Read Northwest Gbaya GBOA-A 8 Bible Online

GBOA-A 8 - Northwest Gbaya bible

GBOA-A 8

¹GASA WAN tɔ̧ɔ̧ ha̧ Moisɛ woyo: «Mɛ̀ tɔ̧́ ha̧ Arɔŋ, a̧ a̧ nyɛi̧ er-a nɛ oi dɔra kɔ̧-a̧ si zu o gasa yi, zu o mbaŋa-yì in o tɔp, ɓɛɛ a̧ a̧ de ha̧ o yaa-gbazal mɛ daŋ si nú Egiptɛ.»

²Arɔŋ nyɛi̧a er si zu yi nú Egiptɛ lɛŋ, ɓɛɛ o yaa-gbazal gbo nɛ ɗɔɔ-aa kpe zu nú Egiptɛ.

³O wi-de-mɔɔ-kifi Egiptɛ dee mɔɔ-kifi kɔ-wa mbɛt, ɓɛɛ wa de ha̧ o yaa-gbazal mɛ gbo dam nú Egiptɛ lɛŋ.

⁴Wannu Egiptɛ saa Moisɛ in Arɔŋ, ɓɛɛ tɔ̧: «Ɛ̀nɛ̀ áí nú ha̧ GASA WAN mɛ fo o yaa-gbazal yinɛ tɛ‘m in tɛ o zuduk bíí kɔ‘m, ɓɛɛ mi ee o be Israɛl mɛ yak, wen ha̧ wa mɛ ɗafi GASA WAN.»

⁵Moisɛ kifa nú ha̧ wannu Egiptɛ: «Ɛ̀nɛ̀ gɔ́n ŋgimbi n'am tɛ ai nú ha̧ GASA WAN wen ɛnɛ in o wi-de-tom k’ɛ́nɛ́ ba nɛ dukbíí k’ɛ́nɛ́ wen ha̧ o yaa-gbazal mɛ yu tɛ‘nɛ́, in sɛn kɔ̧ tua k’ɛ́nɛ́, ha̧ wa mɛ ya nɛ ɗɔɔ nana-yì ɓɛɛ.»

⁶Wannu kifa nú: «Nɛ́ mɛ sa̧a̧mɔ.» Moisɛ tɔ̧a̧: «Hee mɔ'ɔ nɛ mɛ tɔ̧a̧ ga, ha̧ mɛ mɛ iŋ‘e ndé, GASA WAN Sɔ̧ k’ɛɛ bó nɛ́ wi-we-zu nɛnɛ na,

⁷o yaa-gbazal tɛ yak nyɛi̧ nɛ mɛ, nɛ tua kɔ-mɛ, nɛ o wi-de-tom kɔ-mɛ in nɛ dukbíí kɔ-mɛ ha̧ wa mɛ ɓɔn ɗɔɔ nana-yì.»

⁸Ŋgimbi nɛ Moisɛ in Arɔŋ gboo tɛ ko wannu Egiptɛ, ɓɛɛ Moisɛ ai nú ha̧ GASA WAN wen zu mɔ ko o yaa-gbazal nɛ de ŋmaa in wannu Egiptɛ.

⁹GASA WAN dee mɔ nyɛm nɛ ɗoŋ wen ko Moisɛ, ɓɛɛ o yaa-gbazal fe sɛn kɔ̧ tua, sɛn bee-gara in sɛn kpɛɛfɔ lɛŋ.

¹⁰Wa mɔi̧a wɔr-wa nɛ dɔka tua-a, ɓɛɛ pɛr-aa nun dam fara lɛŋ.

¹¹Wannu Egiptɛ zɔka'e wi ɔma kaɗi, a̧ dee ŋgazu ɓɛɛ a̧ kɔ̧ zia wen nú Moisɛ in Arɔŋ na, hee mɔ'ɔ nɛ GASA WAN baa tɔ̧ so ga.

¹²GASA WAN tɔ̧ɔ̧ ha̧ Moisɛ: «Mɛ̀ tɔ̧́ ha̧ Arɔŋ a̧ a̧ nyɛi̧ dɔra kɔ̧-a̧ mɛ gusi fuunu ha̧ fuunu mɛ kifi zifa dam nú Egiptɛ lɛŋ.»

¹³Wa dee hegɔ; Arɔŋ nyɛi̧a er n'aa kasi nɛ dɔra'i, ɓɛɛ a̧ gusi fuunu, ɓɛɛ o zifa dik a zu o bíí in o saɗi. Fuunu Egiptɛ lɛŋ kifa nɛ́ zifa.

¹⁴O wi-de-mɔɔ-kifi Egiptɛ kimia mɛ de o zifa takaɗi, wen wa nyɛm so mɛ de na. O zifa dika a zu o bíí in o saɗi.

¹⁵Ɓɛɛ o wi-de-mɔɔ-kifi tɔ̧ ha̧ wannu Egiptɛ: «Nɛ́ Sɔ̧'ɔ̧ dee mɔ‘i.» See wannu Egiptɛ ŋgaia, ɓɛɛ a̧ bɛ̧ zia wen nú Moisɛ in Arɔŋ, hee mɔ'ɔ nɛ GASA WAN baa tɔ̧ so ga.

