Read Northwest Gbaya JOB 9 Bible Online

JOB 9 - Northwest Gbaya bible

JOB 9

¹Nɛ mɔ'ɔ nɛ Job baa wen ɓɛɛ tɔ̧:

²Nɛ mbetɛ, mɔ hegɔ de dee. Ɓɛɛ kita ko bíí tɛ ba Sɔ̧ hee ge?

³Bíí nɛ́ kɔ̧ɔ̧ mɛ ɓa wen in a̧, a̧ beka kifi nú war kpɔk tɛ o ɓaa kita kɔ̧-a̧ booro na.

⁴Sɔ̧ nɛ́ wi-iŋ-mgbara mɔ nɛ a̧a̧ nɛ ŋgayamɔ; o'o kia mɛ gan a̧, kà zɔ́k bɔnɛ na o?

⁵A̧ ba o kaya e ŋma fara; wa iŋ wi nɛ de mɔ tɛ nyimsea hegɔ in wa'i na.

⁶A̧ yɛkɛsi gun-nù nɛ̀ oi-aa, ɓɛɛ o mbiŋ tɔna-a naka.

⁷A̧ ha̧ nú ɓɛɛ wese daŋ na, ɓɛɛ a̧ kpee yí o sɔra mbɛt.

⁸A̧ ɛ̀nɛ́-à a̧ tati yí-zan, ɓɛɛ a̧ nɛɛ nɔ̀ zu kin-yì mbɛt.

⁹Nɛ́ a̧ a̧ dee o zuduk sɔra nɛtɛ nɛtɛ: o Gasa Sɔra, o Hɛr-paa, o Gbaayí-be-zɔŋa, in o Gɔm-ndaa.

¹⁰A̧ de nɛ gasamɔ nɛ‘i nyɛm mɛ kpa ndaa-a na; a̧ de nɛ mɔɔ-gɔn-ɗɛɗɛ-wi nɛ‘i nyɛm mɛ tɔr na.

¹¹A̧ ɓir katɛ‘m, ɓɛɛ mi zɔk a̧ na; a̧ ɓir yak, ɓɛɛ mi iŋ géé iŋa mgbara-a na.

¹²Nɛ́ o'o tɛ dor a̧ tɛ baa mɔ nɛ ŋgai o? O'o tɛ ak a̧‘e: «Ɛ̧ɛ̧ n’ɛnɛ de’ɛ nɛ́ ge?» wó'ɛ, bo na.

¹³Sɔ̧ dor nyimsea kɔ‘i na; o wi-gbak Rahab lɛŋ ɔ nɛ nù ha̧ a̧.

¹⁴Ɓɛɛ nɛ́ mi a̧‘m tɛ ɓa wen kɔ‘m ti a̧ nde? Nɛ́ ge wen ge a̧‘m tɛ kpa mɛ tɔ̧ ha̧ a̧ ge?

¹⁵Kóó wen kɔ‘m a̧ dee so, ŋma wen n'am tɛ tɔ̧ bo na; kànà nɛ́ aia-nú ha̧ wi-gɔn-kita zu'm ɓɛɛ.

¹⁶Kóó mi saa sara, nɛ mɔ'ɔ n'aa kɔ̧a̧, bo nɛ mi ta'e nde, a̧ zia tiger-am na.

¹⁷Nɛ́ a̧ a̧ tom gba búk tɛnɛ gbin nɛ gba̧a̧ tɛ‘m, nɛ́ a̧ a̧ de ha̧ dɔka da̧i̧ mɛ a tɛ‘m sɔɔ géè.

¹⁸A̧ e ha̧‘m mɛ ɔm tɛ‘m na, ɓɛɛ kɔ̧-a̧ nɛ dea-a ha̧ see-am mɛ tu̧.

¹⁹Kà bó nɛ́ ko ŋgai wó, a̧ nɛ tɛ-a'i nɛ́ ŋgai, kà bó nɛ́ ko ɓaa-wen wó, ɓɛɛ nɛ o'o tɛ ɓa wen in a̧ o?

²⁰Kóó wen kɔ‘m dee so hee ge, wen kɔ‘m tɛ ba'm nɛ tɛ‘m; mɔ n'am tɛ tɔ̧ lɛŋ tɛ pii ɗoŋ zu'm woyo.

²¹Kóó war wen kɔ‘m ɔ sa̧a̧ mbɛt, mi iŋ mgbara-a ɓɔna. Wɔ duka kpasa gbɛ‘m ɓɔna.

²²Nɛ́ hegɔ sa'm tɔ̧ ndé, lɛŋ nɛ́ kpɔk mɔ: kóó nɛ́ wi nɛ wen bo zu a na, kóó nɛ́ wi nɛ wen a̧a̧ zu a mbɛt, kɔ̧-a̧ kànà nɛ gbɛɛ wa a zu ŋmaa.

²³Kà ŋma zɛɛ geŋa tik nù kúm nɛ bíí, bɔnɛ ko wi nɔ‘i de kɔ‘i nɛ mɔɔ-mami ha̧ Sɔ̧.

²⁴Kà o wi-ɗaŋ bá nù, ɓɛɛ a̧ dee ha̧ o wi-ɓa-kita mɛ kpe yí sɛnɛ. Kà bó nɛ́ a̧ a̧ de mɔ‘i na, nɛ́ ge bíí ge a̧ tɛ de yak zu a ge?

²⁵Zɛ duka-a kɔ‘m maa yì gan o wi a yaa-gan-ŋmaa; wa yaka wa iŋ bɔtɛ na.

²⁶Wa yaka hee ŋma be kombon[8] nɛ ba yì yak ga, hee mɔ'ɔ nɛ zua ɗum nɛnɛ mɛ ba nɛ saɗi’ɛ ga.

²⁷Kà‘m tɔ̧́ ndé, mi tɛ e aia-nú kɔ‘m duk, ha̧ sɔnti'm mɛ bur ha̧‘m mɛ duk nɛ desee wó,

²⁸ɓɛɛ kíí bɔnɛ kɔ‘m baa'm, wen mi iŋa ndé, ɛnɛ beka e'm géè na.

²⁹Wen tɛ ba'm; a̧‘m ɗaŋ tɛ‘m sɔɔ géè wen ge?

³⁰Kóó mi zuia nɛ yí-ɓɔrɔ, kóó mi taia er-am nɛ sa̧-ndiŋ,

³¹ɛ́nɛ́ tɛ ba'm pi̧ ɗɔɔ ɓɔtɛ,[9] ɓɛɛ mi tɛ duk nɛ́ mɔɔ-ɔ̧i̧ wen o laa kɔ‘m.

³²Wen Sɔ̧ bó nɛ́ bíí hee mi ga, kà‘m kífí nú ha̧ a̧ na, k’ɛ̀ɛ̀ dé k’ɛɛ dee kita in ŋmaa na mbɛt.

³³Kà ŋma wi nɛ̀ nyɛma mɛ gɔn kita mgbara yɛ, bá bòò so,

³⁴Sɔ̧ tɛ̀ɛ́ ba nyasi kɔ‘i yinɛ ka̧ tɛ‘m, ɓɛɛ mɔɔ-kíì kɔ̧-a̧ beka pi̧ so kíì tɛ‘m ɓɔna.

³⁵Kíì beka de so'm tɛ tɔ̧ɔ̧ wen in a̧ na. Hee mɔ'ɔ nɛ bó hegɔ na ga, taamɔ kɔ‘m ɓɔna kɔ̧ see-am.