Read Northwest Gbaya GBOA-A 34 Bible Online

GBOA-A 34 - Northwest Gbaya bible

GBOA-A 34

¹GASA WAN tɔ̧ɔ̧ ha̧ Moisɛ: «Mɛ̀ sɛ́k o ŋma ta yiitoo hee kuti-a ga, ɓɛɛ mɛ̀ dáŋ pii tɛ‘m hɛ̧ɛ̧, wen ha̧‘m mɛ yɔr gba̧a̧-wen nɛ duka zu kuti-a, nɛ mɛ mbaŋa a nu'i sɛnɛ.

²Mɛ̀ ɗáfí mɔ, wen mɛ sa̧a̧mɔ mɛ tutuyɛ, mɛ tɛ daŋ zu kaya Sinai, ɓɛɛ mɛ pɛma'm hi̧i̧, mgbák zu-a'i.

³Ká ŋma bíí daŋ in mɛɛ na; ká bíí nɛ si zu kaya'i na mbɛt. Kóó o gasa mɔ-dai in geɗek-a mbɛt beka nyɔŋ mbɔɗi zɔ̧ ká̧ kaya'i na.»

⁴Moisɛ sɛka pɛsa ta yiitoo hee kuti-a ga, ɓɛɛ kai wa daŋ nɛnɛ si zu kaya'i tɛ gɔna ndaa-zan hee mɔ'ɔ nɛ GASA WAN tɔ̧ɔ̧ so ha̧ a̧ ga.

⁵GASA WAN zira nɛ tura-zan duk in a̧, ɓɛɛ GASA WAN sa nin wi: «GASA WAN.»

⁶Ɓɛɛ GASA WAN ɓir yi-a tɔ̧ nɛnɛ: «Mi nɛ GASA WAN, Sɔ̧ nɛ de demɔ in nɛ de ko. Mi de nyimsea nɛ haya-a na; mi yor ɗoŋ wen kɔ‘m yor, o ha̧a̧nú kɔ‘m hɔ gba̧a̧ hɔɔ.

⁷Mi kasi ha̧a̧nú kɔ‘m kasi wen o bezaŋ ɗoŋ ŋmaa booro, ɓɛɛ mi ee yɔɔ-kaya, ŋgazu in ɗaŋmɔ ko o bíí ha̧ wa mbɛt. Mɔ kpɔk, mi e ŋma ɗaŋmɔ yak gee na; mi e o bem in o bezaŋ ɗoŋ ŋmaa taar in naar gee na wen ɗaŋmɔ ko o dáà kɔ-wa.»

⁸Soɓee, Moisɛ gbɛɛ zugur nu ti GASA WAN, ɓɛɛ gasi a̧,

⁹tɔ̧ nɛnɛ: «GASA WAN, kà‘m nɛ dee tɛ‘nɛ́ nɛ mbetɛ, mi aia nú h’ɛ́nɛ́, ɛ̀nɛ̀ nɛ́ in yɛɛ. Dukbíí'ɛ nɛ o wi-ŋgazu; ɛ̀nɛ̀ é yɔɔ-kaya in ɗaŋmɔ k’ɛɛ h’ɛ́ɛ́, ɓɛɛ ɛ̀nɛ̀ é h’ɛ́ɛ́ mɛ ya nɛ o bíí k’ɛ́nɛ́.»

¹⁰GASA WAN tɔ̧ɔ̧ ha̧ Moisɛ: «Mi tɛ nɔ tɔk in o be Israɛl; mi tɛ de mɔɔ-gɔn-ɗɛɗɛ ti dukbíí kɔ-mɛ lɛŋ; wi tɛ zɔk pɛrti mɔ‘i zu nu’ɛ kóó tɛ o ŋma tugun bíí hɔ̧ɔ̧ na, ɓɛɛ o bíí nɛ ya zik mɛ tɛ zɔk'e tom ko GASA WAN, wan n'am tɛ de in mɛɛ, nɛ́ gasa mɔɔ-kíì.

