Read Northwest Gbaya GIMA 106 Bible Online

GIMA 106 - Northwest Gbaya bible

GIMA 106

¹Aleluya! Ɛ̀nɛ̀ dé osoko ha̧ GASA WAN wen a̧ ɔ dee! Kɔ̧ɔ̧mɔ kɔ̧-a̧ duk kpoo nɛ kpoo.

²Nɛ́ o'o tɛ we ɗoŋ ŋgayamɔ ko GASA WAN o? O'o nyɛma mɛ we ɗoŋ zɔnamɔ kɔ̧-a̧ lɛŋ o?

³O wi-de-demɔ in o bíí nɛ̀ ndak ɗoŋ deemɔ nɛ yuwar-a wese lɛŋ tɛ ya nɛ̀ desee.

⁴GASA WAN, tɛ‘nɛ́'ɛ mbáŋ ɗoŋ am wen kɔ̧ɔ̧mɔ k’ɛ́nɛ́ zu o bíí k’ɛ́nɛ́ ɔ gasa nyɛmna. Ɛ̀nɛ̀ yé ɗoŋ am, wan-kpasi-wi!

⁵Ɛ̀nɛ̀ dé ha̧‘m mɛ kpa kpɔk de sɔnti nɛ̀ dukbíí n’ɛnɛ hoka kpaa; ɛ̀nɛ̀ dé ha̧‘m kpa kale desee nɛ̀ dukbíí k’ɛ́nɛ́ kpa'i, ha̧‘m mɛ kpa kpɔk mɔɔ-oi nɛ̀ dukbíí k’ɛ́nɛ́ kpa'i mbɛt.

⁶Ɗaŋmɔ nɛ̀ o zɔmdáa k’ɛɛ dee so nɛ́ mɔ'ɔ n’ɛɛ de nɛnɛ sɔsɔɔ mbɛt’ɛ; ɛ́ɛ́ a̧ra̧ tɛ deemɔ nɛ yuwar-a ɓɛɛ wen a̧a̧ zu yɛ.

⁷O zɔmdáa k’ɛɛ zii kɔ‘i gba̧a̧ mɔɔ-kifi nɛ̀ Sɔ̧ dee so Egiptɛ mɛ na; tɛ-wa bìí ɗoŋ dee demɔ ko GASA WAN nɛ̀ duk ŋgɔn mɛ, ɓɛɛ wa kii wen in a̧ ká̧ Gbɛ̧ gba-tɔp.

⁸Zu-a'i a̧ kpasa kànà wa wen ká nin-a tɛɛ ɗaŋ; GASA WAN dee hegɔ ha̧ bíí mɛ iŋ ŋgai kɔ̧-a̧.

⁹A̧ tɔ̧ɔ̧ wen ha̧ Gbɛ̧ gba-tɔp, ɓɛɛ tɔp'i ɔ̧si̧ kor kútú-kútú, ɓɛɛ a̧ mgbɔ wa ku nɛnɛ;

¹⁰GASA WAN ɓara wa er o wi-sɛn-wa, a̧ kpasa wa er o wisɛn kɔ-wa.

¹¹Nɛ́ mɔ'ɔ nɛ̀ yì nɛ ɔ̧sa̧ so'i gbina kpe zu o wi-kur-zu wa; kóó bíí kpɔk kpasi mgbara wa na.

¹²Tɛ mɔ‘i o be Israɛl kɔ̧ɔ̧ ɗɔɔ wen kɔ̧-a̧, wa bia gima zɔn nɛ̀ a̧,

¹³ɓɛɛ ɗoŋ-aa nyɛi̧ na tɛ-wa bìí ɗoŋ mɔ n'aa dea, wa ga̧ tɛ-wa ha̧ GASA WAN mɛ de mɔ n'aa ee zu-a lɛŋ mɛ hɔ gba̧a̧ na;

¹⁴wɔ-mɔ nɛtɛ nɛtɛ gbɛɛ wa lɛk-lɛk zaŋbɛɛ mɛ, ɓɛɛ wa we Sɔ̧ sɛn ŋga-gbárà‘i.

¹⁵Nɛ́ mɔ'ɔ n'aa ha̧a̧ mɔ nɛ̀ wa kɔ̧a̧‘i ha̧ wa, ɓɛɛ a̧ tom ŋga zɛɛ-gɛ̧ɛ̧ gu nɛ̀ wa lɛŋ ɗukup.

¹⁶Wa ku̧u̧ naŋ ku̧i̧a Moisɛ in Arɔŋ, sa̧a̧-bíí ko GASA WAN, kɔ̧ gbagari nɛ̀ wa ɔɔ sɛnɛ‘i,

¹⁷ɓɛɛ nù hu̧i̧ gur Dataŋ mɛrɛm kpe zu o bíí ko Abiram lɛŋ;

¹⁸wee baa gɛlɛm dɔ o bíí nɛ̀ mboɗa ŋmaa'i, dɔ o wi-ŋgazu nɔ‘i bíí wee kór-kór.

¹⁹Wa ɓoo ŋma be-ndai ba e ŋgɔn sɛn Hɔrɛb, ɓɛɛ wa gu nù gasi nɛ̀ ɓóó lor kɔ-wa'i;

²⁰wa ee gasamɔ ko Sɔ̧ duk mɛ gasi nɛ́ géé gi̧ɔ̧ ndai-nyɔŋ-zɔ̧.

²¹Tɛ-wa bìí ɗoŋ Sɔ̧, wan-kpasi-wa, wan nɛ dee so gasamɔ sɛn Egiptɛ,

²²wan nɛ dee so mɔɔ-kifi nù ko Kam, wan nɛ dee so mɔɔ-gɔn-hiɗi-wi ti wa nú Gbɛ̧ gba-tɔp mɛ mbɛt.

