Read Northwest Gbaya GBOA-A 6 Bible Online

GBOA-A 6 - Northwest Gbaya bible

GBOA-A 6

¹GASA WAN tɔ̧ɔ̧ ha̧ Moisɛ: «Dekpaa tikiɗi, mɛ́ tɛ́ zɔk mɔ n'am tɛ́ de in wannu Egiptɛ. Mi tɛ ir a̧ wen ha̧ a̧ mɛ e ha̧ o bíí kɔ‘m mɛ yak. Mi tɛ de ha̧ a̧ mɛ ndak wa yinɛ tɛ nu kɔ̧-a̧.»

²Sɔ̧ tɔ̧ɔ̧ ha̧ Moisɛ: «Mi nɛ́ GASA WAN.

³Mi usa tɛ‘m ha̧ Abraham, ha̧ Izak in ha̧ Jakob nɛ nin: Sɔ̧ Wan-ŋgayamɔ, ɓɛɛ mi usi tɛ‘m nɛ nin GASA WAN ha̧ wa na.

⁴Mi nɔɔ tɔk in wa ha̧ nɛ nú Kanaŋ ha̧ wa. Mɛ̀ nɛ́ nu nɛ wa duka so sɛnɛ hee o gɛnɛ ga.

⁵Ŋgimbi n'am zia gɔfamɔ ko o be Israɛl zaŋ bɔnɛ nɛ o be Egiptɛ usi ha̧ wa, ɓɛɛ tɛ‘m mbaŋ ɗoŋ nɔɔ-tɔk kɔ‘m in wa.

⁶Hegɔ, mɛ̀ tɔ̧́ wen’ɛ ha̧ o be Israɛl: Mi nɛ GASA WAN, mi tɛ fo'nɛ́ yinɛ tɛ tom-bara nɛ o be Egiptɛ e'nɛ́ sɛnɛ; mi tɛ gbo'nɛ́ tɛ bara; mi tɛ gbo'nɛ́ ɓɛɛ mi tɛ de ŋgamɔ in wa, gɔn nɛ kita zu wa.

⁷Mi tɛ mɔi̧‘nɛ́ nɛ̀ o bíí kɔ‘m, ɓɛɛ mi tɛ duk nɛ Sɔ̧ k’ɛ́nɛ́. Ɛnɛ tɛ iŋ nde, nɛ mi GASA WAN a̧ duk nɛ Sɔ̧ k’ɛ́nɛ́, nɛ foo'nɛ́ yinɛ tɛ tom-bara ko o be Egiptɛ.

⁸Hɔ-ɗoŋ-aa, ɓɛɛ mi tɛ fo'nɛ́ sitɛ nu n'am kana so mɔ nde, mi tɛ ha̧ Abraham, ha̧ Izak in ha̧ Jakob; mi tɛ ha̧‘nɛ́ nɛ k’ɛ́nɛ́: Nɛ mi GASA WAN!»

⁹Moisɛ baa wen'i tɛ́ɛ̀ tɔ̧ ha̧ o be Israɛl, ɓɛɛ wa bɛ̧ zia-a, wen duka-a tɛ ŋga tom-bara gana zu wa kaɗi.

¹⁰GASA WAN tɔ̧ɔ̧ ha̧ Moisɛ:

¹¹«Mɛ̀ nɛ́ tɛ́ wannu Egiptɛ, ɓɛɛ mɛ̀ tɔ̧́ ha̧ a̧ mɛ e ha̧ o be Israɛl mɛ gbo tɛ nu kɔ̧-a̧.»

¹²Moisɛ kifa nú ha̧ GASA WAN nde: «O be Israɛl nɛ mɔ'ɔ nɛ zii wen kɔ‘m na’ɛ, sa nɛ wannu Egiptɛ a̧ tɛ zii zia-a nde? Bo nɛ wen hɔ hɔɔ nú‘m nɛ haya-a na’ɛ.»

