Read Northwest Gbaya JOB 19 Bible Online

JOB 19 - Northwest Gbaya bible

JOB 19

¹Nɛ mɔ'ɔ nɛ Job kifa nú, ɓɛɛ tɔ̧:

²Ɛnɛ tɛ kaɗi ha̧a̧ tu̧u̧-see ha̧‘m mɛ gese ge? O dɔka wen n’ɛnɛ nukuri nɛ‘m’ɛ tɛ kaɗi mɛ gese ge?

³War ɓu a̧ ɛnɛ da̧a̧ nɛ‘m kinii; foe de'nɛ́ tɛ dee bɔnɛ in am na?

⁴Kóó mi dee so nɛ ɗaŋmɔ nɛ mbetɛ, ɗaŋmɔ‘i tɛ̀ɛ́ zɔk nɛ‘m ɛ̀n’ám.

⁵K’ɛ̀nɛ̀ nɛ́ kɔ̧ɔ̧ mɛ gasi zu'nɛ́ zu'm, usi nɛnɛ ndé, mɛ̀ nɛ́ wen zu ŋma mɔ n'am dea,

⁶a̧ búù ba'm wen-aa, ɛ̀nɛ̀ íŋ nde, nɛ́ Sɔ̧ a̧ dee hegɔ in am, nɛ́ a̧ a̧ yukuta'm nɛ̀ yɔk kɔ̧-a̧.

⁷Kà‘m híɗí mɔ wen ŋgamɔ nɛ kpaa'm, ŋma bíí kifi nú ha̧‘m na; kà‘m kíí ha̧ wa mɛ gɔn kita nɛ de-a, mɔ‘i de hegɔ na mbɛt.

⁸A̧ kpee yuwar gɔn nɛ̀ ti'm, ɓɛɛ a̧ de ha̧ yuwar kɔ‘m mɛ ba tum kpɔ̧ɔ̧-kpɔ̧ɔ̧.

⁹A̧ baa gasamɔ kɔ‘m yinɛ, a̧ ɗaŋa de hura-nin-am mbɛt.

¹⁰A̧ gbina gba̧a̧ tɛ‘m lɛŋ, mi tika; a̧ zuɗa mɔɔ-e-nɛ-ta kɔ‘m yinɛ hee mɔ'ɔ nɛ‘i zuɗi nɛ te’ɛ ga.

¹¹Nyimsea kɔ̧-a̧ kura in am, ɓɛɛ a̧ zɔk am hee wisɛn kɔ̧-a̧ ga.

¹²O wi-biro kɔ̧-a̧ lɛŋ mɔi̧a ŋmaa, wa wɛna war hɔ tɛ‘m, ɓɛɛ wa kɛr tua kɔ‘m e see-a.

¹³A̧ ndaka o nya'm nyɛi̧ nɛ‘m, o wi nɛ iŋa so'm yu nɛ‘m.

¹⁴O bíí ɗoŋ-am pɛsa lɛŋ, tɛ o mgbák sɛm kɔ‘m bìí ɗoŋ-am mbɛt.

¹⁵O bíí n'am kpɛka so kɔ̧ tua kɔ‘m in o kó-de-tom kɔ‘m zɔk am hee gɔni bíí ga; o kó-de-tom kɔ‘m zɔk am hee ŋma gɛnɛ ga, wa kɔ̧ mɛ zɔk am yí-wa ɓɔna.

¹⁶Kà‘m sá wi-de-tom kɔ‘m, a̧ kɔ̧ sara nú‘m na, kóó mi aia nú ha̧ a̧ mbɛt.

¹⁷Kóò kɔ‘m kɔ̧ pɛr nú‘m na, mi de yí o bem kɔ‘m ɓɔna.

¹⁸Kóó nɛ́ o geɗek bem mbɛt, zɛkɛɗi nɛ́‘m; kà‘m kúr, ɓɛɛ wa mama'm.

¹⁹Kà o gasa sɛm kɔ‘m zɔ́k am, ɓɛɛ kíì dee wa; o bíí n'am kɔ̧ɔ̧ nyɛmna kifi nɛ nú tɔ̧ nɛ̀ ɗaŋ wen ha̧‘m.

²⁰Ndàrá tɛ‘m in mur tɛ‘m ndaɗa kpaa-kpaa, mi zɔk nɛ bɔnɛ hɔ tɛ gba̧a̧ tɛ‘m mɛ.

²¹O sɛm kɔ‘m, ɛ̀nɛ̀ dé ko ha̧‘m, wen er Sɔ̧ gusa'm.

²²Wen ge s’ɛnɛ ndak ɗoŋ-am hee Sɔ̧ de ga, wɔ tɛ‘m busi'nɛ́ na ge?

²³Ho! Mi tɛɛ́ kɔ̧ so ha̧ wa yɔr o wen kɔ‘m, a zaŋ kalata.

²⁴Wa a̧ yɔr nɛ̀ boi zu tuŋgu, ha̧ ɓɔn zu ta ɓɔnsɛnɛ.

²⁵Mi iŋa wi-kundi-ari[14] kɔ‘m duk kpasa; nɛ́ a̧ a̧ tɛ tɔ̧ sɔŋkur wen zu'm zu nù'ɛ.

²⁶Ɗoŋ nɛ ndàrá-tɛ‘m tɛ́ mbɔr or a nù lɛŋ, mi tɛ́ duk kànà nɛ̀ géé mur-tɛ‘m mbaɗi nɛ̀ Sɔ̧.

²⁷Mi nɛ tɛ‘m a̧ tɛ mbaɗi a̧, yí‘m tɛ zɔk a̧, ɓɛɛ a̧ beka bó nɛ́ gɛnɛ wen am na,[15] see-am gbɛŋ gbɛŋ kɔ̧ a̧ mɛ, tɛ pɛma-mɔ.

²⁸K’ɛ̀nɛ̀ tɔ̧́: «Ɛ̀ɛ̀ úsí nɛ́ ge bɔnɛ ge ha̧ a̧ ge, gbákná, ɛ́ɛ́ kpaa war ha̧ kita a̧ tik a̧ ge?» ndé,

²⁹ɓɛɛ ɛ̀nɛ̀ yú gba-paa, ɛ́nɛ́ nɛ̀ tɛ‘nɛ́, wen mɔɔ-oi nyimsea kànà nɛ́ gba-paa; hegɔ, ɛ́nɛ́ tɛ iŋ ndé, gɔna-kita a̧a̧ sɛnɛ.