Read Northwest Gbaya GBOA-A 33 Bible Online

GBOA-A 33 - Northwest Gbaya bible

GBOA-A 33

¹GASA WAN tɔ̧ɔ̧ ha̧ Moisɛ: «Mɛ̀ kúr fara’ɛ in o bíí nɛ mɛ mgbɔɔ so gbonɛ nɛ nú Egiptɛ, ɛ̀nɛ̀ yák sitɛ nu n'am tɔ̧ɔ̧ so ha̧ Abraham, Izak in Jakob kan nɛ mɔ‘e, mi tɛ ha̧ nu'i ha̧ o bezaŋ-wa.

²Mi tɛ tom betom kɔ‘m yak ti ha̧ mɛ, mi tɛ ndak o be Kanaŋ, o be Amɔr, o be Hit, o be Periz, o be Hiv in o be Jebus yinɛ;

³hegɔ ɛ̀nɛ̀ dáŋ sitɛ nu nɛ yibere in nɔ̧́-gɔrɔ fok sɛnɛ. War kɔ‘m, mi beka nɛ in'nɛ̀ɛ́ na, wen ɛnɛ nɛ o wi-ŋgazu, wen ká‘m tɛɛ kum'nɛ́ gbuɗuk a nu nɛ yuwar.»

⁴O zuduk bíí zia ŋga wen'i, ɓɛɛ wa zim mɔ; ŋma bíí a mbɔi tɛ na.

⁵GASA WAN tɔ̧ɔ̧ ha̧ Moisɛ: «Mɛ̀ tɔ̧́ ha̧ o bem ko Israɛl: Ɛnɛ o wi-ŋgazu nɔ'ɔ, kà‘m nɛ́ nɛɛ in'nɛ̀ɛ́, ɗoŋ-aa beka nyɛi̧ na, ɓɛɛ mi kuma'nɛ́ a nu gbuɗuk. Ɛ̀nɛ̀ kpɔ̧́í̧ o mbɔi-tɛ‘nɛ́ lɛŋ yinɛ, ha̧‘m iŋ mɔ n'am tɛ de in'nɛ̀ɛ́.»

⁶Ɓɛɛ o be Israɛl kpɔ̧i̧ o mbɔi-tɛ kɔ-wa yinɛ zu kaya Horɛb.

⁷Ŋgimbi nɛ o be Israɛl ba gbagari, ɓɛɛ Moisɛ nɛɛ nya̧i̧ sa̧a̧ tua-laa e nɛ ɗoŋ nɛ be nyɛi̧a-a, ɓɛɛ a̧ sa nin tua'i nde: «tua-kpa-ŋmaa.» Bíí lɛŋ nɛ kɔ̧ɔ̧ mɛ ak mɔ in GASA WAN gbo nɛ kɔ̧ gbagari, ɓɛɛ nɛɛ sitɛ Sa̧a̧ Tua-laa'i. Tua-kpa-ŋmaa (Gboa-a 33.7) [HK-77B]

⁸Ŋgimbi nɛ Moisɛ yak sitɛ tua-kpa-ŋmaa, ɓɛɛ o bíí lɛŋ kura yor nu tua kɔ-wa, mbaɗi nɛ ɗoŋ-aa hɔ ŋgimbi n'aa ye nɛ kɔ̧ a̧.

⁹Ŋgimbi nɛ Moisɛ ye tua-kpa-ŋmaa, ɓɛɛ tura-zan zira duk nu a̧; nɛ́ ŋgimbi'i a̧ GASA WAN tɔ̧ nɛ wen in Moisɛ.

¹⁰O bíí lɛŋ zɔka tura-zan nɛ zira duk zu nu Sa̧a̧ tua-kpa-ŋmaa, ɓɛɛ wa gbɛ zugur-wa nu nú tua kɔ-wa.

¹¹GASA WAN tɔ̧ɔ̧ nyɛrɛ in Moisɛ gbaayí nɛ gbaayí hee mɔ'ɔ nɛ bíí tɔ̧ nɛ nyɛrɛ in sɛm kɔ‘i’ɛ ga. Moisɛ sii ɗoŋ tɛ kɔ‘i, ɓɛɛ wi-gbak-a, ŋma be ŋgaiwi, Josue, bem ko Nun, duk kɔ‘i ɓɔn kɔ̧ Tua-kpa-ŋmaa.

