Read Northwest Gbaya JOB 20 Bible Online

JOB 20 - Northwest Gbaya bible

JOB 20

¹Nɛ mɔ'ɔ nɛ Sofar be Naama baa wen, ɓɛɛ tɔ̧:

²Mi zia, hegɔ mi kɔ̧ɔ̧ mɛ kifi nú, tɛ‘m nak nak mɛ tɔ̧ wen.

³Mi zia dara tɛ o kifa nú nɔ‘i, ɓɛɛ taamɔ kɔ‘m hee kifa-nú ga, nɛ́ mɔ'ɔ.

⁴Mɛ́ íŋ'è, ŋgimbi nɛ Sɔ̧ dee nɛ bíí e zu nù hɔ kinii,

⁵gana-zu-mɔ ko wi-ɗaŋ duk ɗoŋ-aa nyɛi̧ na, ɓɛɛ desee ko wi-de-ɗaŋmɔ nɛ́ tikiɗi ɓɛɛ, na nde?

⁶Kóó zu-a too so yiwese, kóó a̧ kusa so hee ge,

⁷a̧ tɛ de geemɔ hee ɗɔr n'aa sɔ̧ pi̧ taŋ ga, ɓɛɛ o bíí nɛ̀ iŋa so a̧ beka iŋ oi-aa ɓɔna.

⁸A̧ tɛ yambali hee ɔɔ-zu ga, a̧ tɛ yak hee hɔɔ-zu nɛ tɛ ha̧ bíí ɓɛɛ yaka’ɛ ga.

⁹Gbaayí nɛ̀ zɔka so a̧ nɛti beka zɔk a̧ ɓɔna, wi zɔk a̧ nú tua kɔ̧-a̧ ɓɔna.

¹⁰A̧ tɛ yoɓi nɛ mɔ piiɗoŋ, ɓɛɛ o bem kɔ̧-a̧ tɛ kpe mɔ ko o wisan siɗoŋ ha̧ wa.

¹¹Ŋgimbi ŋgaiwi kɔ̧-a̧, ŋgai a̧a̧ so tɛ-a nyɛmna, ɓɛɛ kinii, a̧ tɛ ɔ nɛ ɗɔɔ nù nɛ̀ oi ŋgai kɔ̧-a̧‘i.

¹²Kà ɗaŋmɔ a̧ ɔɔ so nyɔ̧ɔ̧ nú-a, nɛ mɔ'ɔ n'aa mana e ɗɔɔ leɓe-a,

¹³kasi nɛnɛ, a̧ e duk na, kpa nɛ̀ nyɔ̧ɔ̧-a̧a̧ gɔn leɓe-a,

¹⁴nyɔŋmɔ‘i tɛ kpai, ɓɛɛ kifa ma̧a̧da̧ ko kóró sɛn kɔ̧ zaŋ-aa mɛ.

¹⁵A̧ gura so o dɔka kpaamɔ, ɓɛɛ Sɔ̧ tɛ de ha̧ a̧ mɛ ɔ̧i̧ gbonɛ.

¹⁶A̧ zɔɓi só nɛ ma̧a̧da-firi, ɓɛɛ nɛ́ leɓe kóró a̧ tɛ gbɛ a̧.

¹⁷Wi’ɛi beka zɔk foka nɔ̧́, kà bó nɛ̀ nɔ̧́ gɔrɔ in yibere na mbɛt.

¹⁸A̧ beka nyɔŋ mɔɔ-oi tom kɔ̧-a̧ na; a̧ beka kpa zɔm bɔtɛ mɔɔ-oi gɛnɛ kɔ̧-a̧ na.

¹⁹Hee mɔ'ɔ n'aa dee bɔnɛ in o wisan, e nɛ wa duk, zu̧ nɛ̀ tua, ha̧ a̧ mɛ mbo mboo bo na,

²⁰hee mɔ'ɔ nɛ wɔ-mɔ gana zu a̧ ga, a̧ beka ba ŋma mɔ n'aa kɔ̧ɔ̧ so nyɛmna er-a na.

²¹Ŋma mɔ n'aa kpa so tɛ wɔ mɔ kɔ̧-a̧ na, bo na; mɛ̀ nɛ́ hegɔ ɗoŋ bɔtɛ kɔ̧-a̧ beka nyɛi̧ na.

²²Ŋgimbi nɛ kpaamɔ tɛ gan zu a̧, a̧ tɛ duk tɛ dita see, ɓɛɛ gasa bɔnɛ tɛ tik zu a̧.

²³Mɔ n'aa tɛ nyɔŋ zaŋ-aa sur nɛnɛ nɛ́ mɔ'ɔ: Sɔ̧ tɛ fo ŋga wee nyimsea kɔ‘i pi̧ zu a̧, hee mɛ̀ nɛ́ nyɔŋmɔ a̧ ai a zu-a ga.

²⁴Kà a̧ yú mɔ nú boi, ɓɛɛ góò-ndɛrɛ pi̧i̧ a̧ sar.

²⁵Góò tɛ pi̧ yí-see-aa sar nɛ ɗoŋ-aa; kà a̧ dák góò yinɛ, ɓɛɛ kíí-fio tika zu a̧.

²⁶Tum tɛ ndak ɗoŋ-aa hɔ fara hu̧si mɔ kɔ̧-a̧ mɛ lɛŋ; ŋma wee nɛ‘i ye na tɛ dɔ a̧, ɓɛɛ dɔɔ oi mɔ kɔ̧ tua kɔ̧-a̧ bíí wee lɛŋ.

²⁷Yiwese tɛ gba ndaa ɗaŋmɔ kɔ̧-a̧, ɓɛɛ nù misa̧ in a̧.

²⁸Ŋga foka-yì tɛ ba zu duk nɛ tua kɔ̧-a̧, ɓɛɛ tua'i baa yì yak wese nyimsea ko Sɔ̧.

²⁹Mɔ nɛ Sɔ̧ ɗafi pɛm nɛ wi-ɗaŋ, a̧‘i; mɔɔ-oi nɛ Sɔ̧ e pɛm nɛ a̧ nɛ mɔ‘i.