Read Northwest Gbaya JOB 24 Bible Online

JOB 24 - Northwest Gbaya bible

JOB 24

¹Wen ge sa Wan nɛ a̧a̧ nɛ ŋgayamɔ lɛŋ e ŋma ŋgimbi wen gɔna kita, ha̧ o wi nɛ mbo zu ha̧ a̧ mɛ zɔk wese'i na ge?

²O bíí ɗɔŋ nɛ gbisi e siti, ɓɛɛ o ŋma daia kɔ‘i nɛ́ o mɔ-dai-zuzu.

³Wa ba nɛ tuifuu ko o be-oi yaknɛ, ɓɛɛ wa baa ndai ko ko-gera nɛ ziŋina.

⁴Wa ndak nɛ o wi-kpa-mɔ-na yinɛ yuwar; ŋma mɔ nɛ o wi-kɔsa tɛ de bo na, kànà nɛ hu̧sa̧ tɛ ɓɛɛ.

⁵Wa gbo si ŋga-gbárà nɛ tutuyɛ sut hee tuifuu-zaŋbɛɛ ga, wen kia nyɔŋmɔ mɛ dai nɛ̀ o bem kɔ-wa.

⁶Wa gɔn nɛ hoe kpɛɛfɔ wen nyɔŋa-a, ɓɛɛ wa ɓii waya-nyak-dɔ̧ɔ̧ ko o wi-ɗaŋ.

⁷Wa ɔ nù mɛ zɛ nɛ géé tɛ, laa bo tɛ-wa na, borgo mɛ kpe nɛ tɛ-wa wen gɛ̧ɛ̧ bo na mbɛt.

⁸Kórò zu kaya ŋma nɛ wa; fara-hu̧si bo na, ɓɛɛ wa ɛk nɛ tɛ-wa nɛ ta.

⁹O bíí ɓar nɛ be-oi nú bere nàà kɔ-wa yinɛ, ɓɛɛ wa kaia mɔ ko o wisan nɛ ziŋina.

¹⁰Wa e wa mɛ yar nɛ géé tɛ, laa bo na; ɓɛɛ wa dee ha̧ wa mɛ tui sika-nyɔnɔ nɛ mgbaɓa-nú,

¹¹ɓar nɛ nɔ́ fara-vati-nɔ̧́ ko o ŋma bíí, vati nɛ dɔ̧ɔ̧ nɛ wa beka nɔ na.

¹²O wi-zɔk-bɔnɛ gɔfi nɛ mɔ sɛn saaye, o wi-ba-da̧i̧ hiɗi nɛ mɔ, ɓɛɛ Sɔ̧ zii aia-nú tɛ pɛrti ŋgayamɔ nɛ de'i na.

¹³O wi-de-ŋgayamɔ nɔ‘i kɔ̧ kɔ‘i sa̧a̧mɔ na; wa bɛ̧ɛ̧ sa̧a̧mɔ, wa kɔ̧ nɛɛ nɔ̀ sɛnɛ na mbɛt.

¹⁴Wi-gbɛ-zu kur kɔ‘i mɛ gɔna mɔ, gbɛ nɛ wi-kɔsa in wi-kpa-mɔ-na; ɓɛɛ mɛ zɛ a̧ yara zu̧ nɛ mɔ.

¹⁵Wi-de-dàlà pɛm nɛ yee-wese; a̧ hu̧si nɛ tɛ-a yak nɛnɛ, tɔ̧ nɛnɛ‘e, ŋma wi-zɔk-wi bo na.

¹⁶Wi-zuzu kom nɛ tua nɛ ti-tum, ɓɛɛ mɛ wese a̧ hu̧sa̧; a̧ kɔ̧ sa̧a̧mɔ na.

¹⁷War ko o wi nɔ‘i, gɔnamɔ-tuyɛ nɛ́ tum-fio; kɔ-wa nɛ̀ wa iŋa nɛ́ o mɔɔ-kíì mɛ ti-tum fio.

¹⁸Wi-ɗaŋ ba nɛ yì yaknɛ; fom tika zu fara-duk kɔ̧-a̧ lɛŋ, ɓɛɛ a̧ beka ba yuwar fɔ-nyak-dɔ̧ɔ̧ ɓɔna.[21]

¹⁹Fara ko o fio gur wi-de-ɗaŋmɔ hee mɔ'ɔ nɛ kora nú-gbɛŋmɔ nɔ nɛ yì-kórò ɓɔrɔ'ɛ ga.

²⁰Tɛ wi-ko-a bíí ɗoŋ-aa, ɓɛɛ a̧ kifi nɛ mɔɔ-de-tortɛ ko o dɔk; wi iŋ oi-aa ɓɔna. Ɗaŋmɔ kaɗa hee mɔ'ɔ nɛ te gbin nɛnɛ'ɛ ga.

²¹A̧ usa so bɔnɛ ha̧ ko-yar-ndɔra, a̧ de demɔ in ko-gera na.

²²Sɔ̧ a̧a̧ nɛ ŋgai mɛ ɗaŋ wan-ŋgai yinɛ; a̧ kura in a̧, ɓɛɛ wi’ɛi ta'e wi beka duk siti ɓɔna.

²³Mɔ kpɔk, Sɔ̧ e nɛ a̧ mɛ duk tɛ ga̧a̧mɔ, ɓɛɛ yí-a mbaɗi nɛ deemɔ kɔ̧-a̧.

²⁴Ko wi’ɛi, nɛ́ tɛ ŋma be ŋgimbi tikiɗi a̧ a̧ duk nɛnɛ nɛ de-a, ɓɛɛ kaɗa; a̧ tika hee kan-mboŋgo nɛ‘i gbin’ɛ ga, ɓɛɛ a̧ kor hee sunu nɛ‘i zuɗi’ɛ ga.

²⁵Kà nɛ́ bòó a̧‘i na, o'o tɛ e wen kɔ‘m tɛ geemɔ o? Wi nɛ tɛ kifi nú‘e mi nɛ wi-ndela nɛ́ o?