Read Northwest Gbaya GBOA-A 35 Bible Online

GBOA-A 35 - Northwest Gbaya bible

GBOA-A 35

¹Moisɛ mɔi̧a o be Israɛl lɛŋ, ɓɛɛ a̧ tɔ̧ ha̧ wa: «Mɔ nɛ GASA WAN kɔ̧ɔ̧ h’ɛ́ɛ́ mɛ de nɛ mɔ'ɔ:

²Ɛɛ tɛ de tom zɛ mɔɔrɔ-ɗoŋ-kpɔk, ɓɛɛ mɔɔrɔ-ɗoŋ-yiitoo zɛ tɛ duk nɛ mɔ nɛ‘i ee nɛtɛ, wen nɛ́ wese-ɔm-tɛ nɛ tɛ duk nɛ ko GASA WAN. Wi nɛ tɛ de tom wese'i, wi tɛ gbɛ a̧ yinɛ.

³Fara lɛŋ n’ɛnɛ a̧a̧ sɛnɛ, ɛnɛ beka ye wee wese-ɔm-tɛ na.»

⁴Moisɛ tɔ̧ɔ̧ ha̧ o duk be Israɛl lɛŋ: «Wen’ɛ nɛ wen ko GASA WAN.

⁵Ɛ̀nɛ̀ há̧ zu demɔ k’ɛ́nɛ́ ha̧ GASA WAN; wi nɛ a̧a̧ nɛ desee mɛ ha̧ mɔ ha̧ GASA WAN nyɛma mɛ ha̧ lɔr, bu-mbɔi in ndɛrɛ,

⁶o tu̧ zɔ̧-laa, o gbɛ̧ laa, o gbɛ̧-a̧ zóŋ-zóŋ, o yɛ́m-yɛ́m laa in laa buma gbadua,

⁷ndàrá vala sami nɛ‘i gbɛ̧ɛ̧ gbɛ̧ɛ̧, o ŋga ndàrá in o te akasia,

⁸nɔ̧́-e-wee, nyama a ɗɔɔ nɔ̧́-wan, fuu-nyama wen dɔa-a,

⁹de toka ta kɛn-kɛn in o de ŋga ta-a-nu laa nɛ‘i sa'e Efod in nu laa-kpe-yí-ŋguɗi.

¹⁰«O wi-iŋ-mgbara-mɔ mgbara'nɛ́ a̧ gar tɛnɛ wen dee tom nɛ GASA WAN tɔ̧ nɛnɛ‘i:

¹¹sa̧a̧-fara in tua-kpe-zu-a, in mɔɔ-kpe-ɗoŋ-aa mbɛt, o boi-kɔk-mɔ, o mɔɔ-tɔna-a, o gaŋgala, o mbiŋ in o gun-wa,

¹²kuɓa in o mɔɔ-gɔa-a, mɔɔ-kpe-nú-a in babir-laa;

¹³taŋe-nyɔŋ-mɔ in o mɔɔ-gɔa-a, o nyɛk-a lɛŋ, in brɛt wen ha̧a̧ ha̧ Sɔ̧,

¹⁴dek-e-wee in o nyɛk-a, o lamba in o nɔ̧́-a̧,

¹⁵fara-dɔ-fuu-nyama in o mɔɔ-gɔa-a, nɔ̧́-wan, fuu-nyama wen dɔa-a in babir-laa kpe nu sa̧a̧-fara,

¹⁶fara-dɔ-kpoo-sɔ̧, fana-ndɛrɛ yí-a, te-gɔa-a in o nyɛk-a, kpáná-ndɛrɛ in dek-a mbɛt;

¹⁷o laa-nú-zala, o mbiŋ-a in o gun-wa, in laa-ga̧i̧-nu-a;

¹⁸o te-mgboia-a, o te-mgboi nú-zala in o nyak-aa,

¹⁹o laa ko o wi-de-tom sɛn sa̧a̧-fara, in o de laa nɛ‘i ee nɛtɛ wen Arɔŋ wi-ɗafi-sɔ̧ in o bem kɔ̧-a̧ nɛ wa tɛ pi̧ wen ɗafa sɔ̧.»

²⁰O be Israɛl lɛŋ pɛsa e Moisɛ duk.

