wa mboo ŋma sɔ̧ nɛ lɔr.

³²Mi gɔma er h’ɛ́nɛ́ mɛ bi ɗaŋmɔ kɔ-wa yinɛ; kà bó hegɔ na, ɓɛɛ ɛ̀nɛ̀ bí nin-am yinɛ zaŋ kalata n’ɛnɛ yɔra.»

³³GASA WAN kifa nú ha̧ Moisɛ: «Nɛ́ bíí nɛ dee ɗaŋmɔ in am'i a̧‘m tɛ bi nin-a yinɛ zaŋ kalata kɔ‘m.

³⁴Mɛ̀ sí ɗoŋ kinii, mɛ̀ mgbɔ́ o bíí si fara n'am tɔ̧ɔ̧ ha̧ mɛ‘i; betom kɔ‘m tɛ yak ti ha̧ mɛ; ɓɛɛ wese n'am tɛ hɔ nɛnɛ tɛ o be Israɛl, mi tɛ usi bɔnɛ ha̧ wa oi ɗaŋmɔ kɔ-wa.»

³⁵GASA WAN usa bɔnɛ ha̧ o be Israɛl wen nɛ wa aka Arɔŋ mɛ mbo be ndai ha̧ wa nɛ lɔr.