²³Sɔ̧ taa so mɛ ɗaŋ wa yinɛ, ɓɛɛ daden nɛ̀ Moisɛ, wi n'aa hoka so, yora kànà ŋgoor ti a̧ kii nɛ̀ war mɛ ga̧ nyimsea kɔ̧-a̧.

²⁴Wa bɛ̧ɛ̧ de nù, wa kɔ̧ ɗɔɔ wen ko Sɔ̧ na;

²⁵wa yaa kɔ̧ tua kɔ-wa ku̧i̧ nɛ mɔ, wa kɔ̧ mɛ zii wen ko GASA WAN na.

²⁶Nɛ́ mɔ'ɔ nɛ̀ Sɔ̧ kana mɔ ti wa'e wa tɛ kum sɛn ŋga-gbárà‘i lɛŋ,

²⁷ɓɛɛ wi tɛ ndak o bezaŋ-wa pɛsi nɛ̀ nù yaknɛ sót-sót ha̧ o bíí nɛ̀ iŋ wi na mɛ kpa ŋgai zu wa.

²⁸Wa ku̧u̧ naŋ wora Bal-Pɛɔr, wa nyɔŋa saɗi-wor-sɔ̧ nɛ̀ wa gbɛɛ ha̧ o géé-sɔ̧.

²⁹See Sɔ̧ ɗaŋa tɛ ɗaŋ tom'i nɛ̀ wa dea'i ɓɛɛ gasa bɔnɛ tik zu wa.

³⁰Nɛ́ mɔ'ɔ nɛ̀ Pinas kura gɔn kita zu wa, ɓɛɛ bɔnɛ‘i kaɗi;

³¹nɛ́ mɔ‘i sa o tugun bíí we ɗoŋ deemɔ nɛ yuwar-a ko Pinas ɓɔnsɛnɛ.

³²O be Israɛl dee mɔ ɗaŋ see Sɔ̧ sɛn nú yí Mɛriba, nɛ́ mɔ'ɔ nɛ̀ see Moisɛ tu̧a,

³³ɓɛɛ a̧ tɔ̧ wen ɗulugbuk dam nù, ɓɛɛ bɔnɛ tik zu a̧.

³⁴GASA WAN baa tɔ̧ so ndé, wa a̧ kum o dukbíí nɛ̀ iŋ a̧ na yinɛ, ɓɛɛ o be Israɛl zii wen kɔ̧-a̧ na;

³⁵wa hura ŋmaa in o bíí nɛ̀ iŋ kpasa Sɔ̧ na, wa zɔka ɗoŋ deemɔ kɔ-wa.

³⁶O be Israɛl ku̧u̧ naŋ ɗafa o géé-sɔ̧ ko o wi nɔ‘i, ɓɛɛ o géé-sɔ̧ nɔ‘i duk ti wa hee pɛ́r-ba-wa ga,

³⁷wa gbɛɛ o bem kɔ-wa mɛ be-wiwii-a in o be-okoo-aa ɗafi nɛ̀ o géé-sɔ̧ nɔ‘i.

³⁸Wa gbaia tɔk-tɛ nɛ̀ duk zóóŋ géè a nù, mɛ̀ nɛ́ tɔk-tɛ o bem kɔ-wa mɛ be-wiwii-a in be-okoo-a, ɗafi nɛ̀ o géé-sɔ̧ ko o be Kanaŋ, ɓɛɛ nɛ́ mɔ'ɔ nɛ̀ simbo tɔk'i baa nù kɔ-wa lɛŋ.

³⁹O tom kɔ-wa pi̧i̧ ndiŋ tɛ-wa, deemɔ kɔ-wa pi̧i̧ búù zu wa;

⁴⁰ŋga nyimsea ko GASA WAN kura zu dukbíí kɔ‘i, ɓɛɛ nyɛr mɔɔ-oi kɔ̧-a̧ de a̧.

⁴¹A̧ ee wa er o ŋma tugun bíí ɓɛɛ o wisɛn kɔ-wa kifi ɔ wan zu wa;

⁴²o wi-sɛn-wa kpee wa e nù, ɓɛɛ e wa nɛ̀ mɔɔ-nukuri kɔ-wa.

⁴³Ko Sɔ̧ nɛ́ kpasa o be Israɛl tɛ ŋgimbi lɛŋ, ɓɛɛ kɔ-wa kànà nɛ́ dee ŋgazu in a̧, yɔ nɛ̀ kaya siti siti.

⁴⁴Sɔ̧ zia aia-nú kɔ-wa, ɓɛɛ de ko ha̧ wa,

⁴⁵wen tɛ-a mbaŋa ɗoŋ nɔɔ-tɔk n'aa nɔɔ so in wa; tɛ-a gbina yɔsɛ tɛ gasa kɔ̧ɔ̧mɔ kɔ̧-a̧,

⁴⁶ɓɛɛ a̧ de ha̧ o bíí nɛ̀ kaia so wa nɛ̀ bara mɛ zɔk wa nɛ̀ ko.

⁴⁷GASA WAN, Sɔ̧ k’ɛɛ, ɛ̀nɛ̀ kpásí yɛ! Ɛ̀nɛ̀ káí yɛ gbonɛ mgbara o gɔni tugun bíí, h’ɛ́ɛ́ mɛ de osoko h’ɛ́nɛ́ zɔn nɛ̀ ɛnɛ nɛ̀ desee mbɛt.

⁴⁸Zɔnamɔ a̧ dúk nɛ́ ko GASA WAN, Sɔ̧ ko Israɛl, hegɔ ɓɔnsɛnɛ, kpoo nɛ kpoo, ɓɛɛ o bíí lɛŋ a̧ tɔ̧́: «Aamɛn! Aleluya!»