¹⁶GASA WAN tɔ̧ɔ̧ ha̧ Moisɛ: «Mɛ̀ kúr nɛ̀ tutuyɛ sut, mɛ̀ nɛ́ tɛ wannu Egiptɛ ŋgimbi n'aa tɛ nɛ sɛn nu yi, ɓɛɛ mɛ̀ tɔ̧́ ha̧ a̧: GASA WAN tɔ̧a̧ mɛ̀ é ha̧ dukbíí kɔ‘i mɛ yak, mɛ́ nɛ̀ɛ́ gasi wi.

¹⁷Kà mɛ e ha̧ dukbíí kɔ‘i mɛ yak na, wi tɛ tom o zi̧-bia a zu mɛ, a zu o wi-de-tom kɔ-mɛ, zu dukbíí kɔ-mɛ in a kɔ̧ tua kɔ-mɛ mbɛt. O tua ko o be Egiptɛ tɛ dun nɛ zi̧-bia, kóó nɛ nu nɛ wa tɛ yor sɛnɛ mbɛt.

¹⁸Wese'i wi tɛ kɛ̧ mgbara Gɔsɛn, fara nɛ dukbíí kɔ‘i duk sɛnɛ, wen ká o zi̧-bia tɛɛ hɔ sɛn hi̧i̧, wen ha̧ mɛ mɛ iŋ‘e, wi GASA WAN, wi a̧a̧ tɛ nu’ɛ.

¹⁹Mɔ nɛ tɛ hɔ zu mɛ‘i beka hɔ zu o bíí kɔ‘i na. Mɔɔ-usi-mɔ‘i tɛ de mɛ sa̧a̧mɔ.»

²⁰GASA WAN dee hegɔ, ɓɛɛ o dɔka zi̧-bia ye kɔ̧ tua ko wannu Egiptɛ, sɛn kɔ̧ tua ko o wi-de-tom kɔ̧-a̧ in dam nú Egiptɛ lɛŋ; o zi̧-bia pɛsa dam nu lɛŋ.

²¹Wannu Egiptɛ saa Moisɛ in Arɔŋ, ɓɛɛ tɔ̧ ha̧ wa: «Ɛnɛ nyɛma mɛ ɗafi Sɔ̧ k’ɛ́nɛ́ sɛn tɛ nu’ɛ.»

²²Moisɛ kifa nú: «Deemɔ hegɔ nyɛm sɛnɛ na, wen o be Egiptɛ tɛ kpa ɗaŋsee nyɛmna zu mɔ n’ɛɛ tɛ ɗafi nɛ GASA WAN Sɔ̧ k’ɛɛ. Ɓɛɛ k’ɛ̀ɛ̀ ɗafi Sɔ̧ nɛ yí-wa ha̧ nɛ̀ ɗaŋsee ha̧ wa, wa beka yo yɛ nɛ ta gbɛ na nde?

²³Ɛ́ɛ́ tɛ́ nɛ nɔ zɛ taar sɛn ŋga-gbárà, ɓɛɛ sɛk’ɛɛ hɔɔ sɛn fara-ɗafi GASA WAN, Sɔ̧ k’ɛɛ, h’ɛ́ɛ́ mɛ ɗaf'aa hee mɔ'ɔ n'aa tɛ usi h’ɛ́ɛ́ ga.»

²⁴Wannu Egiptɛ tɔ̧a̧: «Mi tɛ e h’ɛ́nɛ́ mɛ yak h’ɛ́nɛ́ mɛ ɗafi GASA WAN Sɔ̧ k’ɛ́nɛ́ sɛn ŋga-gbárà; mɔ kpɔk, k’ɛ́nɛ́ yak ɗoŋ‘nɛ́ nyɛi̧ na. Ɛ̀nɛ̀ kɔ́fí Sɔ̧ wen am.»

²⁵Moisɛ tɔ̧a̧: «Ŋgimbi n'am tɛ gbo tɛ kɔ-mɛ yak, mi tɛ ai nú ha̧ GASA WAN, ɓɛɛ sa̧a̧mɔ mɛ tutuyɛ, o zi̧-bia tɛ yak nyɛi̧ nɛ mɛ, nɛ̀ o wi-de-tom kɔ-mɛ, in dukbíí kɔ-mɛ. Mɔ kpɔk, ká wannu Egiptɛ ɔr yɛ mɛ bɛ̧ ee yɛ mɛ ɗafi GASA WAN k’ɛɛ na.»

²⁶Moisɛ gboo kɔ̧ tua ko wannu Egiptɛ, ɓɛɛ ai nú ha̧ GASA WAN,

²⁷ɓɛɛ GASA WAN de mɔ nyɛm nɛ ɗoŋ wen ko Moisɛ, ɓɛɛ o zi̧-bia nyɛi̧ nɛ wannu Egiptɛ, o wi-de-tom kɔ̧-a̧ in dukbíí kɔ̧-a̧. Ŋma zi̧-bia kóó kpɔk ɓɔn na.

²⁸Kóó zu mɔ‘i mbɛt, wannu Egiptɛ dee ŋgazu, ɓɛɛ a̧ e ha̧ o be Israɛl mɛ yak na.