Read Northwest Gbaya JOB 30 Bible Online

JOB 30 - Northwest Gbaya bible

JOB 30

¹Ɓɛɛ kinii mi kifa nɛ mɔɔ-zɛkɛɗi ko o géé obem mɛ ɗoŋ, n'am beka kpɛk so ha̧ dáà kɔ-wa mɛ duk mgbara o toyo pɛm nɛ̀ mɔ-dai kɔ‘m na.

²Nɛ́ ge a̧‘m tɛ̀ɛ́ pɛm so tɛ o wi nɔ‘i nɛ ŋgai kɔ-wa kaɗa kaɗi’ɛ ge?

³Bɔnɛ in kaɓa baa ŋgai kɔ-wa, ɓɛɛ wa yak si ŋga-gbárà mɛ, kii nɛ̀ mɔɔ-nyɔŋ. Ŋma mɔ bo hi̧i̧ na, kànà nɛ fara dita-see ɓɛɛ.

⁴Wa ɓi nɛ wa̧a̧-zɔ̧ nɛ tɔŋ a̧a̧ sɛnɛ ká̧ tɛn, wa nder nɛ wa̧a̧ be-te, aŋ nɛ ŋma kunin-te[31] mɛ gi wen nyɔŋa-a.

⁵O dɔka bíí ndaka wa yinɛ mgbara wi; gai nɛ mɔ a zu wa hee o wi-zuzu ga.

⁶Wa ɔ nɛ ɗɔɔ ŋgere gboŋgo, nɛ̀ kɔ̧ o gbamgba in kɔ̧ o di̧i̧-ta nɛnɛ.

⁷Wa zaŋ nɛ nú-wa hiɗi nɛ mɔ nɛ ti mɔ, gbisi nɛnɛ zu ŋmaa ɗɔɔ tɛn-dara.

⁸Wa nɛ́ o be-búù nɛ̀ bó nɛ̀ nin na, nɛ‘i ndaka tɛ nù yinɛ nɛ̀ ɓira-te.

⁹Nɛ mɔ'ɔ nɛ kinii, mi kifa nɛ́ mɔɔ-e-nɛ-gima kɔ-wa, mi nɛ́ mɔɔ-tɔ̧ tua-wen kɔ-wa.

¹⁰Mi nɛ́ mɔɔ-nyɛr yí-wa ɓɛɛ wa yu'm yuu; aa sap yí‘m de ŋma mɔ tɛ-wa na.

¹¹Hee mɔ'ɔ nɛ Sɔ̧ dɔmgba hɔkɔ-góò kɔ‘m pi̧ nɛ búù zu'm ga, wa dor tɛ-wa tɛ dee mɔ nɛ wa kɔ̧ɔ̧ lɛŋ in am na.

¹²Nɛ̀ war wii-er-am wa nɛ oi gii lɛŋ kɛr nɛ‘m, pi̧ nɛ̀ ndɔra ha̧‘m; wa ba nɛ zu duk nɛ̀‘m ha̧‘m mɛ yɔ.

¹³O nde wa gɔna ɗoŋ-am lɛŋ; bíí lɛŋ kii nɛ war mɛ ɗaŋ am yinɛ; ŋma wi-dor-wa bo na.[32]

¹⁴Wa gbina garo kɔ‘m, ɓɛɛ wa zuɗi nɛ̀ zu o gbina ŋgeŋ mgbúzúk pii tɛ‘m.

¹⁵Gasa zɔm kíì baa'm, ɓɛɛ ndak mɔɔ-e-nɛ-ta kɔ‘m yinɛ hee búk ga; bɔtɛ kɔ‘m yambala hee tura-zan ga.

¹⁶Kinii, bɔnɛ yee tɛ‘m kaɗi; mi a̧ ga̧ tɛnɛ‘i.

¹⁷Mɛ zɛ gba̧a̧ tɛ‘m lɛŋ gbina ko bɔnɛ, o nik tɛ‘m ɔm tɛ ko nyimmɔ na.

¹⁸Sɔ̧ mɔi̧a laa kɔ‘m kasi nɛ‘m nɛ̀ ŋgai, a̧ nɔmɔi̧a̧ ger gba laa kɔ‘m nɔ nɛ ger-am;

¹⁹ɓɛɛ a̧ ba'm pi̧ nù ɗɔɔ ɓɔtɛ hee mi nɛ fuunu in bùk ga.

²⁰Sɔ̧, mi hiɗa mɔ ai nɛ̀ nú sitɛ‘nɛ́, ɓɛɛ ɛ́nɛ́ kifi nú ha̧‘m na;

²¹Ɛ́nɛ́ nɛ́ wi-usi-bɔnɛ ha̧‘m kinii; ɛ́nɛ́ tika zu'm nɛ̀ ŋgai k’ɛ́nɛ́ lɛŋ.

²²Ɛ́nɛ́ dee ha̧ búk mɛ ba'm yaknɛ hee nyaŋa a̧ tui am ga; ɓɛɛ gba búk-kórò pi̧‘m si hi̧i̧ si hɛ̧ɛ̧.

²³Mi iŋa ɛnɛ ba nɛ‘m nɛnɛ ha̧ fio, fara nɛ o bíí lɛŋ kpa ŋmaa sɛnɛ.

²⁴Ŋgimbi n'aa nyɛi̧ er-a mɛ de mɔ, aia-nú beka gbak ɓɔna, wen gɔfamɔ nɛ̀ gbo kɔ̧ nú-wi’ɛi mɛ̀ nɛ́ wen ŋgamɔ n'aa de in a̧.[33]

²⁵Zu-a'i, bo nɛ mi hi̧a̧ so kɔ̧a̧ wen bɔnɛ-ɓɔsi ko o wi-bɔnɛ na nde? Ko de so'm ha̧ wi-kɔsa na nde?

²⁶Ɓɛɛ ŋgimbi n'am pɛm so nɛ́ bɔtɛ, nɛ́ bɔnɛ a̧ hɔa; mi pɛm so nɛ sa̧a̧mɔ, ɓɛɛ tum hɔ.

²⁷See-am gɔn ɗoŋ ŋmaa ɗoŋ ŋmaa, wese-bɔnɛ hɔɔ zu'm.

²⁸Mi nɛ́ nɔ̀ nɛ̀ oi tɛ‘m nɛ̀ tu̧u̧ ɗaŋ lɛŋ, ɓɛɛ bó nɛ́ wese a̧ dee hegɔ na; kóó sɛn mgbara bíí mbɛt, mi yor ai nɛ̀ nú, hiɗi nɛ̀ mɔ.

²⁹Kinii mi nɛ́ gba-toyo; mi kifa nɛ́ wi-gbam-yari in o dìrí.[34]

³⁰Ndàrá tɛ‘m tu̧a ɓɛɛ or; tɛ‘m nɛ̀ kɔ̧ a̧ mɛ nɛ́ géé wee.

³¹Ger koloŋ kɔ‘m nɛ́ aia-nú; fol kɔ‘m bíí nɛ́ gima taŋ nɛ̀ kɔ̧a̧.