Read Northwest Gbaya JOB 12 Bible Online

JOB 12 - Northwest Gbaya bible

JOB 12

¹Nɛ mɔ'ɔ nɛ Job kifa nú:

²Nɛ mbetɛ, ɛ́nɛ́ tɔ̧́ nɛ wen oi nú bíí nù lɛŋ, iŋa-mgbara-mɔ tɛ fe kànà in'nɛ̀ɛ́.

³Mi mbɛt mi iŋa taa mɔ nɛ de-a hee ɛnɛ ga, ŋma mɔ n’ɛnɛ gana nɛ‘m bo na! Wi nɛ̀ bó nɛ̀ iŋa-mgbara-mɔ hee k’ɛ́nɛ́ na ga nɛ o?

⁴Mɔɔ-zɛkɛɗi ko o sɛm kɔ‘m nɛ‘m. Mi hiɗa mɔ sitɛ Sɔ̧ nɛ zii so aia-nú kɔ‘m, ɓɛɛ mi wi-de-mɔ nɛ yuwar-a nɛ de ɗaŋmɔ na, kifa duk nɛ́ mɔɔ-zɛkɛɗi ko o bíí.[11]

⁵Búù à̧ bá wi-bɔnɛ! Taamɔ ko wi-bɔtɛ nɛ̀ wa tɔ̧ zu bíí nɛ́ naŋ mbali ŋmaa nɛ mɔ‘i.

⁶Tua ko o wi-ɓar-mɔ er-wi ya tɛ ga̧a̧mɔ; o wi nɛ kii nú Sɔ̧ ya kɔ‘i nɛ de-a wen wa iŋa'e Sɔ̧ tɛ gbak wi.

⁷Kà mɛ ák o saɗi, wa tɛ usi mɔ ha̧ mɛ, kà mɛ ák o nɔ̧́í̧, wa tɛ yambii mɔ ha̧ mɛ,

⁸kà mɛ tɔ̧́ nyɛrɛ in nù, a̧ tɛ usi mɔ ha̧ mɛ; o zoro ɗɔɔ yì tɛ tɔ̧ ha̧ mɛ mbɛt.

⁹Mgbara o saɗi nɔ‘i, nɛ́ o'o iŋ‘e nɛ́ er GASA WAN a̧ de mɔ lɛŋ na o?

¹⁰Sɛn tɛ ŋgai kɔ̧-a̧ a̧ a̧ kasi nɛ ɔmi ko mɔ lɛŋ n'aa dea, nɛ́ a̧ a̧ kasi ɔmi nɛ duk tɛ bíí lɛŋ.

¹¹Bíí‘e «Zer-wi iŋa kɛ̧ɛ̧ mgbara wen, hee mɔ'ɔ nɛ kɔ̧ nú-wi kpa nɛ nyɔ̧ɔ̧ nyɔŋmɔ'ɛ ga.

¹²Iŋa-mgbara-mɔ nɛ́ mɔ ko o sɔkawi; wi kpa iŋamɔ tɛ duka-a ɗoŋ-aa nyɛi̧.»

¹³Ɓɛɛ war kɔ‘m n'am iŋa, iŋa-mgbara-mɔ in ŋgayamɔ nɛ́ ko Sɔ̧; tɔ̧ɔ̧ mbɔrɔ in iŋamɔ mbɛt nɛ kɔ̧-a̧.

¹⁴Kà a̧ yáí mɔ a nù kaɗi, ŋma bíí kpɔk mɛ ɗafi mɔ‘i woyo bo na; kà a̧ pí̧ bíí zɔɓɔ kaɗi, ŋma wi gbo wi’ɛi pi̧ nù bo na.

¹⁵Kà a̧ dór kórò, gasa kaara yora; kà a̧ dák er tɛ yì, ɓɛɛ ɗaŋa nù lɛŋ.

¹⁶Ŋgai in de sɔnti nɛ́ kɔ̧-a̧, o wi-ɔr-bíí in o wi nɛ wa ɔr lɛŋ duk kɔ̧ er-a.

¹⁷A̧ dee ha̧ o gasawi mɛ nɛ nɔ̀ nɛ géé naŋ, ɓɛɛ a̧ pi̧ mgbélé tɛ o wan-gɔn-kita.

¹⁸A̧ kpɔ̧i̧a̧ laa-wan tɛ o wannu yinɛ, ɓɛɛ mar nɛ túí ndaa-wa.

¹⁹A̧ dee ha̧ o wi-ɗafi-sɔ̧ mɛ nɛ nɔ̀ nɛ géé naŋ; a̧ dee ha̧ mɔ nɛ duk kpoo nɛ kpoo mɛ yambali.

²⁰A̧ dora leɓe wi-iŋ-tɔ̧ɔ̧-wen; a̧ ɗaŋa iŋa-mgbara-mɔ ko o sɔkawi.

²¹A̧ dee ha̧ bíí mɛ e o tu̧u̧-tɛ-bíí tɛ geemɔ, a̧ dee ha̧ ŋgai ko o gasa wannu mɛ kaɗi.

²²A̧ kpɔ̧i̧a̧ laa-tum tɛ ɗuka fara yinɛ, ɓɛɛ de ha̧ mɔ nɛ yaa ti-tum kpɔ̧ɔ̧-kpɔ̧ɔ̧ mɛ ya tɛ sa̧a̧mɔ.

²³A̧ dee ha̧ dukbíí mɛ kpa ŋgai, ɓɛɛ a̧ de ha̧ wa mɛ tik; a̧ dee ha̧ wa mɛ ba nù, ɓɛɛ a̧ zik e wa nɛ bara woyo.

²⁴A̧ dee ha̧ taamɔ ko o wan mɛ gbo zu nù kɔ-wa, ɓɛɛ a̧ de ha̧ wa mɛ yambali pofi nɛnɛ nɛ ŋga-gbárà.

²⁵Sɔ̧ dee ha̧ wa mɛ tam mɔ nɛ ti-tum nɛnɛ, sa̧a̧mɔ bo na, naŋ-wa mbali nɛ ŋmaa hee wi-gbɛ-dɔ̧ɔ̧ ga.