²¹Bíí nɛ kpɛka nɛ ta-tɛ nɛ ee see sɛnɛ mbɛt mɔi̧a mɔɔ nɔ‘i tɛnɛ ha̧ GASA WAN, wen dee tua-kpa-ŋmaa in o tom-aa lɛŋ, ká bá nɛ̀ tom-fura-laa ko o wi-ɗafi-sɔ̧.

²²O wiwii in o okoo maa yi nɛɛ kai o mɔɔ-zer, o wele, o mɔɔ-pi̧-ger, o kana-lɔr, in o mɔ nɛ wa dee nɛ lɔr nɛtɛ nɛtɛ, kóó o nde kaia mɔ‘i tɛnɛ wɛk ti GASA WAN.

²³O wi nɛ a̧a̧ so nɛ tu̧ zɔ̧-laa, gbɛ̧ zɔ̧-laa, gbɛ̧ laa zóŋ-zóŋ, yɛ́m-yɛ́m laa, buma gbadua, ndàrá vala sami nɛ‘i gbɛ̧ɛ̧, o ŋga ndàrá, wa kaia tɛnɛ ha̧ GASA WAN.

²⁴O wi nɛ tɛ ha̧ kɔ‘i nɛ bu-mbɔi in ndɛrɛ ha̧ GASA WAN kaia tɛnɛ mbɛt. O wi-kai-te akasia kaia tɛnɛ wen o tom lɛŋ;

²⁵o okoo lɛŋ nɛ iŋa toka laa kaia o mɔ nɛ wa toka tɛnɛ; o tu̧ zɔ̧-laa, o gbɛ̧ laa, in o gbɛ̧-a̧ zóŋ-zóŋ in o yɛ́m-yɛ́m-a.

²⁶O okoo lɛŋ nɛ iŋa mgbara toka buma gbadua toka.

²⁷O gasawi saaye kaia o ta nɛ tok tok kɛn-kɛn tɛnɛ, o ŋma ta wen aa-a nu laa nɛ‘i sa'e Efod in laa kpe-yí-ŋguɗi.

²⁸Wa kaia nɔ̧́-nyama in o nɔ̧́ lamba in o nɔ̧́-wan, ká bá nɛ̀ o fuu-nyama wan mɛ dɔa-a tɛnɛ.

²⁹O wiwii in o okoo, o be Israɛl lɛŋ nɛ tɛa mɛ ha̧ mɔ tɛ tom nɛ GASA WAN tɔ̧ɔ̧ so wen-aa nɛ nu Moisɛ ha̧a̧ mɔ; mɔɔ nɔ‘i nɛ́ o be Israɛl a̧ mɔi̧a ha̧ GASA WAN nɛ desee.

³⁰Moisɛ tɔ̧ɔ̧ ha̧ o be Israɛl: «GASA WAN hoka Besalɛl bem ko Urii, be-koo Hur tɛ zuduk ko Juda.

³¹Sɔ̧ ha̧a̧ taamɔ kɔ‘i ha̧ a̧ mɛ kpa iŋa-mgbara-mɔ in iŋa dee tom zu nu lɛŋ,

³²wen dee o de tom nɛ lɔr, nɛ bu-mbɔi, nɛ ndɛrɛ,

³³o tom-sɛka-ta wen aa-a nu laa, sɛka te, in o ŋma tom nɛtɛ nɛtɛ.

³⁴GASA WAN ha̧a̧ iŋa usamɔ ha̧ a̧, in ha̧ Oholiab, bem ko Ahisamak zuduk ko Dan wen usa yuwar tom'i ha̧ o ŋma bíí.

³⁵A̧ ha̧a̧ iŋa-mgbara-mɔ ha̧ wa wen iŋa dee tom nɛtɛ nɛtɛ: tom-sɛka-mɔ, tom-gɔna-dap-mɔ, tom-toka tu̧ zɔ̧-laa, gbɛ̧ zɔ̧-laa, in gbɛ̧-a̧ zóŋ-zóŋ, tom toka yɛm-yɛm laa in o gee tom-toka-laa. Wa iŋa tom-sɛka-mɔ in gɔna-dap-mɔ lɛŋ.