Read Northwest Gbaya GBOA-A 5 Bible Online

GBOA-A 5 - Northwest Gbaya bible

GBOA-A 5

¹Ɗoŋ-aa'i, Moisɛ in Arɔŋ tɛ̀ɛ́ kpa wannu Egiptɛ, ɓɛɛ wa tɔ̧ ha̧ a̧: «GASA WAN Sɔ̧ ko Israɛl tɔ̧a̧‘e, mɛ̀ é ha̧ dukbíí kɔ‘i mɛ yak ha̧ wa mɛ nɛ̀ɛ́ de ŋma be gbaŋa nɛ nin-wi sɛn ŋma ŋga-gbárà mɛ.»

²Wannu Egiptɛ kifa nú: «GASA WAN'i nɛ o ha̧‘m mɛ zii wen kɔ̧-a̧, ha̧ o be Israɛl mɛ yak o? Mi iŋ ŋma bíí‘e GASA WAN na. Mi beka e ha̧ o be Israɛl mɛ yak na.»

³Wa tɔ̧ɔ̧ ha̧ a̧: «Sɔ̧ ko o Hebreu usa tɛ h’ɛ́ɛ́. Ɛɛ tɛ́ nɛ̀ nɔ tɛ́ zɛ taar sɛn ŋga-gbárà mɛ nɛ̀ɛ́ ɗafi GASA WAN Sɔ̧ k’ɛɛ. Kà bó hegɔ na, a̧ tɛ́ gbɛ yɛ nɛ ŋga-zɛɛ, koo nɛ gba-paa.»

⁴Wannu Egiptɛ tɔ̧ɔ̧ ha̧ wa: «Moisɛ in Arɔŋ, wen ge ɛnɛ kɔ̧ɔ̧ mɛ de ha̧ o be Israɛl mɛ yambali e nɛ tom kɔ-wa duk ge nde? Ɛ̀nɛ̀ sí ɗoŋ sɛn tɛ tom-bara k’ɛ́nɛ́!»

⁵A̧ tɔ̧ɔ̧ woyo: «Kinii, hee mɔ'ɔ nɛ wa ɔ dɔka ga, ɛ́nɛ́ kɔ̧ɔ̧ ha̧ wa mɛ ɔm tɛ-wa tɛ tom-bara kɔ-wa nde?»

⁶Wese'i, wannu Egiptɛ ha̧a̧ nú ha̧ o wi-duk-zu tom-bara in ha̧ o kapita; a̧ tɔ̧a̧:

⁷«K’ɛ́nɛ́ ha̧ yuɗu ha̧ o wi nɔ‘i wen mbɛra-a nɛ brik hee mɔ'ɔ n’ɛɛ dee so nɛti ga ɓɔna, wa tɛ́ nɛ nɛ tɛ-wa wen kaia-a.

⁸Ɛ̀nɛ̀ dé ha̧ wa mɛ mbɛr brik nɛ dɔka-a hee wan nɛ wa de nɛnɛ kinii ga. Ká wa kɛ̧ nú-a yinɛ na. Wa nɛ o wi-tɛɛri sa wa hiɗi mɔ‘e: ‹Ɛɛ kɔ̧ɔ̧ mɛ nɛ̀ɛ́ ɗafi Sɔ̧ k’ɛɛ sɛ!›

⁹Wa a̧ usi mbe tom ha̧ o wi nɔ‘i e zu kuti-a. Ká wa ɔm tɛ-wa na, wa a̧ de nɛ tom wen ká wa tɛɛ ta o wen-ndela kɔ-wa.»

¹⁰O wi-duk-zu tom-bara in o kapita nɛ̀ɛ́ tɔ̧ ha̧ o dɔka bíí nde: «Keta nɛ wannu Egiptɛ baa nɛ mɔ'ɔ: ‹Mi beka ha̧ yuɗu h’ɛ́nɛ́ ɓɔna.

¹¹Ɛ̀nɛ̀ nɛ́ɛ̀ kíí yuɗu sɛn fara n’ɛnɛ nyɛma mɛ kpa sɛnɛ. Kóó ɛnɛ dee hegɔ mbɛt, ŋma mɔ nɛ‘i tɛ fo yinɛ nú tom k’ɛ́nɛ́ bo na.› »

¹²Ɓɛɛ o bíí pɛsi dam zaŋbɛɛ nu Egiptɛ lɛŋ, wen kpaa yuɗu nɛ wa tɛ pɔi.