¹²Moisɛ tɔ̧ɔ̧ ha̧ GASA WAN: «Ɛnɛ tɔ̧ɔ̧ ha̧‘m mɛ mgbɔ o bíí k’ɛ́nɛ́ daŋnɛ, ɓɛɛ ɛnɛ usi bíí nɛ tɛ duk in am na wen ge? Ɛnɛ baa tɔ̧ so'e, wi iŋa'm nɛ nin-am, ɓɛɛ mi dee tɛ-wi batɛ.

¹³Kà deemɔ kɔ‘m nɛ dee tɛ‘nɛ́ nɛ mbetɛ, ɛ̀nɛ̀ dé ha̧‘m mɛ iŋ yuwar k’ɛ́nɛ́; hegɔ‘i, mi tɛ iŋ‘nɛ́ kà dé ká‘m dee tɛ‘nɛ́ siti. Tɛ‘nɛ́'ɛ mbaŋ ɗoŋ-aa'e, o bíí nɔ'ɔ nɛ zuduk bíí k’ɛ́nɛ́.»

¹⁴GASA WAN kifa nú: «Mi tɛ nɛ nɛ tɛ‘m ha̧‘m mɛ ha̧ ɔma-tɛ ha̧ mɛ nde?»

¹⁵Moisɛ tɔ̧ɔ̧ woyo: «K’ɛ́nɛ́ tɛ́ nɛ̀ tɛ‘nɛ́ na, ɓɛɛ k’ɛ́nɛ́ de h’ɛ́ɛ́ mɛ yak fara’ɛ na.

¹⁶Wen mɔ nɛ tɛ usi ha̧‘m in dukbíí k’ɛ́nɛ́‘e, ɛɛ dee tɛ‘nɛ́ nɛ ge? Bo nɛ nɛa-a n’ɛnɛ tɛ nɛ in yɛɛ kpɔk'i na nde? Hegɔ‘i, mi in dukbíí k’ɛ́nɛ́, ɛɛ tɛ ya k’ɛɛ nɛtɛ mgbara o oi dukbíí nɛ ya zu nu’ɛ na nde?»

¹⁷GASA WAN tɔ̧ɔ̧ ha̧ Moisɛ: «Mi tɛ de mɔ nɛ mɛ aka er-am'i, wen mɛ dee tɛ‘m, in wen mi iŋa nin-mɛ mbɛt.»

¹⁸Moisɛ tɔ̧ɔ̧ ha̧ Sɔ̧: «Mi aia nú h’ɛ́nɛ́, ɛ̀nɛ̀ é ha̧‘m mɛ zɔk gasamɔ k’ɛ́nɛ́!»

¹⁹GASA WAN kifa nú: «Mi tɛ de ha̧ o demɔ kɔ‘m lɛŋ mɛ ɓir sɛn ti mɛ, ɓɛɛ mi saa nin GASA WAN ti mɛ mbɛt. Mi de demɔ ha̧ wi n'am kɔ̧a̧, ɓɛɛ mi dee ko ha̧ wi n'am kɔ̧a̧ mbɛt.»

²⁰GASA WAN tɔ̧ɔ̧ woyo: «Mɛ beka zɔk saŋa-yí‘m na, wen bíí beka zɔk yí‘m ɓɛɛ duka kpasa na.»

²¹GASA WAN tɔ̧a̧: «Mɛ̀ zɔ́k fara ka̧tɛ‘m hɛ̧ɛ̧. Mɛ̀ dúk zu ta.

²²Ɓɛɛ ŋgimbi nɛ gasamɔ kɔ‘m tɛ ɓir yak, mi tɛ e mɛ mgbara ta’ɛ, ɓɛɛ mi guu er-am yí-mɛ ŋgimbi yaka-a kɔ‘m.

²³Ŋgimbi n'am tɛ ba er-am yinɛ, ɓɛɛ mɛ tɛ zɔk nɛ ɗoŋ-am ɓɛɛ; nɛ war ko saŋa-yí‘m, wi nyɛm mɛ zɔk na.»