Read Northwest Gbaya GBOA-A 38 Bible Online

GBOA-A 38 - Northwest Gbaya bible

GBOA-A 38

¹A̧ dee fara-dɔ-kpoo-sɔ̧ nɛ te akasia, dura-a in pɛsa-a nɛ mɛtrɛ yiitoo nɛ reeta, kusa-a nɛ mɛtrɛ kpɔk nɛ reeta.

²A̧ ɗafa o zak dam mgbii-aa naar, nɛ yaa ndaɗi ŋmaa in fara-dɔ-kpoo-sɔ̧, ɓɛɛ a̧ sɔ̧ ndɛrɛ ɗoŋ-aa.

³A̧ duia o nyɛk lɛŋ wen fara-ɗafi-sɔ̧: o yee, o mɔɔ-ɗu-mɔ, o pɛsa tasi, o boi-kɔk-mɔ in tasi-aŋ-wee; a̧ duia o nyɛk nɔ‘i lɛŋ nɛ ndɛrɛ.

⁴A̧ sina ŋma be háŋányáŋá-mɔ nɛ ndɛrɛ e mgbák ká̧ nu fara-ɗafi-sɔ̧ nɛ ɗɔɔ si ŋgɔn mɛ.

⁵Ɓɛɛ a̧ ɗafi o kana a nɛ mgbii-aa naar wen pi̧i̧ te gɔa-a sɛnɛ.

⁶A̧ ɗafa te akasia, ɓɛɛ a̧ sɔ̧ ndɛrɛ ɗoŋ-aa.

⁷A̧ yura o te nɔ‘i kɔ̧ o kana nɛ duk ká̧ fara-ɗafi-sɔ̧ wen gɔa-a; a̧ ɗafa fara-ɗafi-sɔ̧ nɛ te, nɛ kɔ̧ a̧ duk ɓuɗuk.

⁸A̧ dee kpáná-ndɛrɛ in gun-aa nɛ ndɛrɛ; a̧ kaia nɛ o mɔɔ-zɔk-yí ko okoo nɛ de tom sɛn nu tua-kpa-ŋmaa de nɛnɛ.

⁹A̧ ɗafa nú-zala, in zɔ̧-laa babir-a nɛ yɛ́m-yɛ́m laa, dura-a nɛ mɛtrɛ ɓu-mɔɔrɔ nɛ war ká̧-zan-mɛ́-ɗɔɔ.

¹⁰A̧ dee o mbiŋ-a ɓu-yiitoo in gun-aa ɓu-yiitoo nɛ ndɛrɛ; a̧ dee o boi-kɔk-mɔ in mɔɔ-ga̧i̧-laa nɛ bu-mbɔi.

¹¹Dura babir-laa mɛ ká̧-zan-mɛ́-ŋgɔn nɛ mɛtrɛ ɓu-mɔɔrɔ, o mbiŋ-a nɛ ɓu-yiitoo in o gun-aa ɓu-yiitoo nɛ ndɛrɛ; a̧ dee o boi-kɔk-mɔ in o mɔɔ-ga̧i̧-laa nɛ bu-mbɔi.

¹²Dura zɔ̧-laa-kpe-nú-zala nɛ war yee-wese nɛ mɛtrɛ ɓu-yiitoo-zua-mɔɔrɔ; mbiŋ tɔna-a nɛ ɓu, gun-aa ɓu nɛ bu-mbɔi mbɛt. O boi-kɔk-mɔ in o mɔɔ-ga̧i̧-laa nɛ ya tɛ o mbiŋ nɔ‘i nɛ bu-mbɔi.

¹³Dura babir-laa nɛ war daŋa-wese nɛ mɛtrɛ ɓu-yiitoo-zua-mɔɔrɔ.

¹⁴Sɛn ká̧ nu tua nɛ mgbɔɔr dura zɔ̧-laa kpea-a nɛ mɛtrɛ mɔɔrɔ-ɗoŋ-yiitoo nɛ reeta, mbiŋ tɔna-a taar in gun-aa taar mbɛt.

¹⁵Nɛ̀ ɓii ká̧ nu tua, dura zɔ̧-laa kpea-a nɛ mɛtrɛ mɔɔrɔ-ɗoŋ-yiitoo nɛ reeta, nɛ mbiŋ taar in gun-aa taar mbɛt.

¹⁶O laa-babir nɛ zika ɗoŋ zala lɛŋ nɛ́ yɛ́m-yɛ́m zɔ̧-laa.

¹⁷O gun mbiŋ nɔ‘i nɛ ndɛrɛ, ɓɛɛ o boi-kɔk-mɔ, o mɔɔ-ga̧i̧-laa nɛ bu-mbɔi. Wa yɔka ɗoŋ o gan-ndui nɛ bu-mbɔi, ɓɛɛ o mɔɔ-ga̧i-laa nɛ wa dee nɛ bu-mbɔi mɔi̧a o mbiŋ lɛŋ e nu ŋmaa.

