Read Northwest Gbaya JOB 7 Bible Online

JOB 7 - Northwest Gbaya bible

JOB 7

¹Duka-a ko bíí zu nù'ɛ kànà nɛ́ bɔnɛ, duka-a kɔ̧-a̧ yak ŋmaa in ko wi-de-ŋga tom na.

²A̧ duk hee bara nɛ de tom ɗɔɔ wese nɛ kɔ̧ɔ̧ gi̧ɔ̧ mɛ kpa ga, hee ŋma wi-de-tom nɛ pɛm mɔ mɛ ba sede kɔ‘i ga.

³War mɔ kɔ‘m nɛ́ o fio-zɛ nɛ yak, mi kpa mɔ na, ɓɛɛ mɔ nɛ kpa'm mɛ zɛ lɛŋ nɛ́ bɔnɛ.

⁴Kà‘m ɔ́ nù ɓɛɛ mi tɔ̧a̧: «Mɔ a̧ sa̧ bee,» kà‘m kúr, ɓɛɛ mi'e ndé: «Mɔ'ɔ ga̧ bee,» ɓɛɛ mi duk kànà nɛ̀ dita see hegɔ mɔ sa̧ nɛnɛ.

⁵Dɔk in ŋgo-da̧i̧ aa mur tɛ‘m lɛŋ, ndàrá tɛ‘m ora, ɓɛɛ mbɔr.

⁶Zɛ duka-a kɔ‘m yak nɛ haya-a hee gɔma yí ga, wa hɔɔ nduti, ɓɛɛ ŋma mɔ ha̧‘m mɛ e nɛ ta woyo bo ɓɔna.

⁷GASA WAN, tɛ‘nɛ́'ɛ mbaŋ ɗoŋ-aa ndé, duka-a kɔ‘m nɛ́ búk sɔɔ géè, mi beka duk tɛ bɔtɛ ɓɔna.

⁸Yí‘nɛ́ beka zɔk am ɓɔna, ɛ́nɛ́ tɛ kìì mɛ zɔk am, ɓɛɛ ká‘m bó kɔ‘m ɓɔna.

⁹Hee mɔ'ɔ nɛ tura-zan yambali nɛnɛ ɓɔn sɔɔ géè'ɛ ga, hegɔ mbɛt, wi nɛ ye kɔ kɔ̧ kaɗi daŋ ɓɔna.

¹⁰A̧ pii ɗoŋ mɛ ɔ kɔ̧ tua kɔ̧-a̧ ɓɔna, o bíí kɔ̧ tua kɔ̧-a̧ beka iŋ oi-aa ɓɔna.

¹¹Nɛ́ hegɔ sa'm beka kpe nú‘m na, mi tɛ tɔ̧ wen nɛ̀ gɔna hiɗi; mi tɛ duk nɛ̀ ɗaŋsee ai nɛ nú‘m.

¹²Mi nɛ́ gba-tɔp náà, kóó ndiɓa ɗɔɔ gba-tɔp h’ɛ́nɛ́ mɛ pɛm am pɛm nde, GASA WAN?

¹³Kà‘m tɔ̧́‘e ndé, mi tɛ ɔ nu, ɓɛɛ see-am ga̧a̧, fara-ɔ kɔ‘m tɛ de ha̧ aia-nú kɔ‘m mɛ kaɗi wó,

¹⁴ɓɛɛ ɛnɛ pi̧i̧ kíì tɛ‘m tɛ ɔɔ zu, ɓɛɛ mɔ n’ɛnɛ usa tɛ hɔɔ-zu ha̧‘m dee ha̧ bele mɛ zar am.

¹⁵Bíí a̧ nɔkɔɗi so ger-am gbɛ‘m yinɛ gáà, tɛ̀ɛ́ gan duka-a n'am duk nɛ́ géé gba̧a̧'ɛ.

¹⁶Wen kɔ‘m bo na, mi beka ɓɔn zan na, ɛ̀nɛ̀ é‘m, duka-a kɔ‘m nɛ́ búk sɔɔ gee.

¹⁷Bíí só nɛ́ ge s’ɛnɛ ɗaŋ ŋgimbi k’ɛ́nɛ́ wen-aa, s’ɛnɛ tá mɔ wen-aa ge?

¹⁸Wen ge s’ɛnɛ zɔk a̧ mɛ tutuyɛ ɓɔnsɛnɛ, s’ɛnɛ we a̧ tɛ ŋgimbi kpɔk kpɔk ge nde?

¹⁹Ɛnɛ tɛ kaɗi bɔɔ haia'm mɛ gese ge? Ɛnɛ tɛ e bɔɔ ha̧‘m mɛ gur sap mɛ gese ge?

²⁰Kà‘m nɛ́ dee ɗaŋmɔ, ɓɛɛ nɛ́ ge a̧‘m dee in'nɛ̀ɛ́, wi-kpe-naŋ bíí ge? Wen ge s’ɛnɛ e'm nɛ̀ mbélé k’ɛ́nɛ́ ge? Mi nɛ ŋma gasa tui wen'nɛ́ nde?

²¹Wen ge ɛnɛ e ɗaŋmɔ kɔ‘m ha̧‘m, ha̧ yɔɔ kaya kɔ‘m mɛ yak géè na ge? Dekpaa mi tɛ ye ɗɔɔ nu, ɛnɛ tɛ kii am takaɗi, mi bo ɓɔna.