Read Northwest Gbaya JOB 26 Bible Online

JOB 26 - Northwest Gbaya bible

JOB 26

¹Nɛ mɔ'ɔ nɛ Job baa wen ɓɛɛ tɔ̧:

²Mɛ iŋa wán gbáká wi-ziɓa, in ha̧a̧ ŋgai ha̧ wi nɛ̀ ŋgai bo na, na nde?

³Mɛ iŋa kɔ-mɛ tɔ̧ɔ̧ mbɔrɔ ha̧ wi nɛ̀ iŋ mgbara mɔ na, in usa yuwar deemɔ nɛ de-a na nde!

⁴Mɛ́ tɔ̧́ kɔ-mɛ dɔka wen nɔ'ɔ ha̧ o nde? Mɛ́ kpá wen nɔ'ɔ nɛ̀ tɛ́ o tɔ̧ nɛnɛ o?

⁵[22] O wi nɛ fea ya ɗuka fara nɛ gana gan ɗuka gba-tɔp nɛ̀ o mɔ ya ɗɔɔ-aa mɛ nak nɛnɛ,

⁶wen fara ko o fio hu̧si yí Sɔ̧ na; ŋma mɔɔ-kpe ɗuka-fara yí-a bo na.[23]

⁷Nɛ́ Sɔ̧ a̧ tati ká̧-zan mɛ ŋgɔn see zu géé fara; nɛ́ a̧ a̧ ga̧i̧ nù e zu geemɔ.

⁸Nɛ́ a̧ a̧ kpe yì e kɔ̧ tura-zan, ɓɛɛ dita-a de ha̧ tura-zan mɛ ai na mbɛt.

⁹Nɛ́ a̧ a̧ kpe damti[24] kɔ̧-a̧ nɛ tura-zan.

¹⁰A̧ zika gba-tɔp nɛ kirkiti-mɔ, ɓɛɛ nɛ́ tɛ kirkiti-mɔ‘i a̧ sa̧a̧mɔ in tum kpa ŋmaa sɛnɛ.

¹¹O mbiŋ-tɔn-yiwese nak nak, wen kíì baa wa tɛ tuɓa da̧ kɔ̧-a̧.

¹²Mɛ̀ nɛ́ sɛn tɛ ŋgai kɔ̧-a̧ a̧ a̧ kɛ̧ɛ̧ nɛ gba-tɔp; nɛ́ tɛ̀ iŋa-mgbara-mɔ kɔ̧-a̧ a̧ a̧ gana nɛ zu Rahab.[25]

¹³Ɔmi kɔ̧-a̧ ndaka tura-zan yiwese yinɛ; er-a toka ndiɓa sar.

¹⁴Mɔɔ nɔ‘i nɛ́ o géé be ka̧-nú tom kɔ̧-a̧, n’ɛ̀ɛ̀ zii nɛ́ be giti-a tikiɗi ɓɛɛ. Nɛ́ o'o nyɛma mɛ iŋ mgbák ŋgai kɔ̧-a̧ o?