Read Northwest Gbaya GBOA-A 9 Bible Online

GBOA-A 9 - Northwest Gbaya bible

GBOA-A 9

¹GASA WAN tɔ̧ɔ̧ ha̧ Moisɛ: «Mɛ̀ nɛ́ tɛ ko wannu Egiptɛ, a̧ mɛ̀ tɔ̧́ ha̧ a̧: GASA WAN Sɔ̧ ko o be hébreu tɔ̧a̧, mɛ̀ é ha̧ zuduk bíí kɔ̧‘i mɛ́ nɛ̀ɛ́ gasi wi.

²Kà mɛ̀ bɛ̧ ea-a ha̧ wa mɛ yak, kà mɛ̀ dor wa,

³GASA WAN tɛ́ kum o mɔ-dai nɛ ya zaŋbɛɛ; a̧ tɛ kum o nyaŋa, o tuifuu, o ŋgeloba, o ndai in o sami nɛ ŋga-zɛɛ.

⁴GASA WAN tɛ kɛ̧ mgbara o mɔ-dai ko o be Israɛl in o mɔ-dai ko o be Egiptɛ, ɓɛɛ ŋma mɔ-dai beka fe mgbara ko o be Israɛl na.»

⁵GASA WAN gɔna ŋgimbi-a, a̧ tɔ̧a̧: «Sa̧a̧mɔ, GASA WAN tɛ de mɔ‘i sɛn zu nu.»

⁶Nɛ mɔ sa̧a̧ kaɗi, GASA WAN dee mɔ‘i, ɓɛɛ mɔ-dai ko o be Egiptɛ kum lɛŋ, ɓɛɛ mgbara o mɔ-dai ko o be Israɛl, ŋma kpɔk fe na.

⁷Wannu Egiptɛ saa o bíí mɛ kii mɔ; ŋma kpɔk mgbara o mɔ-dai ko o be Israɛl fe na. Zu mɔɔ nɔ‘i mbɛt lɛŋ, wannu Egiptɛ ŋgaia see, a̧ e ha̧ o be Israɛl mɛ yak na.

⁸GASA WAN tɔ̧ɔ̧ ha̧ Moisɛ in Arɔŋ: «Ɛ̀nɛ̀ káí mbula-gui dun er'nɛ́, ɓɛɛ Moisɛ a̧ a si ŋgɔn nɛ yi wannu Egiptɛ.

⁹Mbula-gui'i tɛ pɛsi nɛ tura-fuunu sɛn zu nú Egiptɛ lɛŋ. Mbula-gui'i tɛ de ha̧ tɛ o bi in o saɗi mɛ ha̧ nɛ kore dam nú Egiptɛ lɛŋ.»

¹⁰Wa kaia mbula-gui'i, ɓɛɛ wa nɛ sɛn tɛ wannu Egiptɛ. Moisɛ aa mbula-gui'i si ŋgɔn, ɓɛɛ tɛ o bíí in o saɗi ha̧ nɛ kore lɛŋ.

¹¹O wi-de-mɔɔ-kifi nyɛm gee nyɛma-a mɛ yor ti Moisɛ ɓɔna, wen tɛ-wa kpee nɛ kore in o dɔka be Egiptɛ mbɛt.

¹²GASA WAN ŋgaia kana see wannu Egiptɛ, ɓɛɛ a̧ kɔ̧ mɛ zii wen nú Moisɛ in Arɔŋ na, hee mɔ'ɔ nɛ GASA WAN baa tɔ̧ so ha̧ Moisɛ ga.

¹³GASA WAN tɔ̧ɔ̧ ha̧ Moisɛ: «Mɛ̀ kúr nɛ̀ tutuyɛ sut, mɛ̀ nɛ́ tɛ wannu Egiptɛ, mɛ̀ tɔ̧́ ha̧ a̧: GASA WAN, Sɔ̧ ko o be Hebreu tɔ̧a̧, mɛ̀ é ha̧ o dukbíí kɔ‘i mɛ yak ha̧ wa mɛ nɛ̀ɛ́ gasi wi.

¹⁴Kinii, wi tɛ tom o ŋgamɔ kɔ‘i lɛŋ si zu mɛ, zu o wi-de-tom kɔ-mɛ, zu dukbíí kɔ-mɛ mɛ iŋ‘e, ŋma bíí hee wi ga, bo zu nu na.

¹⁵Kà‘i nyɛi̧ so er-wi mɛ gusi mɛ in dukbíí kɔ-mɛ nɛ ŋga-zɛɛ, bó nɛ́ ɛ́nɛ́ tɛ̀ɛ́ bo zu nu’ɛ ɓɔna.

¹⁶Wi ee mɛ nɛ kpasa ha̧ mɛ mɛ zɔk ŋgai kɔ‘i, in wen ha̧ o bíí mɛ sa nin wi dam zu nu lɛŋ.

¹⁷Ɓɛɛ mɛ ɓɔna kana dora o bíí kɔ‘i tɛ yaka-a.

¹⁸Sa̧a̧mɔ tɛ kale ŋgimbi hee mɔ'ɔ ga, wi tɛ de ha̧ ŋga ɓɔrɔ mɛ ai a nu. Tɛ ku̧u̧naŋ nu mɛ hegɔ hɔ kinii, pɛrti ɓɔrɔ‘i tɛ ai hegɔ sɛn Egiptɛ na.

