Read Northwest Gbaya JOB 6 Bible Online

JOB 6 - Northwest Gbaya bible

JOB 6

¹Job kifa nú ɓɛɛ tɔ̧:

²Kà bo so ha'i mɛ we dita see kɔ‘m, in kà bo so ha'i mɛ we bɔnɛ kɔ‘m,

³mɛ̀ nɛ́ mɔ nɛ tɛ̀ɛ́ diti gan o nyɛmɛ ɗɔɔ o gba-tɔp lɛŋ; mɛ̀ nɛ́ wen mɔ‘i sa'm iŋ zu wen n'am tɔ̧ na.

⁴O góò ko Wan nɛ a̧a̧ nɛ ŋgayamɔ lɛŋ pi̧a'm, ɓɛɛ mi ɔm nɛ ma̧a̧da̧-a̧; o mɔɔ-kíì ko Sɔ̧ kɛra'm e see-a.

⁵Tuifuu zaŋbɛɛ tɛ hiɗi mɔ kà a̧ nɛ́ bòó nɛ̀ mbɔɗi zɔ̧ mɛ nyɔŋ nde? Ndai nyɛma so mɛ dɔm kà a̧ nɛ́ bòó nɛ̀ zɔ̧ mɛ nyɔŋ nde?

⁶Wi nyɛma mɛ nyɔŋ mɔ nɛ tɔŋ bó sɛnɛ na pulem nde? Pulem wa̧a̧-kpoo ɔ so nyɔ̧ɔ̧ ɔɔ nde?

⁷Mi ɔ̧i̧ nɛ wa a nù, wa nɛ o ŋma ɗaŋ nyɔŋmɔ.[7]

⁸Ho! Wora Sɔ̧ kɔ‘m a̧ kpa yí-a na nde! Sɔ̧'ɔ̧ kifi nú ha̧‘m tɛ mɔ n'am pɛm na nde!

⁹Ha̧‘m zɔk ɓɛɛ Sɔ̧ baa'm yinɛ géè na nde! A̧ a̧ nyɛi̧ er-a ɓɛɛ a̧ a̧ gbɛ‘m yinɛ na nde!

¹⁰Hegɔ, see-am tɛ̀ɛ́ ga̧, mi tɛ̀ɛ́ kpíɗí yɔyɛ nɛ oi zɔm bɔnɛ n'am duk sɛnɛ'ɛ wen n'am gbin heembea ko Sa̧a̧ Wi na fe nɛnɛ.

¹¹Mi a̧a̧ nɛ ŋgai ha̧‘m mɛ e ta'm nɛ ŋma mɔ nde? Sɔŋkur mɔ kɔ‘m nɛ́ ge sa'm tɛ ɓɔn nɛ yí siti ge?

¹²Mi ŋgaia so hee ta ga? Mur tɛ‘m so nɛ ndɛrɛ nde?

¹³Gbaka mɔ n'am pɛm’ɛ nɛ geemɔ nde? Mɔ nɛ tɛ̀ɛ́ gbak so'm lɛŋ, yaka er-am.

¹⁴Kà mɛ bɛ̧́ dee ko ha̧ sɛm kɔ-mɛ nɛ bɔnɛ tika zu a, ɓɛɛ a̧ tɛ e yuu kíí Wan nɛ a̧a̧ nɛ ŋgayamɔ lɛŋ duk.

¹⁵O nya'm ɔra'm hee zér-ɗiŋgi ga, wa ɔra'm hee mɔ'ɔ nɛ be-zer ɔ̧si̧ nɛnɛ e lembe zan’ɛ ga.

¹⁶Mɛ ɗuka zaŋ ɓar, wa mbɛra mbayaŋga;

¹⁷ɓɛɛ kà tiger bɛɛ hɔ́, wa ku̧u̧ naŋ ɔ̧sa̧-a̧, kà bɛɛ bé tɛ̀ɛ́ wii, wa ɔ̧sa̧ ndaɗi kpaa-kpaa.

¹⁸O wi-nɛ-gɛnɛ zɔk zu-zer-a, ɓɛɛ a̧ra̧ si sɛnɛ; wa ye ŋga gbárà, ɓɛɛ wa yɔɔ mɔ ɓɔn.

¹⁹O wi-nɛ-gɛnɛ Tema e yí si sɛnɛ, o wi-ba-gbárà mɛ Saba e ta nɛnɛ.

²⁰Kà wa be tɛ̀ɛ́ hɔ tɛ zer'i, wa kpa yì na, ɓɛɛ foe baa wa wen wa ee so ta'e, wi tɛ kpa yì hi̧i̧.

²¹Duka-a k’ɛ́nɛ́ in am kinii nɛ́ mɔ‘i; ɛnɛ zɔka bɔnɛ n'am duk sɛnɛ‘i ɓɛɛ bele zar'nɛ́.

²²Ɛnɛ zɔka mi aka'nɛ́ mɛ ha̧ mɔ ha̧‘m nde? Mi aka'nɛ́, ɛ̀nɛ̀ ɗáŋ mbɔi k’ɛ́nɛ́ wen zu'm nde?

²³Mi tɔ̧‘e, ɛ̀nɛ̀ ɓár am er wisɛn kɔ‘m yinɛ na, kóó ɛ̀nɛ̀ gbó‘m er wi-nas'am na mbɛt.

²⁴Mi dee nɛ́ ge ɗaŋmɔ ge? Ɛ̀nɛ̀ tɔ̧́ ha̧‘m, ɓɛɛ ha̧‘m kpe nú‘m!

²⁵Tɔ̧ɔ̧ yí-wen ha̧ ŋmaa ha̧ ɗaŋsee na, ɓɛɛ báá wen k’ɛ́nɛ́ zu'm tɛ gbak tɛ ge?

²⁶Ɛ́nɛ́ ku̧i̧ nɛ mɔ zu wen kɔ‘m nde? Mɛ̀ nɛ́ zaŋa-nú ko wi-bɔnɛ.

²⁷Ɛnɛ hɛ̧ɛ̧, ɛnɛ nyɛma mɛ bi be-oi nɛ mbaɗi! Ɛnɛ nyɛma mɛ ɗɔr sɛm k’ɛ́nɛ́!

²⁸Kinii, ɛ̀nɛ̀ zɔk, mi beka de ndela nɛ gbaayí h’ɛ́nɛ́ na.

²⁹Ɛ̀nɛ̀ tá mɔ nɛ dea, ɛ̀nɛ̀ tɔ̧́ kpasawen, wen-ndela a̧a̧ kɔ̧ nú‘m'i? Mi iŋ mgbara demɔ in ɗaŋmɔ na? Kɔ‘m, ŋma mɔ bó zu'm na.