Read Northwest Gbaya JOB 10 Bible Online

JOB 10 - Northwest Gbaya bible

JOB 10

¹Duka-a siti nyɛm am ɓɔna, mi beka dor aia-nú kɔ‘m ɓɔna; mi tɛ tɔ̧ wen ha̧ Sɔ̧ nɛ tu̧u̧-see:

²Mi tɛ tɔ̧ ha̧ Sɔ̧‘e, k’ɛ́nɛ́ de mɔ in am hee wi nɛ̀ wen tika ga na, ɛ̀nɛ̀ tɔ̧́ gba̧a̧ kpaa-a n’ɛ̀nɛ́ kpaa in am’ɛ.

³Ɛ́nɛ́ kpá nɛ́ desee tɛ dee ŋgamɔ in am, é nɛ̀ mɔ n’ɛnɛ dee nɛ er'nɛ́ tɛ geemɔ, yor nɛ ɗoŋ ee-zu-mɔ ko o wi-ɗaŋ nde?

⁴Gbaayí‘nɛ́ zɔk mɔ hee ko bíí ga nde? Zɔkamɔ k’ɛ́nɛ́ gan ko bíí na?

⁵Duka-a k’ɛ́nɛ́ so hee ko bíí nɛ fe fee’ɛ ga? Pɛ duka-a k’ɛ́nɛ́ nɛ́ pɛ duka-a ko bíí nde?

⁶Wen ge s’ɛnɛ kii yɔɔ kaya kɔ‘m ge? Ɛ́nɛ́ kíí ndaa ɗaŋmɔ kɔ‘m wen ge?

⁷Ɛ́nɛ́ iŋa nɛ̀ de-a'e, mi de ŋma ɗaŋmɔ na, ɓɛɛ ŋma bíí mɛ ɓar am er'nɛ́ yinɛ bo na mbɛt.

⁸Er'nɛ́ mana'm e nù, ɓɛɛ kinii, ɛnɛ kpaia taamɔ mɛ ɗaŋ am yinɛ!

⁹Tɛ‘nɛ́'ɛ mbaŋ ɗoŋ-aa ndé, ɛ́nɛ́ ɓoo am hee mɔ'ɔ nɛ‘i ɓo nɛ gii’ɛ ga; hegɔ, ɛnɛ tɛ de ha̧‘m mɛ kifi fuunu woyo?

¹⁰Bo nɛ ɛnɛ'ɛ dee ha̧‘m mɛ fok hee yibere ga, ha̧‘m mɛ kaŋ hee kaŋa yibere ga na nde?

¹¹Ɛnɛ dea'm nɛ gba̧a̧ in ɗaɗi, ɓɛɛ ɛnɛ kpe tɛ‘m nɛ ndàrá in mur.

¹²Ɛnɛ dee ha̧‘m mɛ duk kpasa, ɛnɛ zɔka'm nɛ de yí, ɓɛɛ ɛnɛ pɛm ɔmi kɔ‘m nɛ de-a.

¹³Ɗoŋ mɔɔ nɔ‘i lɛŋ, mɔ n’ɛnɛ ta nɛ kɔ̧ see'nɛ́ wen dea-a in am nɛ mɔ'ɔ:

¹⁴Kà‘m dé ɗaŋmɔ, ɓɛɛ ɛnɛ baa'm ɓɔn nú-a; kà‘m yɔ́ kaya, ɛnɛ e'm gee na.

¹⁵Kà wen tík am, búù baa'm; kà‘m dé mɔ nɛ yuwar-a, mi ba zu'm nɛ ŋgɔn na mbɛt, foe baa'm dík-dík, bɔnɛ kɔ‘m gbɛ‘m hee dɔ̧ɔ̧ ga.

¹⁶Kà‘m kúr, ɛnɛ ndaka'm hee dila ga, ɓɛɛ ɛnɛ foo o ŋgaŋamɔ k’ɛ́nɛ́ a zu'm woyo.

¹⁷Ɛnɛ nasa'm woyo, nyimsea k’ɛ́nɛ́ kura zu'm woyo, o wi-biro kpai nɛ̀ ŋmaa pii zu'm.

¹⁸Wen ge ɛnɛ foo am gbonɛ nɛ kɔ̧ zaŋ nàà kɔ‘m ge? Mi tɛ̀ɛ́ fe, bó nɛ́ yí bíí tɛ̀ɛ́ zɔk so'm na.

¹⁹Tɛ̀ɛ́ duk so hee wa ko'm na ga, wa tɛ̀ɛ́ ba'm nɛ̀ kɔ̧ zaŋ pi̧ kɔ̧ pɛsi.

²⁰Oi zɛ duka-a kɔ‘m zu nù dɔk na ɓɛɛ kaɗi. Ɛ̀nɛ̀ é ha̧‘m ɔm benaŋ à̧‘m kpá be desee,

²¹nɛti ha̧‘m mɛ yak ɓɔn si ɗɔŋgɔ-gba-tum mɛ;

²²sɛn hi̧i̧ gɔna-ndaa-zan nɛ́ ti-tum, nɛ́ ɗuka tum a̧ kpe zu o yukuta mɔ nɛ a̧a̧ hi̧i̧, ɓɛɛ sa̧a̧mɔ fara'i nɛ́ tum kpɔ̧ɔ̧-kpɔ̧ɔ̧.