Read Northwest Gbaya GBOA-A 36 Bible Online

GBOA-A 36 - Northwest Gbaya bible

GBOA-A 36

¹«Besalɛl, Oholiab in o wi nɛ GASA WAN ha̧a̧ iŋa-mgbara-mɔ in iŋamɔ ha̧ wa wen dee tom sa̧a̧-fara tɛ de mɔ lɛŋ nɛ GASA WAN ha̧a̧ nú sɛnɛ.»

²Moisɛ saa Besalɛl, Oholiab in o wi-de-tom nɛ GASA WAN ha̧a̧ iŋa-mgbara-mɔ ha̧ wa; o wi nɔ‘i lɛŋ ha̧a̧ tɛ wen dee tom'i.

³Wa kaia o mɔ nɛ o be Israɛl ndɛma wen dee sa̧a̧-fara lɛŋ sɛn er Moisɛ; ɓɛɛ zu-a'i, o be Israɛl a̧ kai kana mbe ha̧a̧mɔ nɛnɛ ha̧ Moisɛ mɛ tutuyɛ ɓɔnsɛnɛ‘i.

⁴O wi-iŋ-dee-tom'i nɛ yaa de nɛ tom-aa nɛtɛ nɛtɛ ee tom duk nɛɛ kpa Moisɛ,

⁵ɓɛɛ tɔ̧: «O bíí kai nɛ mɔ tɛnɛ nɛ dɔka-a gan mɔ nɛ GASA WAN aka ha'i mɛ ha̧.»

⁶Ɓɛɛ Moisɛ tɔ̧ ha̧ wa mɛ he mbe-a kɔ̧ gbagari: «Ká wiwii in o okoo ba ŋma mɔ tɛnɛ wen dee sa̧a̧-fara ɓɔna,» ɓɛɛ o bíí kaɗi ha̧a̧ mɔ.

⁷O mɔɔ-de-tua nɛ wa kaia nɛnɛ nyɛma kaɗi, oi-aa ɓɔna mbɛt.

⁸O wi-de-tom nɛ iŋa tom nɛ de-a dee fara-duk ko Sɔ̧ nɛ yɛ́m-yɛ́m zɔ̧-laa ɗoŋ ŋmaa ɓu, nɛ tu̧ zɔ̧-laa, nɛ gbɛ̧ zɔ̧-laa in nɛ gbɛ̧-a̧ zóŋ-zóŋ, ɓɛɛ wa gɔn dap keribim sɛnɛ.

⁹Zi̧a̧ laa'i kpɔk nɛ mɛtrɛ ɓu-zua-naar, pɛsa-a nɛ mɛtrɛ yiitoo; o laa nɔ‘i lɛŋ tɛ ba nɛ kpɔk dura-a in pɛsa-a hee ŋmaa ga.

¹⁰Ɓɛɛ wa fur o laa nɔ‘i mɔɔrɔ mɔɔrɔ e nu ŋmaa.

¹¹Wa kpoo bolo-a nɛ tu̧ nyak e nu kuti mɔi̧a zɔ̧-laa, ɓɛɛ wa de kalemɔ‘i mbɛt e nu yiitoo mɔi̧a zɔ̧-laa.

¹²Wa kpoo o bolo ɓu-mɔɔrɔ nu yiitoo-aa. O bolo-a yaa nyɛm ŋmaa.

¹³Wa dee boi-kɔk-mɔ ɓu-mɔɔrɔ nɛ lɔr ye nɛ o nu laa nɔ‘i ndaɗi nɛ ŋmaa wen ha̧ mɛ ndaɗi tua-laa'i mɛ duk kpɔk.

¹⁴Nɛ mɔ'ɔ nɛ wa dee o zɔ̧-laa nɛ buma gbadua wen kpea-a nɛ zu fara-duk ko Sɔ̧; o zɔ̧-laa nɔ‘i nɛ ɓu-zua-kpɔk.

¹⁵Dura zɔ̧-laa'i nɛ mɛtrɛ ɓu-zua-mɔɔrɔ, pɛsa-a nɛ mɛtrɛ yiitoo; dura o laa nɔ‘i ɓu-zua-kpɔk'i in o pɛsa wa hee ŋmaa ga.

¹⁶Wa fura o zɔ̧-laa nɔ‘i mɔɔrɔ e nu ŋmaa, ɓɛɛ wa fur oi zɔ̧-laa e nu ŋmaa mbɛt.

¹⁷Wa kpoo bolo ɓu-mɔɔrɔ e nu kuti mɔi̧a zɔ̧-laa, ɓɛɛ wa de kalemɔ‘i tɛ yiitoo mɔi̧a zɔ̧-laa.

¹⁸Ɓɛɛ wa de boi-kɔk-mɔ ɓu-mɔɔrɔ nɛ ndɛrɛ wen kɔka-a nɛ laa'i ha̧ mɛ ndaɗi tua'i mɛ duk kpɔk.

