Read Northwest Gbaya JOB 21 Bible Online

JOB 21 - Northwest Gbaya bible

JOB 21

¹Ɓɛɛ Job kifi nú hee mɔ'ɔ ga:

²Ɛ̀nɛ̀ zíí wen kɔ‘m, h’ɛ́nɛ́ mɛ ha̧ ŋma be ga̧a̧-see ha̧‘m.

³Ɛ̀nɛ̀ nyɔ́ŋ nin'nɛ́ ha̧‘m tɔ̧ wen, kà‘m nɛ́ tɔ̧ɔ̧ wen h’ɛ́nɛ́ kaɗi, ɓɛɛ ɛ́nɛ́ nɛ́ kɔ̧ɔ̧ mɛ mam am, ɛnɛ mama.

⁴Bó nɛ́ mi ku̧i̧ nɛ mɔ zu bíí na, mi nak tɛ‘m géè na.

⁵Ɛ̀nɛ̀ zɔ́k am; kíì tɛ ba'nɛ́, ɓɛɛ ɛnɛ ee er nú‘nɛ́.

⁶Kà‘m tá mɔ zu mɔ'ɔ, ɓɛɛ kíì dee am, tɛ‘m lɛŋ nak nak:

⁷Wen ge sa o wi-ɗaŋ ya kpasa, sɔk nɛnɛ, ɓɛɛ ŋgai kɔ-wa dɔk nɛnɛ siti ge?

⁸O bem kɔ-wa gasi de gba̧a̧ mɔ nɛ̀ gbaayí-wa, ɓɛɛ wa zɔka o be-koo-wa mbɛt.

⁹Tua kɔ-wa duk tɛ ga̧a̧mɔ, ɓɛɛ kíì bo na, wen dɔra ko Sɔ̧ fo wa na.

¹⁰O wiwii ndai kɔ-wa daŋ nɛ o nana-a, ɓɛɛ wa koa, zaŋ-wa hɔ na.

¹¹O wi nɔ‘i e o bem mɛ de saa kpíɗí nɛnɛ, hɔ nɛ zaŋgule hee o sami ga, ɓɛɛ o geɗek-a yaa kɔ-wa yɔ nɛ yɔyɛ.

¹²Wa bíí nɛ gima nyɛm nɛ ɗoŋ bi̧ɔ̧ in kunde, wa zii nɛ giti fol de nɛ saa.

¹³Wa ya kɔ-wa tɛ bɔtɛ wese lɛŋ, ɓɛɛ wa zira si fara ko o fio mɛ ɔm tɛ-wa.

¹⁴Wa tɔ̧ɔ̧ so ha̧ Sɔ̧: «Mɛ̀ yú katɛ yɛ, wen ɛɛ kɔ̧ mɛ ba yuwar kɔ-mɛ na.

¹⁵Wi nɛ a̧a̧ nɛ ŋgayamɔ lɛŋ nɛ́ ge bíí ge h’ɛ́ɛ́ mɛ de tom ha̧ a̧ ge? K’ɛ̀ɛ̀ nɛ́ wora a̧, nɛ́ ge a̧ ɛ́ɛ́ tɛ kpa ge?»

¹⁶Nɛ́ wa a̧ kii bɔtɛ kɔ-wa nɛ tɛ-wa, ɓɛɛ ee-zu-mɔ[16] kɔ-wa duk nyɛi̧ nɛ Sɔ̧.

¹⁷Lamba ko o wi-ɗaŋ bi na, bɔnɛ kpa wa nɛ haya-a na; nyimsea ko Sɔ̧ tik zu wa bee na mbɛt.

¹⁸Zu-a'i, bíí a̧ tɔ̧ mbɛt'i: «Hara-búk a̧ kai wa yaknɛ hee puɗu ga, gba-búk-kórò a̧ ɓoɓi wa kai si ŋgɔn hee wa̧a̧ ga.»

¹⁹Bíí‘e ɗaŋmɔ ko dáà tik nɛ́ zu bem, ɓɛɛ kɔ‘m, Sɔ̧'ɔ̧ úsí bɔnɛ‘i ha̧ wa nɛ tɛ-wa ha̧ wa zɔk.

²⁰Wa a̧ zɔ́k tika-a kɔ-wa nɛ̀ yí-wa, ɓɛɛ nyimsea ko Wan nɛ a̧a̧ nɛ ŋgayamɔ lɛŋ a̧ tík zu wa.

²¹Ŋgimbi duka-a kɔ-wa nɛ́ kaɗa kaɗi, tua kɔ-wa tɛ de nɛ́ ge ha̧ wa ɓɔ ge?

²²Wi tɛ yambi iŋamɔ ha̧ Sɔ̧, a̧ n'aa gɔn kita zu o betom yiwese’ɛ nde?

²³Mgbara o bíí, o ŋma fe kɔ‘i zaŋ kpaamɔ, tɛ bɔtɛ in tɛ ga̧a̧mɔ;

²⁴nɛ̀ oi ŋmaŋa-a, in nɛ̀ oi ŋgai gba̧a̧-tɛ-wa mbɛt;

²⁵ɓɛɛ o ŋma fee kɔ‘i nɛ̀ ɗaŋsee, wa iŋ bɔtɛ na.

²⁶Wa tɛ ɔ nù in ŋmaa kpɔk ɗɔɔ nù, ɓɛɛ dɔk aa tɛ-wa yiitoo lɛŋ.

²⁷Kɔ‘m mi iŋa mɔ nɛ a̧a̧ kɔ̧ see'nɛ́, mi iŋa mɔ n’ɛnɛ ta see zu'm.

²⁸Ɛ́nɛ́ tɔ̧́‘e ndé, «Tua ko ŋga-wi’ɛ a̧a̧ déè, tua nɛ o wi-ɗaŋ ɔ so sɛnɛ'ɛ a̧a̧ déè?»

²⁹Ɛ́nɛ́ tɛ́ ak o wi-ɓir-war, ha̧ wa mɛ tɔ̧ mɔ nɛ wa zɔka h’ɛ́nɛ́ na nde?

³⁰Wese bɔnɛ, wi-ɗaŋ kpasa; wese nyimsea, nyimsea tik zu a̧ na.

³¹Nɛ́ o a̧ tɛ ak mɔ zu naŋanɔ kɔ̧-a̧ o? O'o tɛ usi bɔnɛ ha̧ a̧ oi mɔ n'aa dee so o?

³²Ŋgimbi fio kɔ̧-a̧, o bíí mgbɔ nɛ a̧ e nú kɔ̧, ɓɛɛ wa yaa ka̧ pɛsi pɛm nɛnɛ;

³³wa gar nɛ́ nɛ̀ ɗoŋ-aa, wi tɔr o bíí-nɛ̀-fio na. Nú-fio mbɛt kpɛk nɛ́ a̧ nɛ̀ de-a.

³⁴Nɛ́ bòò hegɔ, ga̧a̧-see n’ɛnɛ ha̧ ha̧‘m'i nɛ búk, kifa nú k’ɛ́nɛ́ nɛ́ geemɔ lɛŋ.