¹¹Mɛ̀ kásí wen n'am tɔ̧ ha̧ mɛ sɔsɔɔ'ɛ. Mi tɛ ndak o be Amɔr, o be Kanaŋ, o be Hit, o be Periz, o be Hiv in o be Jebus yinɛ ti mɛ.

¹²Ká mɛ́ nɔ tɔk in o bíí tɛ nu nɛ mɛ daŋ si sɛnɛ‘i na, wen mɔ‘i tɛ duk nɛ pɛr nɛ tɛ ba mɛ.

¹³Ɛ̀nɛ̀ gbín fara-ɗafi-sɔ̧ kɔ-wa, o ta-zu-nu in o te nɛ wa gasi lɛŋ a nu.

¹⁴«Ká mɛ́ gu nu ti ŋma sɔ̧ na; wen nin GASA WAN nɛ ‹Wi-de-gɔya›, a̧ nɛ Sɔ̧-de-gɔya.

¹⁵Ká mɛ́ nɔ tɔk in o be nu'i na, wen ŋgimbi nɛ wa tɛ ɗafi sɔ̧ gasi nɛ o sɔ̧ kɔ-wa'i, ŋmafara wa tɛ sa mɛ, ɓɛɛ mɛ nyɔŋa kpoo nɛ wa ɗafa nɛ o sɔ̧ nɔ‘i.

¹⁶Kà mɛ̀ ba o boko-bem kɔ-wa nɛ kóò ha̧ o bem kɔ-mɛ, ɓɛɛ hee mɔ'ɔ nɛ okoo nɔ‘i tɛ wor sɔ̧ kɔ‘i ga, ŋmafara wa tɛ kii ha̧ o bem kɔ-mɛ mɛ wor nɛ o sɔ̧ nɔ‘i mbɛt.

¹⁷«Ká mɛ́ dui o ŋma mɔ de nɛ o ŋma sɔ̧ na.

¹⁸«Mɛ̀ kásí wese gbaŋa brɛt nɛ̀ hao bó sɛnɛ na. Tɛ zɛ mɔɔrɔ-ɗoŋ-yiitoo, mɛ tɛ nyɔŋ nɛ brɛt nɛ hao bo sɛnɛ na, hee mɔ'ɔ n'am tɔ̧ɔ̧ so ha̧ mɛ ga. Ŋgimbi'i tɛ duk nɛ zɛ sɔi-woo, wen nɛ́ tɛ zɛ‘i a̧ mɛ gboo so nɛnɛ nɛ nú Egiptɛ.

¹⁹«O kaya-mɔ lɛŋ nɛ kɔ‘m; kaya mɔ-dai kɔ-mɛ, kóó nɛ gasa-a kóó geɗek-a nɛ́ kɔ‘m.

²⁰Mɛ̀ gɔ́n zu kuti be tuifuu nɛ sami; kà mɛ̀ nɛ́ gɔna zu a̧ na, mɛ̀ gbín ger-a. Mɛ tɛ gɔn zu o kaya-bem kɔ-mɛ lɛŋ. Mɛ beka tɛ tɛ‘m nɛ gee er-mɛ na.

²¹«Mɛ̀ dé tom tɛ zɛ mɔɔrɔ-ɗoŋ-kpɔk, ɓɛɛ mɛ̀ ɔ́m tɛ-mɛ tɛ mɔɔrɔ-ɗoŋ-yiitoo zɛ, kóó nɛ ŋgimbi waa fɔ, kóó nɛ ŋgimbi mɔi̧a nyɔnɔ mbɛt.

²²«Mɛ̀ dé gbaŋa-zu-nyɔnɔ tɛ mɔi̧a kuti nyɔnɔ, ɓɛɛ mɛ dee gbaŋa-mɔi̧a-nyɔnɔ tɛ kaɗa pɛ.