¹⁸Wa toka laa-kpe nu tua-zala tok nɛ tu̧ zɔ̧-laa, nɛ gbɛ̧ zɔ̧-laa, nɛ gbɛ̧-a̧ zóŋ-zóŋ in nɛ yɛ́m-yɛ́m zɔ̧-laa; pɛsa-a nɛ mɛtrɛ ɓu, kusa-a nɛ mɛtrɛ yiitoo nɛ reeta hee wan mɛ nú-zala ga.

¹⁹O mbiŋ-a naar in o gun-aa lɛŋ nɛ ndɛrɛ; wa dee o boi-kɔk-mɔ tɛ o mbiŋ nɔ‘i nɛ bu-mbɔi, ɓɛɛ wa sɔ̧ bu-mbɔi ɗoŋ o gan-ndui in o mɔɔ-ga̧i-laa mbɛt.

²⁰O te mgboia fara-duk ko Sɔ̧ in te-mgboi nú-zala lɛŋ nɛ ndɛrɛ.

²¹Mɔ nɛ o bíí ndɛma mɛ de nɛ fara-duk ko Sɔ̧ nɛ duk nɛ fara e sɛka-ta-heembea nɛ mɔ'ɔ. Nɛ́ Moisɛ a̧ ha̧a̧ nú ha̧ wa mɛ tɔr o mɔɔ nɔ‘i, ɓɛɛ nɛ́ o be Levii a̧ tɔra tɔra-a. Gasa wi-zɔk-tom'i nɛ Itamar, bem ko wi-ɗafi-sɔ̧ Arɔŋ.

²²Besalɛl, bem ko Urii, be-koo Hur, zuduk ko Juda dee tom nɛ GASA WAN tɔ̧ɔ̧ ha̧ Moisɛ mɛ de'i lɛŋ.

²³Wi nɛ gbaka a̧ tɛ tom nɛ́ Oholiab, bem ko Ahisamak, zuduk ko Dan; a̧ iŋa tom-sɛka-mɔ, tom-gɔna-dap-mɔ, in tom-toka-tu̧ zɔ̧-laa, gbɛ̧ zɔ̧-laa, gbɛ̧-a̧ zóŋ-zóŋ in yɛ́m-yɛ́m zɔ̧-laa.

²⁴Dita lɔr lɛŋ nɛ wa ha̧a̧ wen tom sa̧a̧-fara duka nɛ kilo gɔmŋmaa-mɔɔrɔ-ɗoŋ-naar-nɛ-ɓu-mɔɔrɔ-ɗoŋ-yiitoo-zua-mɔɔrɔ-ɗoŋ-yiitoo nɛ ŋma mɔ zu-a nyɛm nɛ ɗoŋ kilo fara-ɗafi-sɔ̧.

²⁵Dita bu-mbɔi nɛ o bíí mɔi̧a so ŋgimbi tɔra bíí duka nɛ kilo booro-taar-nɛ-ɓu-zua-mɔɔrɔ-ɗoŋ-yiitoo nɛ ŋma mɔ zu-a nyɛm nɛ ɗoŋ kilo fara-ɗafi-sɔ̧.

²⁶Kóó o nde ha̧a̧ nɛ reeta sule nyɛm nɛ ɗoŋ kilo fara-ɗafi-sɔ̧ wen o bíí lɛŋ nɛ kpaa pɛ ɓu-yiitoo kóó gan mbɛt nɛ‘i tɔra. Wa lɛŋ nɛ booro-gɔmŋmaa-mɔɔrɔ-ɗoŋ-kpɔk-nɛ-gɔmŋmaa-mɔɔrɔ-nɛ-ɓu-mɔɔrɔ.

²⁷Wa nɔi̧a kilo bu-mbɔi booro-taar de nɛ gun sa̧a̧-fara gɔmŋmaa in o gun babir gɔmŋmaa. Gun-aa kpɔk baa nɛ kilo ɓu-taar.

²⁸Ɓɛɛ nɛ̀ ko oi kilo bu-mbɔi ɓu-zua-mɔɔrɔ-ɗoŋ-yiitoo nɛ ŋma mɔ zu-a, Besalɛl dee nɛ o boi-kɔk-mɔ tɛ mbiŋ, ɓɛɛ a̧ yɔk nɛ ɗoŋ o gan-ndui in o mɔɔ-ga̧i-laa nɛ mɔi̧a o mbiŋ e nu ŋmaa.

²⁹Ndɛrɛ nɛ bíí ha̧a̧ ha̧ GASA WAN kura nɛ kilo booro-yiitoo-nɛ-gɔmŋmaa-nɛ-ɓu-yiitoo-zua-naar.

³⁰Nɛ i̧i̧ a̧ a̧ dee nɛ o gun fara-yea-a si kɔ̧ tua-kpa-ŋmaa, in fara-ɗafi-sɔ̧ ká bá nɛ̀ sina-mɔɔ-yí-a in o nyɛk-a lɛŋ;

³¹a̧ dee o gun zala, in o gun nu tua yea-a si nú-zala in o te-mgboi-tua'i in o wan mɛ mgboi nú-zala mbɛt nɛ ndɛrɛ.