Read Northwest Gbaya JOB 11 Bible Online

JOB 11 - Northwest Gbaya bible

JOB 11

¹Nɛ mɔ'ɔ nɛ Sɔfar be Naama baa wen ɓɛɛ tɔ̧:

²Wi beka kifi nú ha̧ wi nɛ tɔ̧ wen nɛ dɔka-a na? Nɛ́ iŋa-war-wen a̧ de ha̧ wen ko bíí mɛ tan nde?

³Bura wen kɔ-mɛ tɛ de ha̧ bíí mɛ kpe nú nde? Mɛ tɛ mam bíí, ɓɛɛ wi beka gai mɛ na nde?

⁴Mɛ tɔ̧a̧: «Wen kɔ‘m’ɛ nɛ́ kpasawen, wi nɛ́ sa̧a̧-bíí yi Sɔ̧!»

⁵Kà Sɔ̧ tɔ̧́ so wen ha̧ mɛ, kà a̧ hú̧í̧ so nú-a mɛ kifi nú ha̧ mɛ,

⁶kà a̧ úsí so hu̧sa̧mɔ nɛ duk tɛ iŋa mgbara mɔ kɔ̧-a̧ ha̧ mɛ, mɛ́ tɛ̀ɛ́ ìŋ ndé, Sɔ̧ de mɔ in mɛɛ oi ɗaŋmɔ kɔ-mɛ lɛŋ na.

⁷Iŋa-mgbara-mɔ ko Sɔ̧ ɔ gasa gan zu taamɔ ko bíí. Mɛ nyɛma so mɛ iŋ ndaa ɗukamɔ ko Sɔ̧, ha̧ mɛ mɛ iŋ ndaa gasamɔ ko Wan nɛ a̧a̧ nɛ ŋgayamɔ lɛŋ nde?

⁸Gasamɔ‘i kusa gan yiwese: ŋma mɔ̀ɔ́ de bo na. A̧ ɔ ɗuka gan fara nɛ o bíí nɛ fea ya sɛnɛ: ge a'i tɛ iŋ sɛnɛ ge?

⁹Gasamɔ ko Sɔ̧ gasa gan nù, a̧ pɛsa gan gba-tɔp mbɛt.

¹⁰Kà Sɔ̧ gbó mɛ ba bíí pi̧ zɔɓɔ, kà a̧ sá bíí ti kita, o'o tɛ si kafɛ o?

¹¹Wen kɔ̧-a̧, a̧ iŋa o wi-de-ndela; bó nɛ́ a̧ mbaɗi nɛ mɔ sɛka a̧ iŋa ɗaŋmɔ nɛ bíí de na.

¹²Kà wi-iŋ-mɔ-na nɛ́ iŋa mɔ, ɓɛɛ tuifuu-zaŋbɛɛ nyɛma mɛ iŋ mgbara mɔ[10] mbɛt.

¹³Ɓɛɛ war kɔ-mɛ, Job, mɛ̀ kífí see-mɛ ha̧ Sɔ̧, mɛ̀ gɔ́m er ha̧ a̧.

¹⁴Kà ɗaŋmɔ nɛ́ baa er-mɛ, mɛ̀ síŋ pi̧taŋ; mɔɔ-ɗaŋ a̧ ká duk kɔ̧ tua kɔ-mɛ na mbɛt.

¹⁵Hegɔ, mɛ tɛ ba zu-mɛ nɛ ŋgɔn, mɛ tɛ yor mitak, kíì beka de mɛ na.

¹⁶Tɛ-mɛ tɛ bi ɗoŋ bɔnɛ kɔ-mɛ; mɛ tɛ zɔk wa hee yì a̧ foka so yak ga.

¹⁷Duka-a kɔ-mɛ tɛ de hee nyɛka-a ko wese-bɛɗɛ-zu ga; tum tɛ duk nɛ́ gɔna ndaa-zan ti mɛ.

¹⁸Mɛ tɛ iŋ nɛ dea'e, ŋma mɔɔ-e-nɛ ta a̧a̧ sɛnɛ; mɛ tɛ zɔk mɔ katɛ mɛ lɛŋ ɔ dee, ɓɛɛ mɛ tɛ ɔ nù nɛ ga̧a̧-see.

¹⁹Mɛ tɛ ɔm tɛ-mɛ ɓɛɛ bíí beka fo tɛ-mɛ na; o bíí nɛ dɔka-a tɛ kii ha̧ mɛ mɛ zɔk wa nɛ de yí.

²⁰Yí o wi-ɗaŋ tɛ ba tum, wa beka kpa fara hu̧sa̧-a̧ na; mɔɔ-e-nɛ-ta kɔ-wa nɛ́ fio ɓɛɛ.