²³«Tɛ pɛ kpɔk kpɔk, o wiwii lɛŋ tɛ mɔi̧ war taar ti GASA WAN Sɔ̧ ko o be Israɛl.

²⁴Mi tɛ ndak o ŋma tugun bíí yinɛ ti mɛ, ɓɛɛ mi dee ha̧ nu'i mɛ gasi siti, nɛ ŋma bíí beka a see nu kɔ-mɛ na; hegɔ‘i, mɛ tɛ nɛ ti GASA WAN Sɔ̧ kɔ-mɛ war taar zaŋ pɛ kpɔk.

²⁵«Kà mɛ̀ ɗaf'am nɛ kpoo, ká mɛ́ ba brɛt nɛ hao a̧a̧ sɛnɛ ɗafi nɛnɛ na. Mɛ beka e oi nyɔŋmɔ Paska ŋgɔn na mbɛt.

²⁶«Mɛ̀ bá kuti de zu-nyɔnɔ kɔ-mɛ nɛnɛ kɔ̧ Tua ko GASA WAN Sɔ̧ kɔ-mɛ, ɓɛɛ ká mɛ gi be gbadua nɛ yibere naa kɔ̧-a̧ na.»

²⁷GASA WAN tɔ̧ɔ̧ ha̧ Moisɛ: «Mɛ̀ yɔ́r wen nɔ'ɔ, wen mɔ‘i duk nɛ gun nɔɔ-tɔk n'am nɔɔ in mɛɛ, ká bá nɛ̀ Israɛl.»

²⁸Ɓɛɛ Moisɛ duk hi̧i̧ zɛ ɓu-naar in GASA WAN; a̧ nyɔŋ mɔ na, a̧ nɔ yi na mbɛt. Nɛ́ ŋgimbi'i a̧ a̧ yɔra nɛ wen nɔɔ-tɔk nɔ'ɔ ɓu’ɛ zu sɛka-ta.

²⁹Ŋgimbi zira-a ko Moisɛ nɛ zu kaya Sinai, a̧ kaia o sɛka-ta-heembea yiitoo er-a zir nɛnɛ, ɓɛɛ a̧ iŋ‘e sɔnti-a tok tok wen n'aa tɔ̧ɔ̧ wen in GASA WAN na.

³⁰Arɔŋ in o be Israɛl lɛŋ zɔka Moisɛ, ɓɛɛ wa dee kíì mɛ nɛ si katɛ a̧, wen sɔnti-a tok tok.

³¹Moisɛ saa wa, ɓɛɛ Arɔŋ in o gasawi nú-gara lɛŋ tɛɛ pii tɛ a̧, ɓɛɛ a̧ we ɗoŋ wen ha̧ wa.

³²Hɔ-ɗoŋ-aa, o be Israɛl lɛŋ mɔi̧a, ɓɛɛ a̧ we ɗoŋ o heembea lɛŋ nɛ GASA WAN ha̧a̧ zu kaya Sinai ha̧ wa.

³³Moisɛ wee ɗoŋ wen ha̧ wa kaɗi, ɓɛɛ a̧ kpe ŋma laa nɛ yí-a.

³⁴Ŋgimbi nɛ Moisɛ yee tua mɛ nɛɛ tɔ̧ wen in GASA WAN, a̧ baa laa'i yinɛ hɔ ŋgimbi n'aa gboo nɛnɛ kɔ̧ tua. Kà a̧ gbo kaɗi, ɓɛɛ a̧ wee ɗoŋ o heembea nɛ GASA WAN ha̧a̧ ha̧ a̧ ha̧ o be Israɛl.

³⁵O be Israɛl zɔka sɔnti Moisɛ fara toka-a, ɓɛɛ Moisɛ kpe laa nɛ sɔnti hɔ ŋgimbi n'aa tɛ ye tua woyo mɛ tɔ̧ wen in GASA WAN.