Read Northwest Gbaya GIMA 10 Bible Online

GIMA 10 - Northwest Gbaya bible

GIMA 10

¹GASA WAN, wen ge s’ɛnɛ yor nɛ̀ nyɛi̧a-a nɛ‘m ge? Wen ge s’ɛnɛ hu̧si tɛ‘nɛ́ wese ŋga bɔnɛ kɔ‘m ge?

²Wisan zɔk nɛ bɔnɛ tɛ ŋmaŋa-tɛ ko wi-ɗaŋ; a̧ tika yí pɛ́r gɔna-kɔ̧-zaŋ nɛ̀ wi-ɗaŋ tuia ha̧ a̧.

³Wi-ɗaŋ ŋmaŋ nɛ tɛ tɛ o mɔ nɛ̀ see-aa kɔ̧a̧; wi-de-wɔ-mɔ ɗaŋ kɔ‘i nɛ́ nin Sɔ̧; wi-ɗaŋ zɔk kɔ‘i Sɔ̧ hee geemɔ ga.

⁴Taamɔ kɔ̧-a̧ hee ndé: «Nyimsea ko Sɔ̧ a̧a̧ kɔ‘i ŋgɔn mɛ, a̧ nyɛm mɛ de ŋma mɔ in am na.» A̧‘e nde: «Sɔ̧ bo kɔ‘i na.»

⁵Ko wi’ɛi kànà nɛ́ dee mɔ kɔ‘i yaknɛ; ŋma mɔɔ-dor-a bo na. Taamɔ kɔ̧-a̧ ndé, gɔna-kita k’ɛ́nɛ́ a̧a̧ ŋgɔn mɛ, ɓɛɛ kita'i beka de ŋma mɔ in wii na. Ko wi’ɛi kànà nɛ́ zɛkɛɗa o wi-kur-zu-a nɛnɛ.

⁶Ɓɛɛ a̧ duk nɛ̀ tɛ-a tɔ̧ nɛnɛ‘e: «Ŋma mɔɔ-de'm bo na, ŋma ŋgamɔ nɛ̀ tɛ kpa'm bo na.»

⁷Kɔ̧-a̧ kànà nɛ́ foma o ŋma-a nɛnɛ. Kɔ̧ nú-a duna nɛ́ ɔramɔ in ŋgamɔ; mɔɔ ɗɔɔ leɓe-a nɛ́ saka-yí in ɗaŋ wen.

⁸A̧ hu̧si ká̧ o be ye tik nɛnɛ zu wi nɛ duk zóóŋ géè mɛ gbɛ wa yinɛ; a̧ duk kɔ̧-a̧ hi̧i̧ mbaɗi nɛ̀ o wi nɛ̀ bó nɛ̀ ŋgai na.

⁹A̧ hu̧sa̧ tɛ-a hee mɔ'ɔ nɛ dila mgbuti nɛnɛ ti da̧a̧ zɔ̧'ɛ ga; a̧ hu̧sa̧ mbɛɛr nɛ̀ de-a ha̧ a̧ mɛ ba wi nɛ̀ bó nɛ̀ ŋgai na. Kà a̧ nɛ́ yuɓura wa nɛ̀ yɔk kaɗi, ɓɛɛ a̧ gbura wa yaknɛ.

¹⁰A̧ hira gu nù ndaɗi mbɛɛr hai nɛnɛ, ɓɛɛ o wi nɛ̀ bó nɛ̀ ŋgai na tika kɔ̧ er-a.

¹¹A̧ tɔ̧ɔ̧ nɛ̀ kɔ̧ see-aa ndé: «Sɔ̧ nɛ̀ duk nɛ kɔ‘i’ɛ, tɛ-a ɓan nɛ̀ bìí ɗoŋ mɔ na.» Ko Sɔ̧ kànà nɛ́ kpee yí kà a̧ tɛ́ɛ̀ zɔk mɔɔ nɔ‘i.

¹²GASA WAN Sɔ̧, ɛ̀nɛ̀ hú̧í̧ er'nɛ́ nɛ ŋgɔn, tɛ‘nɛ́'ɛ mbaŋ ɗoŋ o wi-kɔsa.

¹³Wen ge sa wi-ɗaŋ e Sɔ̧ hee geemɔ ga ge? Wen ge sa a̧ tɔ̧ kɔ̧-a̧ ndé, Sɔ̧ beka kii mɛ de ŋma mɔ in wi na ge?

¹⁴GASA WAN, ɛ́nɛ́ zɔka wan ɗaŋsee in hiɗimɔ ko o wi-kɔsa na nde? Ɛ̀nɛ̀ zɔ́k wa ɓɛɛ ɛ̀nɛ̀ kásí wa kɔ̧ er'nɛ́. O wi nɛ̀ bó nɛ̀ ŋgai na e kɔ‘i ta nɛ̀ ɛ́nɛ́ wen ɛ́nɛ́ nɛ́ wi-gbak o be-oi.

¹⁵Ɛ̀nɛ̀ gbín ɓaa o wi-ɗaŋ in o ɗaŋwi; ɛ̀nɛ̀ násí wa hɔ ŋgimbi nɛ̀ ɗaŋmɔ kɔ-wa'i kaɗa lɛŋ.

¹⁶GASA WAN tɛ ɔ wan kpoo nɛ kpoo. O wi nɛ̀ iŋ a̧ na lɛŋ tɛ yambali zu nù kɔ̧-a̧'ɛ.

¹⁷GASA WAN, mi iŋa ɛnɛ zii kɔfamɔ ko o wi-mɔka-see zii; ɛnɛ ha̧ ŋgai ha̧a̧ ha̧ wa mbɛt.

¹⁸GASA WAN, ɛ̀nɛ̀ yéŋ zer'nɛ́ h’ɛ́nɛ́ mɛ gɔn kita zu o be-oi in o wi-bɔnɛ nɛ yuwar-a wen ká o bíí zaŋnu tɛ́ɛ̀ pi̧ bele tɛ wa siti.