Read Northwest Gbaya JOB 15 Bible Online

JOB 15 - Northwest Gbaya bible

JOB 15

¹Nɛ mɔ'ɔ nɛ Elifaz be Teman baa wen woyo, ɓɛɛ tɔ̧ ha̧ Job:

²Wi-iŋ-mgbara-mɔ záŋ nú záŋ nde? Géé tum-wen tɛ gbo nɛ kɔ̧ nú-a nde?

³A̧ tɔ̧ so ya-zu-wen tɔ̧ɔ̧? A̧ tɔ̧ so wen nɛ gba̧a̧-a̧ bo na tɔ̧ɔ̧?

⁴Ɓɛɛ kɔ-mɛ, mɛ dor nɛ o ŋma bíí tɛ taa mɔ wen yuu kíí Sɔ̧; mɛ ɗaŋ nɛ taamɔ ko bíí sitɛ Sɔ̧.

⁵Nɛ́ ɗaŋmɔ nɛ̀ mɛ dea a̧ ba mɛ tɔ̧ nɛ wen nɔ'ɔ; ɓɛɛ mɛ́ tɔ̧́ wen hee wi-ɔr-wi ga.

⁶Nɛ́ nú-mɛ a̧ de ha̧ wen mɛ ba mɛ, bo nɛ mi na, nɛ́ ndàrá nú-mɛ a̧ de sedaako zu mɛ.

⁷Kuti bíí nɛ̀ wa koo nɛ́ mɛ nde? Wa koo mɛ nɛti ha̧ o be kaya nde?

⁸Mɛ duka oi ee-zu-mɔ ko Sɔ̧, sɛka mɛ kpa nɛ iŋa-mgbara-mɔ nde?

⁹Mɔ nɛ mɛ iŋa n’ɛɛ iŋ k’ɛɛ na nɛ ge? Ŋma mɔ nɛ mɛ yambaia n’ɛɛ yambii k’ɛɛ na nɛ ge?

¹⁰Mgbara yɛ hɛ̧ɛ̧ bíí a̧a̧ sɛnɛ nɛ zu fɛŋa kaɗi; pɛ wa dɔka zu nù'ɛ gan ko dáà kɔ-mɛ.

¹¹Mɛ taa gaia mɛ nɛ Sɔ̧ gai tɛ o ga̧a̧ wen n’ɛɛ tɔ̧ ha̧ mɛ'ɛ nyɛm mɛ na nde?

¹²Nɛ́ ge a̧ ŋgai see-mɛ ge? Gba̧a̧ ko zɔka yɛ nɛ̀ ɗaŋ yí hee ge?

¹³Nɛ́ Sɔ̧ a̧ mɛ de nyimsea in a̧, tɔ̧ nɛ zɔm wen hegɔ'ɔ nde?

¹⁴Bíí nɛ́ ge sa tɛ tɔ̧‘e wi ɔ sa̧a̧ ge nde? Bem ko okoo nɛ́ ge kà tɔ̧́‘e, wi dé mɔ nɛ yuwar-a ge?

¹⁵Sɔ̧ e ta nɛ o betom kɔ‘i na, yiwese sa̧ yí-a na mbɛt;

¹⁶ɓɛɛ mɛ́ nɛ́ bíí nɛ̀ ɗaŋmɔ yera pi̧ nù duk nɛnɛ, nɛ̀ yí-nɔɔ kɔ̧-a̧ nɛ́ ɗaŋmɔ'ɛ, a̧ Sɔ̧ tɛ e nɛ ta nde?

¹⁷Mɛ̀ zii, mi kɔ̧ɔ̧ mɛ usi mɔ ha̧ mɛ, mi tɛ tɔ̧ mɔ n'am zɔka ha̧ mɛ.

¹⁸Mɛ̀ nɛ́ usamɔ lɛŋ nɛ̀ o wi-iŋ-mgbara mɔ usi ha̧ bíí, nɛ́ o mɔ nɛ o dáà kɔ-wa usa so ha̧ wa.

¹⁹Sɔ̧ ha̧a̧ so nù ha̧ wa ɛ̀nɛ́-wa ɓɛɛ, ŋma gɔni bíí ye so mgbara wa na.

²⁰Duka-a ko wi-ɗaŋ nɛ́ dita see ɓɔnsɛnɛ; Sɔ̧ gɔna pɛ duka-a ko wi-de-ŋgamɔ gɔn.

²¹A̧ zii nɛ giti mɔɔ-kíì ŋgimbi lɛŋ. Ŋgimbi n'aa duk tɛ ga̧a̧mɔ, ɓɛɛ ŋma ŋga-wi tɛɛ tik zu a̧.

²²A̧ iŋ yuwar kpasa-a tɛ tum na; gba-paa hai nɛ a̧.

²³Tama pɛm nɛ wɔr-aa mɛ nyɔŋ; a̧ iŋa'e wese bɔnɛ hɛɗa kaɗi.

²⁴Ɗaŋsee in dita-see nɛ́ mɛ́ tik zu a̧, hee mɔ'ɔ nɛ ŋma wannu nɛ́ nɛ̀ biro’ɛ ga.

²⁵Mɔ nɛ hɔ zu wi-de-ŋgazu in Sɔ̧, Wan nɛ a̧a̧ nɛ ŋgayamɔ lɛŋ, in nɛ̀ we zu nɛ̀ a̧, nɛ́ mɔ‘i.

²⁶Wi’ɛi gu ɗɔɔ ndota ŋgee kɔ‘i, gbo nɛ biro sitɛ Sɔ̧.

²⁷Zɔ́k de saŋa yí-a, in de bɔɗa tɛ-a!

²⁸A̧ duka de ye sɛn bɛɛ-oi, kɔ̧ o tua nɛ bíí nyɛm so mɛ ɔ sɛnɛ ɓɔna, nɛ̀ gbin so kɔ‘i gbin a nù.

²⁹A̧ beka kpa mɔ na, mbɔi kɔ̧-a̧ beka yor na mbɛt; nin-a beka hur zu nù ɓɔna.

³⁰A̧ beka gbo ɗɔɔ tum na; a̧ tɛ duk hee ŋma te nɛ búk kaia o do-a a taŋ, ɓɛɛ nɛ̀ wee dɔɔ o gbaa er-a kor lɛŋ ga.

³¹A̧ yɔ nɛ kaya wen n'aa e ta nɛ ɔramɔ kɔ̧-a̧, wen mɔɔ-oi tom kɔ̧-a̧ tɛ duk nɛ́ ɔramɔ.

³²Mɔ‘i tɛ hɔ nɛti sa a̧ fea, hee ŋma gbaa-er-te nɛ̀ kora ga.

³³Mɔ kɔ̧-a̧ tɛ tik hee mɔ'ɔ nɛ waya-nyak-dɔ̧ɔ̧ nɛ̀ tɛ sɔk na ai nɛnɛ a nù, kóó hee mɔ'ɔ nɛ do te-nɔ̧́ ai nɛnɛ a nù'ɛ ga.

³⁴Nɛ mbetɛ, o wi-ɗaŋ tɛ yar ndɔra; wee tɛ dɔ tua ko wi-de-mɔ lɛŋ wen sede.

³⁵Wi nɛ̀ bá zaŋ ɗaŋmɔ ko nɛ̀ bɔnɛ pi̧ nù, ɓɛɛ waya-mɔ kɔ̧-a̧, nɛ́ ɔramɔ à̧ à̧ tɛ́ kpa ɓɔnsɛnɛ.