¹⁹Mɛ̀ tóm káí o mɔ-dai kɔ-mɛ in o mɔ kɔ-mɛ lɛŋ nɛ a̧a̧ zaŋbɛɛ a kɔ̧ tua. Kóó nɛ saɗi, kóó nɛ o bíí nɛ beka pii ɗoŋ kɔ̧ tua na, ɓɔrɔ tɛ tik zu wa, ɓɛɛ wa kuma lɛŋ.»

²⁰O ŋma mgbara o wi-de-tom ko wannu Egiptɛ dee kíì wen ko GASA WAN, ɓɛɛ wa fo o wi-de-tom in o mɔ-dai kɔ-wa a kɔ̧ tua.

²¹Ɓɛɛ o wi nɛ ee wen ko GASA WAN tɛ geemɔ ee o wi-de-tom in o mɔ-dai kɔ‘i ɓɔn zaŋbɛɛ.

²²GASA WAN tɔ̧ɔ̧ ha̧ Moisɛ: «Mɛ̀ nyɛ́í̧ dɔra kɔ-mɛ si yiwese ha̧ ɓɔrɔ mɛ ai dam nú Egiptɛ lɛŋ a zu o bíí, o saɗi in o nyɔnɔ kpɛɛfɔ nú Egiptɛ lɛŋ.»

²³Moisɛ nyɛi̧a dɔra kɔ‘i si yiwese, ɓɛɛ GASA WAN ɗai er tɛ kórò in ɓɔrɔ. A̧ dee ha̧ kórò mɛ mbaŋ in ha̧ ɓɔrɔ mɛ ai a nu sɛn nú Egiptɛ.

²⁴Ɓɔrɔ zaŋa ŋmaa in mbaŋa-kórò. Nɛ́ ŋga ɓɔrɔ nɛ bíí tɛ zɔk nɛti sɛn zu nú Egiptɛ na ŋgimbi nɛ nú Egiptɛ dee nɛnɛ.

²⁵Ɓɔrɔ tika zu nú Egiptɛ lɛŋ kum nɛ o bíí in o saɗi nɛ yaa zaŋbɛɛ, ɓɛɛ ɗaŋ o nyɔnɔ nu fɔ in mbii o te yinɛ lɛŋ.

²⁶Nɛ́ nú Gɔsɛn fara-duk ko o be Israɛl a̧ ɓɔrɔ hɔ sɛnɛ na ɓɛɛ.

²⁷Nɛ mɔ'ɔ nɛ wannu Egiptɛ toma bíí nɛ́ɛ̀ sa Moisɛ in Arɔŋ, ɓɛɛ a̧ tɔ̧ ha̧ wa: «Ɛ̧ɛ̧ kinii’ɛ, mi dee ɗaŋmɔ; GASA WAN nɛ́ wi-de-mɔ nɛ yuwar-a. Wen baa ɛɛ in o bíí kɔ‘m.

²⁸Ɛ̀nɛ̀ kɔ́fí GASA WAN ha̧ a̧ mɛ fo mbaŋa-kórò in ɓɔrɔ yinɛ, ɓɛɛ mi tɛ e'nɛ́ mɛ yak, ɛnɛ beka duk hɛ̧ɛ̧ siti ɓɔna.»

²⁹Moisɛ tɔ̧ɔ̧ ha̧ a̧: «Gboa-a kɔ‘m saaye, ɓɛɛ mi tɛ nyɛi̧ er-am sitɛ GASA WAN, ɓɛɛ mbaŋa-kórò tɛ kaɗi, ɓɔrɔ beka ai ɓɔna, ha̧ mɛ mɛ iŋ‘e nde, nù nɛ ko GASA WAN.

³⁰Ɓɛɛ kɔ-mɛ in o wi-de-tom kɔ-mɛ, mi iŋa'e ɛnɛ tɛ yu GASA WAN Sɔ̧ hɔ̧ɔ̧ na.»

³¹Be-nyɔnɔ[4] nɛ vui-a a̧a̧ sɛnɛ in be-fon ɗaŋa lɛŋ wen wa misa̧ só sáá kaɗi,

³²ɓɛɛ alkamaari in ŋma geɗek nyɔnɔ nɛ hɔɔ ŋmaa in a̧ nɛ wai so kɔ‘i nɛ ɗoŋ gboo kɔ-wa nɛ de-a zaŋ ŋgamɔ.

³³Moisɛ ee wannu Egiptɛ, ɓɛɛ a̧ gbo saaye, a̧ nyɛi̧a er-a sitɛ GASA WAN, ɓɛɛ kórò, mbaŋa-kórò in ɓɔrɔ kaɗi hɔa-a zu nu.

³⁴Ŋgimbi nɛ wannu Egiptɛ zɔka kórò, mbaŋa-kórò in ɓɔrɔ gɔna, a̧ tika tɛ dee ɗaŋmɔ kɔ̧-a̧ woyo. A̧ dee ŋgazu in o wi-de-tom kɔ̧-a̧ mbɛt.

³⁵See wannu Egiptɛ ŋgaia, ɓɛɛ a̧ e ha̧ o be Israɛl mɛ yak na, hee mɔ'ɔ nɛ GASA WAN baa tɔ̧ so nɛ nú Moisɛ ga.