Read Northwest Gbaya JOB 22 Bible Online

JOB 22 - Northwest Gbaya bible

JOB 22

¹Nɛ mɔ'ɔ nɛ Elifaz be Teman baa wen, ɓɛɛ tɔ̧:

²Ŋma mɔ nɛ̀ bíí nyɛma dea-a ha̧ Sɔ̧ nɛ́ ge? Wi-iŋ-mgbara-mɔ iŋ nɛ mɔ wen tɛ ɓɛɛ.

³Wen ko Wan nɛ a̧a̧ nɛ ŋgayamɔ lɛŋ tɛ deemɔ kɔ-mɛ nɛ yuwar-a nɛ́ ge? Mɔ n'aa kpa tɛ de naŋanɔ kɔ-mɛ nɛ́ ge?

⁴Mɛ taa mɛ̀ nɛ́ wen zu mboo zu kɔ-mɛ a̧ a̧ usi nɛ̀ bɔnɛ ha̧ mɛ, gɔn nɛ̀ kita zu mɛ nde?

⁵Nɛ mbetɛ, ɗaŋ kɔ-mɛ ɔ gasa, ɗaŋmɔ kɔ-mɛ bó nɛ̀ nduti-a na.

⁶Mɛ duka ɓar mɔ er o nya-mɛ nɛ ziŋina; mɛ duka kpɔ̧i̧ laa tɛ o wi-kɔsa yinɛ.

⁷Mɛ kɔ̧ so mɛ ha̧ yì ha̧ o wi nɛ wɔ yì gbɛ wa na; mɛ kɔ̧ so ha̧a̧ nyɔŋmɔ ha̧ o bíí nɛ wɔ gbɛ na mbɛt.

⁸Nù duka so nɛ́ ko wi nɛ a̧a̧ nɛ ŋgai-te-er, ɓɛɛ wi nɛ kɔ̧a̧ a̧ a̧a̧ so nɛ̀ fara hi̧i̧.

⁹Mɛ ndak so nɛ o ko-gera nɛ̀ géé er, kai nɛ mɔ ko o be-oi er-wa.

¹⁰Mɛ̀ nɛ́ wen mɔ‘i sa pɛ́r ba mɛ, ɓɛɛ o mɔɔ-kíì nɛ mɛ iŋ mgbara-a na pi̧ kíì tɛ-mɛ.

¹¹Sa̧a̧mɔ kifa tum, ɓɛɛ mɛ zɔk mɔ ɓɔna; ɓɛɛ gasa ha̧a̧-yì hur zu-mɛ lɛŋ.

¹²Bíí lɛŋ iŋa Sɔ̧ a̧a̧ yiwese mɛ. Mɛ̀ zɔ́k hee mɔ'ɔ nɛ sɔra ɔ kusa ga.

¹³Ɓɛɛ mɛ́‘e: «Sɔ̧ iŋa nɛ́ ge? A̧ nyɛma mɛ zɔk mɔ nɛ mgbara tura-zan hɔ tɛ-wi nde?

¹⁴O tura-zan kpee yí-a, ɓɛɛ a̧ zɔk mɔ na, a̧ yar kɔ̧-a̧ zik nɛ yiwese mɛ ɓɛɛ.»

¹⁵Mɛ kɔ̧ɔ̧ mɛ ba nɛ́ gba̧‘a̧ yuwar nɛ o ɗaŋwi baa so nde?

¹⁶Wa lɛŋ fee so nɛti ha̧ ŋgimbi kɔ-wa, hee naŋ-tua nɛ yì aŋ a taŋ'ɛ ga.

¹⁷Wa tɔ̧ɔ̧ ha̧ Sɔ̧: «Mɛ̀ dúk nyɛi̧ nɛ̀ ɛɛ, nɛ́ ge a̧ Wi nɛ a̧a̧ nɛ ŋgayamɔ lɛŋ nyɛma mɛ de in yɛɛ ge?»

¹⁸Nɛ́ a̧ a̧ ha̧a̧ so demɔ dun tua kɔ-wa; zu-a'i, ee-zu-mɔ kɔ-wa duk nyɛi̧ nɛ̀ a̧.

¹⁹O wi-de-mɔ nɛ yuwar-a tɛ zɔk tika-a kɔ-wa, ɓɛɛ kpaa desee; ɓɛɛ wi nɛ ɗaŋmɔ bo zu-a na tɛ zɛkɛɗi wa, tɔ̧ nɛnɛ:

²⁰«O wisɛn k’ɛɛ kuma kaɗi, mbɔi kɔ-wa bia wee lɛŋ!»

²¹Mɛ̀ ɗáfí mgbara mɛ in Sɔ̧ ha̧ ga̧a̧mɔ mɛ duk mgbara'nɛ́, ɓɛɛ bɔtɛ kɔ-mɛ lɛŋ tɛ pii ɗoŋ.

²²Mɛ̀ zíí mbɔrɔ kɔ̧-a̧, mɛ̀ kásí wen kɔ̧-a̧ kɔ̧ see-mɛ.

²³Kà mɛ̀ píí ɗoŋ tɛ Wan nɛ a̧a̧ nɛ ŋgayamɔ lɛŋ, kà mɛ̀ é ɗaŋmɔ nyɛi̧ nɛ̀ tua kɔ-mɛ mbɛt, mɛ́ tɛ́ kpà ŋgai woyo.

²⁴Kà mɛ̀ síŋ o kìì-lɔr a nù, in de sa̧a̧ lɔr mɛ nú Ofir a ɗɔɔ yì si mgbara ta mɛ,

²⁵Wan nɛ a̧a̧ nɛ ŋgayamɔ lɛŋ tɛ duk nɛ́ lɔr kɔ-mɛ, in dɔka bu-mbɔi kɔ-mɛ mbɛt.

²⁶Wan nɛ a̧a̧ nɛ ŋgayamɔ lɛŋ tɛ duk nɛ́ o gba demɔ kɔ-mɛ, ɓɛɛ mɛ tɛ ba yí-mɛ nɛ̀ ŋgɔn sitɛ a̧.

²⁷Mɛ tɛ kɔf'aa, a̧ tɛ kpɛk, ɓɛɛ kɔ-mɛ nɛ́ déé mɔ nɛ̀ mɛ ha̧a̧ nú wen-aa ɓɛɛ.

²⁸O ee-zu-mɔ kɔ-mɛ lɛŋ tɛ hɔ gba̧a̧, ɓɛɛ sa̧a̧mɔ tɛ nyɛk yuwar kɔ-mɛ.

²⁹Wen Sɔ̧ ɗaŋ nɛ o ee-zu-mɔ ko wi-ŋmaŋ-tɛ, ɓɛɛ a̧ kpasa wi-mɔka-see.[17]

³⁰A̧ kpasi nɛ wi nɛ de ɗaŋmɔ na, er-mɛ a̧ dúk nɛ̀ sa̧a̧-a̧,[18] ɓɛɛ mɛ tɛ kpasi.