Read Northwest Gbaya GBOA-A 37 Bible Online

GBOA-A 37 - Northwest Gbaya bible

GBOA-A 37

¹Besalɛl dee kuɓa nɛ te akasia. Dura-a nɛ mɛtrɛ kpɔk nɛ ŋma mɔ zu-a, pɛsa-a nɛ reeta mɛtrɛ nɛ ŋma mɔ zu-a, kusa-a mbɛt nɛ reeta mɛtrɛ nɛ ŋma mɔ zu-a.

²A̧ sɔ̧ɔ̧ sa̧a̧ lɔr nɛ kɔ̧ a̧, ɓɛɛ a̧ mbo be lɔr zik nɛ nú-a lɛŋ.

³A̧ duia kana naar nɛ lɔr a dam naŋ kuɓa'i, yiitoo nɛ mgbɔɔr, yiitoo nɛ mgbɔɔr mbɛt.

⁴A̧ ɗafa o ɓira-te akasia ɓɛɛ sɔ̧ ɗoŋ-aa lɛŋ nɛ lɔr.

⁵A̧ yura te nɔ‘i kɔ̧ o kana ká̧ kuɓa wen gɔa-a.

⁶A̧ ɗafa mɔɔ-gu-zu-a nɛ lɔr, dura-a nɛ mɛtrɛ kpɔk nɛ ŋma mɔ zu-a, pɛsa-a nɛ reeta mɛtrɛ nɛ ŋma mɔ zu-a,

⁷ɓɛɛ a̧ de o keribim yiitoo nɛ lɔr a ká̧ nu mɔɔ-kpe-nú-a nɛ mgbɔɔr, in nɛ mgbɔɔr.

⁸A̧ ee keribim kpɔk nɛ ká̧ nú-a kpɔk, ɓɛɛ ɓii-aa duk nɛ ɓii ká̧ nú-a; wa nɔi̧a o keribim nɔ‘i ndaɗi sɛn zu mɔɔ-kpe-nú-a'i.

⁹O keribim nɔ‘i nyara ɓaa-wa kpe nɛ zu mɔɔ-kpe-nú kuɓa. Wa yora tan nɛ ŋmaa, zɔk nɛ mɔɔ-kpe-nú kuɓa.

¹⁰A̧ dee taŋe-e-nyɔŋ-mɔ nɛ te akasia. Dura-a nɛ mɛtrɛ kpɔk, pɛsa-a nɛ reeta mɛtrɛ, ɓɛɛ kusa-a nɛ reeta mɛtrɛ nɛ ŋma mɔ zu-a.

¹¹A̧ yɔka ɗoŋ-aa nɛ sa̧a̧ lɔr, ɓɛɛ a̧ mbo be lɔr zik nɛ nú-a lɛŋ.

¹²A̧ dee o ndota nú-a nɛ lɔr, pɛsa-a hee ŋgɛɗɛ-er-wi ga si ŋgɔn, ɓɛɛ a̧ ɓo lɔr zik nɛ nú-a.

¹³A̧ nɔi̧a lɔr de nɛ kana naar, ɓɛɛ a̧ a dam mgbii-aa naar'i.

¹⁴O kana nɔ‘i yaa mgbii-aa ha'i mɛ a o te sɛnɛ wen gɔa-a.

¹⁵A̧ dee o ŋma dura te akasia, ɓɛɛ a̧ sɔ̧ lɔr ɗoŋ-aa, wen gɔa-a nɛ taŋe-nyɔŋ-mɔ.

¹⁶A̧ dee o nyɛk nɛ sa̧a̧ lɔr wen aa-a zu taŋe-nyɔŋmɔ, o tasi, o be ɗele, o ɓii in o be yee wen tɛna-a nɛ zu dɔ̧ɔ̧ a nu.

¹⁷Besalɛl dee dek-e-wee nɛ sa̧a̧ lɔr; a̧ duia dek-e-wee, naŋ-a in gun-aa, o be yee kɔ̧ a̧, o kpoi-a in o dap-aa nɛ ya kpɔk in a̧.

¹⁸Gbaa-er-a mɔɔrɔ-ɗoŋ-kpɔk, taar a̧ra̧ si mgbɔɔr, taar si mgbɔɔr.

¹⁹Tɛ gbaa-er-a kpɔk, a̧ dee o be-yee taar hee gba̧a̧ ndɛŋgɛ ga, nɛ o kpoi-a, in o dap-aa. Ɓɛɛ tɛ yiitoo gbaa-er-a, a̧ dee o be-yee taar hee gba̧a̧ ndɛŋgɛ ga, nɛ o kpoi-a in o dap-aa, hegɔ dam nɛ o gbaa-er-a mɔɔrɔ-ɗoŋ-kpɔk lɛŋ.

²⁰Kiitɛ dek-e-wee‘i a̧a̧ nɛ be yee naar hee gba̧a̧ ndɛŋgɛ ga, nɛ kpoi-a a̧a̧ sɛnɛ in o dap-aa mbɛt.

²¹Yuwar-a duka hee mɔ'ɔ ga: kpoi-a kpɔk duk ɗɔɔ kuti gbaa-er dek-e-wee yiitoo; nɛ́ kalemɔ‘i à̧ dea wen o gbaa-er-a yiitoo yiitoo dam wa mɔɔrɔ-ɗoŋ-kpɔk'i lɛŋ.

²²O kpoi-a in o gbaa-er-a ndaɗa ŋmaa kpɔk in kiitɛ-a; a̧ mboɗa wa dui kpɔk nɛ sa̧a̧ lɔr.

²³A̧ dee o lamba mɔɔrɔ-ɗoŋ-yiitoo a sɛnɛ, gu nɛ o mɔɔ-ɓam-mɔ in o nyɛk-a-bùk, lɛŋ nɛ sa̧a̧ lɔr.

²⁴A̧ baa nɛ kilo fuu lɔr ɓu-taar-zua-mɔɔrɔ de nɛ dek-e-wee in o nyɛk-a lɛŋ.

²⁵A̧ ɗafa fara-dɔ-fuu-nyama nɛ te akasia; dura-a in pɛsa-a nyɛma ŋmaa tɛ reeta mɛtrɛ, ɓɛɛ kusa-a duk nɛ mɛtrɛ kpɔk. Ɓɛɛ o zak ká̧ a̧ duk kpɔk in a̧.

²⁶A̧ sɔ̧ɔ̧ sa̧a̧ lɔr ɗoŋ-aa in kɔ̧ a̧ pii tɛ o zak nɔ‘i mbɛt, ɓɛɛ a̧ ɓo ŋma lɔr nɛ nú-a hegɔɔ zik kpa.

²⁷A̧ duia o kana lɔr e ká̧ nu fara-dɔ-fuu-nyama'i nɛ mgbɔɔr nɛ mgbɔɔr, wen aa o te gɔa-a sɛnɛ.

²⁸A̧ dee o te-gɔa-a nɔ‘i nɛ te akasia, ɓɛɛ a̧ sɔ̧ ɗoŋ-aa nɛ lɔr.

²⁹A̧ ɗafa sa̧a̧-nɔ̧́, ɓɛɛ a̧ de pɛr fuu-nyama wen dɔa-a; mɔ‘i nɛ tom ko wi-de-nyama.