¹³O wi-duk-zu-tom nɔ‘i nasi nɛ wa tɔ̧ nɛnɛ‘e: «Ɛ́nɛ́ tɛ́ de kana nɛ tom k’ɛ́nɛ́ wese lɛŋ hee mɔ'ɔ nɛ wa ha̧ so kana nɛ yuɗu h’ɛ́nɛ́ ga.»

¹⁴O be Egiptɛ nɛ ya zu tom-bara gusa o be Israɛl nɛ wa ee so nɛ kapita mbɛt tɔ̧ nɛnɛ‘e: «Wen ge mɛ mboyɛɛ in sɔsɔɔ, ɛnɛ kaɗi tom-mbɛra-brik k’ɛ́nɛ́ hee kuti-a ga na ge?»

¹⁵O be Israɛl nɛ wa ee so nɛ kapita nɛɛ ai nú ti wannu Egiptɛ tɔ̧ nɛnɛ‘e: «Wen ge ɛnɛ usi bɔnɛ ha̧ o wi-de-tom k’ɛ́nɛ́ hegɔ ge?

¹⁶O wi-de-tom k’ɛ́nɛ́ nɛ mɔ'ɔ nɛ kpa yuɗu na, ɓɛɛ ko o bíí k’ɛ́nɛ́, kana nɛ gusa ɛɛ, tɔ̧ nɛnɛ‘e, ɛ̀ɛ̀ mbɛr brik. O bíí k’ɛ́nɛ́ de mɔ de na.»

¹⁷Wannu Egiptɛ kifa nú ha̧ wa: «Nɛ mbetɛ, ɛnɛ nɛ o wi-tɛɛri, nɛ wen hegɔ n’ɛnɛ tɔ̧‘e wi tɛ yak mɛ nɛɛ ɗafi GASA WAN.

¹⁸Ɛ̀nɛ̀ yák kinii, ɛ̀nɛ̀ nɛ́ɛ̀ de tom. Wi beka ha̧ yuɗu h’ɛ́nɛ́ na, ɓɛɛ ɛnɛ tɛ de kana h’ɛ́nɛ́ mɛ mbɛr brik nɛ dɔka-a hee kuti-a ga.»

¹⁹O bezaŋ Israɛl nɛ wa ee so nɛ kapita zɔka'e wi ya nɛ ɗaŋ-a wen nɛ wa tɔ̧a̧ ha̧ wa nde, ŋma mɔ beka yu nú brik nɛ‘i tɛ mbɛr na. Wese lɛŋ, kana nɛ̀ dɔka-a hee wi gɔna so ha̧ wa mɛ de ga.

²⁰Ɗoŋ nɛ wa ee wannu Egiptɛ duk kaɗi, ɓɛɛ wa gbo kpa Moisɛ in Arɔŋ nɛ tɛa mɛ pɛm wa.

²¹Wa tɔ̧ɔ̧ ha̧ wa: «GASA WAN a̧ zɔk mɔ‘i, ɓɛɛ a̧ a̧ gɔn kita zu'nɛ́. Mɛ̀ nɛ́ wen zu'nɛ́ a̧ wannu Egiptɛ in o wi-de-tom kɔ‘i sɛn nɛ ɛɛ; ɛ̧ɛ̧ hɛ̧ɛ̧ duk hee gba-paa ɛ́nɛ́ ha̧a̧ ha̧ wa mɛ gbɛ nɛ ɛɛ ga.»

²²Moisɛ pia ɗoŋ tɛ GASA WAN, ɓɛɛ tɔ̧ ha̧ a̧: «GASA WAN, wen ge ɛ́nɛ́ usi bɔnɛ ha̧ wi nɔ'ɔ ge nde? Ɛnɛ toma'm wen ge?

²³Ŋgimbi n'am tɛɛ kpa nɛ wannu Egiptɛ tɔ̧ nɛ wen ha̧ a̧ nɛ nin'nɛ́, a̧ mbosi usa bɔnɛ ha̧ zuduk bíí nɔ'ɔ na, ɓɛɛ ɛ́nɛ́ de ŋma mɔ kpɔk mɛ gbo zuduk bíí k’ɛ́nɛ́ yi bɔnɛ yinɛ na!»