Read Northwest Gbaya GBOA-A 4 Bible Online

GBOA-A 4 - Northwest Gbaya bible

GBOA-A 4

¹Moisɛ kifa nú: «Ɛnɛ zɔk, wa beka kpɛk wen kɔ‘m na. Wa beka zii wen nú‘m na, wa tɛ tɔ̧: ‹GASA WAN usi kɔ‘i tɛ ha̧ mɛ na.› »

²GASA WAN tɔ̧ɔ̧ ha̧ a̧: «Nɛ ge er-mɛ‘i ge?» Moisɛ kifa nú: «Nɛ dɔra.» GASA WAN tɔ̧ɔ̧ ha̧ a̧:

³«Mɛ̀ pí̧ nu.» Moisɛ pi̧i̧ dɔra nu, ɓɛɛ dɔra'i kifi gɔ́k. Moisɛ zɔka gɔ́k'i, ɓɛɛ pɛ́ nɛ̀ ɗoŋ.

⁴GASA WAN tɔ̧ɔ̧ ha̧ a̧: «Mɛ̀ nyɛ́í̧ er-mɛ, a̧ mɛ ba a̧ nɛ dom-aa!» A̧ nyɛi̧a er-a ba a̧, ɓɛɛ gɔ́k'i kifi nɛ́ dɔra kɔ̧ er-a̧ woyo.

⁵Ɓɛɛ GASA WAN tɔ̧: «Mɔ‘i tɛ de ha̧ wa mɛ kpɛk'e GASA WAN Sɔ̧ ko o dáà kɔ-wa, Sɔ̧ ko Abraham, Sɔ̧ ko Izak in Sɔ̧ ko Jakob usa tɛ ha̧ mɛ!»

⁶GASA WAN tɔ̧ɔ̧ ha̧ Moisɛ woyo: «Mɛ̀ pí̧ er-mɛ ti-kɔ̧-ɓaa-mɛ.» A̧ pi̧i̧ er-a ti-kɔ̧-ɓaa-a, ɓɛɛ n'aa baa yinɛ, er-a lɛŋ nɛ́ doko, ɓɛɛ tɛɛ fɛ̧ŋ kpúŋ-kpúŋ hee ɓɔrɔ ga.

⁷GASA WAN tɔ̧ɔ̧ ha̧ a̧: «Mɛ̀ pí̧ er-mɛ ti-kɔ̧-ɓaa-mɛ woyo.» A̧ pi̧i̧ er ti-kɔ̧-ɓaa-a, ɓɛɛ n'aa baa yinɛ, er-a'i pia ɗoŋ duk hee kuti-a ga.

⁸«Hee mɔ‘i ga, kà wa nɛ kɔ̧ɔ̧ baa wen kɔ-mɛ e tɛ kpasamɔ na, in kà kíì nɛ dee wa tɛ kuti mɔɔ-kifi’ɛ na, wan mɛ ɗoŋ‘i tɛ de ha̧ wa mɛ iŋ nɛ de-a'e nɛ kpasamɔ.

⁹Ɓɛɛ kà mɔɔ-kifi nɔ‘i yiitoo'i nɛ́ dee kíì pi̧ tɛ-wa na, kà wa nɛ zia wen nú-mɛ na, mɛ́ tɛ́ nɛ̀ɛ́ ɗu nana-yì, ɓɛɛ mɛ tɛɛ gbai a nu. Yì nɛ mɛ tɛ ɗu'i tɛ kifi nɛ tɔk sɛn mbɔɗɔnu.»

¹⁰Moisɛ tɔ̧ɔ̧ ha̧ GASA WAN: «Mi ai nú h’ɛ́nɛ́, GASA WAN, mi iŋ tɔ̧ɔ̧ wen nɛ de-a na, dika n'am duk nɛnɛ; kóó ŋgimbi n’ɛnɛ tɔ̧ nɛ wen ha̧‘m mbɛt, nú‘m in leɓ‘am ɔ dita.»

¹¹GASA WAN kifa nú ha̧ a̧: «O'o dee nú bíí o nde? Nɛ o'o de ha̧ bíí mɛ tɔ̧ wen o nde? O'o de ha̧ zer bíí mɛ mgbe o nde? O'o de ha̧ bíí mɛ zɔk mɔ nɛ sa̧a̧ a̧ in ha̧ yí-wi mɛ bom o? Bo nɛ mi GASA WAN na nde?

¹²Kinii, mɛ̀ nɛ́, mi tɛ gbak mɛ tɛ tɔ̧ɔ̧ wen, in mi tɛ usi mɔ nɛ mɛ́ tɛ tɔ̧ mbɛt.»

¹³Moisɛ tɔ̧a̧: «GASA WAN, mi ai nú h’ɛ́nɛ́, ɛ̀nɛ̀ tóm ŋma bíí n’ɛnɛ kɔ̧a̧!»

¹⁴See GASA WAN nyima in Moisɛ, ɓɛɛ tɔ̧: «Nya-mɛ Arɔŋ, bezaŋ Levii bo na nde? Mi iŋa a̧ tɔ̧ wen nɛ de-a nyɛmna. Zɔ́k a̧ nɛ mɔ'ɔ n'aa tɛ pii tɛ-mɛ'ɛ. Ŋgimbi n'aa tɛ zɔk mɛ, a̧ tɛ kpa desee nyɛmna.