¹⁹Wa ɗafa gbɛ̧ ndàrá vala sami mɛ kpe nɛ zu tua'i in ŋma ŋga ndàrá wen pi̧a-a̧ ɗoŋ-aa.

²⁰Wa dee o gaŋgala nɛ te akasia, ɓɛɛ wa ba e ŋgɔn.

²¹Dura o te nɔ‘i nɛ mɛtrɛ mɔɔrɔ, pɛsa-a nɛ reeta mɛtrɛ nɛ ŋma mɔ zu-a.

²²Wa dee sara yiitoo nyɛm ŋmaa e ɗɔɔ o gaŋgala kpɔk kpɔk dam lɛŋ.

²³Wa dee o gaŋgala ɓu-yiitoo mɛ zɔk mɔ si ká̧-zan-mɛ́-ɗɔɔ nɛ war Nɛgɛb.

²⁴Wa dee gun-aa ɓu-naar nɛ bu-mbɔi, ɓɛɛ wa a gun-aa yiitoo yiitoo ɗɔɔ o gaŋgala kpɔk kpɔk dam nɛ sara lɛŋ.

²⁵Wa dee o gaŋgala ɓu-yiitoo mbɛt a nɛ mgbɔɔr si war ká̧-zan-mɛ́-ŋgɔn,

²⁶ɓɛɛ wa de o sara ɓu-naar nɛ bu-mbɔi a nɛnɛ yiitoo yiitoo ɗɔɔ o gaŋgala.

²⁷Wa aa o gaŋgala mɔɔrɔ-ɗoŋ-kpɔk ndaa-tua nɛ war yee-wese.

²⁸Wa dee o ŋma o gbaŋ yiitoo wen pi̧a̧-a̧ nɛ mgbii-aa.

²⁹O gbaŋ nɔ‘i nyɛi̧a nɛ ŋmaa nɛ gun-aa, ɓɛɛ wa yee ŋmaa nɛ war ŋgɔn kɔ̧ kuti koe. Wa dee hegɔ wen o gaŋgala nɔ‘i yiitoo'i.

³⁰O gaŋgala mɛ mgbii-aa nɛ́ mɔɔrɔ-ɗoŋ-taar nɛ‘i dee gun wa nɛ bu-mbɔi, gun-aa yiitoo yiitoo tɛ fara mɔɔrɔ-ɗoŋ-taar.

³¹Wa dee o be-saŋ mɔɔrɔ nɛ o te akasia wen gita-a zu o gaŋgala nɛ war mgbɔɔr.

³²O ŋma mɔɔrɔ woyo wen gita-a zu o gaŋgala nɛ war mgbɔɔr mbɛt, ɓɛɛ oi-aa mɔɔrɔ wen gita-a zu o gaŋgala mɛ ndaa tua si war yee-wese.

³³Wa gita ŋma kpaakpee see-a nɛ nú-a hegɔ gɔm ndaa-a mɛ.

³⁴Wa sɔ̧ɔ̧ lɔr ɗoŋ o gaŋgala nɔ‘i, ɓɛɛ wa a o koe lɔr nú-a, ɓɛɛ wa sɔ̧ lɔr ɗoŋ o gaŋgala nɛ tɛ ye kɔ̧ o koe nɔ‘i mbɛt.

³⁵Nɛ mɔ'ɔ nɛ wa dee ŋma babir-laa nɛ tu̧ zɔ̧-laa, nɛ gbɛ̧ zɔ̧-laa, nɛ gbɛ̧-a̧ zóŋ-zóŋ in nɛ yɛ́m-yɛ́m laa, ɓɛɛ wa gɔn dap keribim sɛnɛ nɛ de-a.

³⁶Wa dee o mbiŋ naar nɛ te akasia, ɓɛɛ wa sɔ̧ lɔr sɛnɛ, in o boi-kɔk-mɔ lɔr; bɛɛ wa dui bu-mbɔi de nɛ gun-aa naar mbɛt.

³⁷Wa dee laa-kpe-nú tua nɛ tu̧ zɔ̧-laa, nɛ gbɛ̧ zɔ̧-laa, nɛ gbɛ̧-a̧ zóŋ-zóŋ in yɛ́m-yɛ́m laa, ɓɛɛ nɛ́ wi-tok-laa a̧ dee tom-aa.

³⁸Wa dee o mbiŋ mɔɔrɔ in o boi-kɔk-mɔ, o gan-ndui, in o mɔɔ-ga̧i-laa. Wa sɔ̧ɔ̧ lɔr ɗoŋ mɔɔ nɔ‘i lɛŋ, ɓɛɛ wa de gun-aa mɔɔrɔ nɛ ndɛrɛ.