¹³GASA WAN ee wen nú Moisɛ in Arɔŋ ha̧ wa mɛ nɛ̀ɛ́ tɔ̧ ha̧ o bezaŋ Israɛl in ha̧ wannu Egiptɛ, wen ha̧ a̧ mɛ fo o be Israɛl gbonɛ tɛ nú Egiptɛ.

¹⁴O gasawi nutua ko o be Israɛl nɛ mɔ'ɔ. Bem ko Rubɛn kaya-bem ko Israɛl nɛ Enɔk, Palu, Ɛsrɔŋ in Karmi; o bíí nú-gara ko Rubɛn a̧‘i.

¹⁵O bem ko Simɛɔŋ nɛ Yemuɛl, Yamin, Ohad, Yakin, Sohar in Saul, bem ko zɔŋa Kanaŋ; o bíí nú-gara ko Simɛɔŋ a̧‘i.

¹⁶O bem ko Levii in o bezaŋ-wa nɛ Gɛrsɔŋ, Kehat in Mɛrari. Levii duka zu nu pɛ 137.

¹⁷O bem ko Gɛrsɔŋ duka nɛ Libni in Simɛi nyɛm nɛ ɗoŋ nú-gara kɔ-wa.

¹⁸O bem ko Kehat nɛ Amram, Yisɛhar, Hebrɔŋ in Uziɛl; Kehat duka zu nu pɛ 133.

¹⁹O bem ko Mɛrari duka nɛ Mali in Musi; o bíí nú-gara ko Levii nyɛm nɛ ɗoŋ bezaŋ-wa a̧‘i.

²⁰Amram baa so nɛ sembaa kɔ‘i Yokɛbɛd ko nɛ Arɔŋ in Moisɛ. Amram duka zu nu pɛ 137.

²¹O bem ko Yisɛhar duka nɛ Kore in Nɛfɛg ba nɛ Zikri.

²²O bem ko Uziɛl nɛ Misaɛl, Ɛlsɛfaŋ in Sitri.

²³Arɔŋ baa kɔ‘i Elisabɛt, boko-bem ko Aminadab boko-nya Nasɔŋ nɛ koo, ɓɛɛ wa ko Nadab, Abihu, Eleazar in Itamar.

²⁴O bem ko Kore duka nɛ Asir, Ɛlkana in Abiasaf; o bíí nú-gara ko o bezaŋ Kore a̧‘i.

²⁵Eleazar bem ko Arɔŋ baa kɔ‘i nɛ ŋma boko-bem ko Putiɛl nɛ koo, ko nɛ Pinas. O gasawi nutua ko Levii nyɛm nɛ ɗoŋ nú-gara kɔ-wa a̧‘i.

²⁶Tugun Arɔŋ in Moisɛ nɛ mɔ‘i. Nɛ́ wa a̧ GASA WAN ha̧a̧ so nú ha̧ wa mɛ gbo o be Israɛl yinɛ tɛ nú Egiptɛ nɛ yuwar-a.

²⁷Nɛ́ Moisɛ in Arɔŋ a̧ tɔ̧ɔ̧ wen ha̧ wannu Egiptɛ mɛ gbo o be Israɛl nú Egiptɛ yinɛ.

²⁸Ŋgimbi nɛ GASA WAN tɔ̧ɔ̧ nɛ wen ha̧ Moisɛ sɛn nú Egiptɛ,

²⁹mɔ n'aa tɔ̧ɔ̧ ha̧ a̧ wese'i nɛ mɔ'ɔ: «Nɛ mi GASA WAN. Mɛ̀ tɔ̧́ wen n'am tɛ tɔ̧ ha̧ mɛ lɛŋ ha̧ wannu Egiptɛ.»

³⁰Ɓɛɛ Moisɛ tɔ̧ ha̧ GASA WAN: «Mi bó nɛ́ wi-tɔ̧-wen nɛ haya-a na. Wannu Egiptɛ tɛ zii wen kɔ‘m hee ge?»