¹⁵Mɛ́ tɛ́ tɔ̧ wen ha̧ a̧, ɓɛɛ mɛ́ tɛ́ e wen nú-a. Mi nɛ tɛ‘m, mi tɛ gbak'nɛ́ tɛ tɔ̧ɔ̧ wen, ɓɛɛ mi tɛ usi mɔ n’ɛnɛ tɛ́ de h’ɛ́nɛ́.

¹⁶A̧ tɛ́ tɔ̧ wen ha̧ giiwi oi nú mɛ, a̧ tɛ́ duk nɛ́ nú-mɛ, ɓɛɛ mɛ́ tɛ́ duk kɔ-mɛ hee Sɔ̧ kɔ̧-a̧ ga.

¹⁷War ko dɔra’ɛ, mɛ̀ bá a̧ nɛ er-mɛ. Nɛ́ dɔra'i a̧ mɛ tɛ́ ba dé nɛ mɔɔ-kifi.»

¹⁸Moisɛ yaka, ɓɛɛ nɛ́ɛ̀ kpa for-aa Jetro. A̧ tɔ̧ɔ̧ ha̧ a̧: «Ɛ̀nɛ̀ é war ha̧‘m yak, a̧‘m si ɗoŋ sitɛ o nya'm sɛn Egiptɛ mɛ, ha̧‘m mɛ́ zɔk mɔ kà wa nɛ́ ɓɔna kpasa hɔ kinii.» Jetro tɔ̧ɔ̧ ha̧ a̧: «Mɛ̀ nɛ́ nɛ̀ zaŋ ga̧a̧mɔ!»

¹⁹GASA WAN tɔ̧ɔ̧ ha̧ Moisɛ sɛn Madiaŋ: «Mɛ̀ sí ɗoŋ sɛn nú Egiptɛ wen o bíí nɛ kia so mɛ gbɛ mɛ fee lɛŋ kaɗi.»

²⁰Moisɛ baa kóò in o bem kɔ‘i e zu tuifuu, ɓɛɛ si ɗoŋ si nú Egiptɛ. A̧ baa dɔra ko Sɔ̧ mbɛt.

²¹GASA WAN tɔ̧ɔ̧ ha̧ Moisɛ: «Kinii hee mɔ'ɔ nɛ mɛ si ɗoŋ si Egiptɛ ga, mɛ́ tɛ́ de o mɔɔ-kifi n'am ha̧a̧ ŋgai dea-a ha̧ mɛ‘i ti wannu Egiptɛ. Kɔ‘m, mi tɛ ŋgai see-aa, ɓɛɛ a̧ beka e ha̧ zuduk bíí kɔ‘m mɛ yak na.

²²Mɛ tɔ̧ ha̧ wannu Egiptɛ nde: Wen nɛ GASA WAN tɔ̧ nɛ mɔ'ɔ: ‹Kaya-bem kɔ‘m nɛ Israɛl.

²³Mi tɔ̧ ha̧ mɛ, mɛ̀ é ha̧ bem kɔ‘m yak a̧ gas'am. Ɓɛɛ hee mɔ'ɔ nɛ mɛ kɔ̧ mɛ e ha̧ a̧ mɛ yak na ga, kɔ‘m, mi tɛ gbɛ kaya-bem kɔ-mɛ.»›

²⁴Sɛn yuwar, ŋgimbi nɛ Moisɛ yora wen ɔma tɛ, GASA WAN kia mɛ gbɛ a̧.

²⁵Sipɔra baa tɔ̧́ɔ̧́-nú-ta, ɓɛɛ a̧ gɔn bɔr bem kɔ̧-a̧, ɓɛɛ ba mbii ndɔ nɛ ti Moisɛ tɔ̧ nɛnɛ‘e: «Mɛ́ nɛ́ wii n'am baa zaŋ tɔk.»

²⁶Ɓɛɛ GASA WAN e Moisɛ duk. Sipɔra tɔ̧ɔ̧ so'e «Wii-tɔk» wen bɔr n'aa gɔna.

²⁷GASA WAN tɔ̧ɔ̧ so ha̧ Arɔŋ mɛ nɛ̀ɛ́ kpa Moisɛ gbara mɛ, ɓɛɛ Arɔŋ yak nɛ́ɛ̀ kpa Moisɛ sɛn zu kaya ko Sɔ̧, ɓɛɛ wa hɛr ŋmaa.

²⁸Moisɛ tɔ̧ɔ̧ o wen nɛ GASA WAN toma nɛ̀ a̧ ha̧ Arɔŋ, in o mɔɔ-kifi n'aa ha̧a̧ nú ha̧ a̧ mɛ de mbɛt.

²⁹Nɛ mɔ'ɔ nɛ Moisɛ in Arɔŋ yaka nɛ́ɛ̀ mɔi̧ o kuti bezaŋ Israɛl lɛŋ.

³⁰Arɔŋ wee ɗoŋ mɔ nɛ GASA WAN baa tɔ̧ ha̧ Moisɛ, ɓɛɛ a̧ de mɔɔ-kifi mbɛt ti giiwi.

³¹Giiwi kpɛka mɔ‘i; wa iŋa'e GASA WAN gbaka o bezaŋ Israɛl, ɓɛɛ a̧ zɔk bɔnɛ nɛ wa duk sɛnɛ. Wa gbɛɛ zugur-wa nu, gasi nɛ Sɔ̧.