Read Northwest Gbaya GIMA 109 Bible Online

GIMA 109 - Northwest Gbaya bible

GIMA 109

¹Gima ko David ha̧ wan-duk-zu-gima. Sɔ̧, wi n'am zɔn’ɛ, ɛ̀nɛ̀ úsí tɛ‘nɛ́; k’ɛ́nɛ́ duk nɛ oi nú‘nɛ́ selele ɓɔna!

²O wi-ɗaŋ-wen tɛ bíí in o wi-tɔ̧-yɔka-wen suɓa ŋmaa tɔ̧ nɛ̀ wen ndela zu'm;

³wa zika'm kpa ŋmaa ɗɛ́kɛ́t nɛ̀ see-sɛn-mɔ e nɛ̀ ɗɔra tɛ‘m nɛnɛ géè.

⁴Mɔɔ-oi demɔ n'am de ha̧ wa nɛ́ ɗɔa'm nɛ̀ wa ɗɔ‘i, ɓɛɛ tom-dee kɔ‘m kànà nɛ́ kɔfa-sɔ̧;

⁵kà‘m dé demɔ in wa, wa kifa er ha̧‘m nɛ ɗaŋ-a; kà‘m dé sɛm in wa, ɓɛɛ kɔ-wa nɛ́ sɛna'm.

⁶Wen-tɔ̧ɔ̧ kɔ-wa sitɛ ŋmaa nɛ́ mɔ'ɔ: «Ɛ̀nɛ̀ kíí ŋma ɗaŋ wi-gɔn-kita pi̧ zu a̧, ɛ̀nɛ̀ kíí bíí nɛ̀ tɛ ɓir wen e nú-a e katɛ a̧,

⁷ɓɛɛ wen a̧ bá a̧ wese-ɓa-wen; kɔfa-sɔ̧ kɔ̧-a̧ a̧ dák wen pi̧ zu a̧.

⁸«Wese duka-a kɔ̧-a̧ zaŋnu a̧ hɔ́ yiri, ŋma bíí a̧ bá fara oi-aa;

⁹o bem kɔ̧-a̧ a̧ kífí be-oi, ɓɛɛ kóò kɔ̧-a̧ a̧ duk nɛ́ ko-gera.

¹⁰«O bem kɔ̧-a̧ a̧ pófí kɔfi nɛ̀ mɔ nɛ̀ mbɔɗɔnu nɛnɛ, bíí a̧ ndák wa nɛ̀ kɔ̧ gbɔsa tua tɛ kɔfamɔ-búù kɔ-wa nɛnɛ;

¹¹wi-gbak-gɔni-mɔ a̧ kpé nú mɔ kɔ̧-a̧ kai lɛŋ, ɓɛɛ gɛnɛ a̧ ŋmákpárí mbɔi kɔ̧-a̧ yaknɛ.

¹²«Ká ŋma bíí kpɔk ha̧ mɔ ha̧ a̧ na, ká ŋma bíí de ko ha̧ o be-oi-aa na mbɛt,

¹³gbakna o bezaŋ-aa kuma lɛŋ wen ká‘i tɛɛ zii nin-wa mgbara tugun bíí mɛ ɗoŋ.

¹⁴«Ká tɛ-wi bi ɗoŋ yɔɔ-kaya ko o dáà kɔ̧-a̧ na, ká ɗaŋmɔ ko nàà kɔ̧-a̧ bi yinɛ na mbɛt;

¹⁵o ɗaŋmɔ nɔ‘i a̧ yor ɓɔn yí GASA WAN mgbemgbaa ha̧ a̧ gɔn kita zu wa ha̧ tɛ-wi bi ɗoŋ wa war kpɔk!

¹⁶«Wen bó nɛ́ wi’ɛi kɔ̧ɔ̧ so dee demɔ tɛ duka-a kɔ̧-a̧ na; yí-tom kɔ̧-a̧ so kànà nɛ́ ndaka o wisan in wi-kɔsa a taŋ gbɛ nɛ̀ o wi nɛ̀ see ŋmana a nù.

¹⁷Tom-dee kɔ̧-a̧ so nɛ́ foma bíí; ɓɛɛ fom kɔ̧-a̧‘i a̧ sí ɗoŋ zu a̧. Ɓɛɛ nɛ̀ ko ga̧a̧mɔ n'aa kɔ̧ so ha̧ ŋma-a mɛ kpa na'i, ga̧a̧mɔ‘i a̧ yú a̧ ŋgal-ŋgal.

¹⁸«A̧ zɔk so kɔ̧-a̧ fom'i hee laa-pi̧-tɛ ga; fom'i a̧ yérí a dɔkbɔɗɔk, ɓɛɛ a̧ a̧ gá̧ hɔ̧fi̧ɔ̧ɔ̧ hee mbɔ-gba̧a̧ ga.

¹⁹Kpɔk fom'i a̧ dúk nɛ́ kanda nɛ̀ tɛ nyɛkɛ̧ɗi zaŋ-aa kpɛ́m duk nɛnɛ ɓɔnsɛnɛ.»

²⁰O mɔɔ nɔ‘i lɛŋ a̧ dúk nɛ́ kifa-er ko GASA WAN ha̧ o bíí nɛ̀ ɗaŋ wen-tɛ‘m.

²¹GASA WAN, ɛ̀nɛ̀ yé ɗoŋ am nyɛm nɛ̀ ɗoŋ yora-ɗoŋ-wen k’ɛ́nɛ́; ɛ̀nɛ̀ kpás'am wen gɔna-kita k’ɛ́nɛ́ ɔ dee nyɛmna.

²²See-am gbɛŋ gbɛŋ zɛk-zɛk tɛ san n'am duk in kɔsa n'am de nɛ̀ tɛ‘m;

²³mi hɔɔ ŋmaa in gi̧ɔ̧, wa pɛra'm pi̧ nù hee gba-dɔya ga.

²⁴Zugur-am fee gbɛŋɛnyɛŋɛ tɛ duka-a nɛ̀ mgbaɓa-nú; mi ɔ̧ka̧ ba gba̧a̧.

²⁵Mi kifa mɔɔ-zɛkɛɗi kɔ-wa, bíí nɛ̀ zɔk am lɛŋ mi̧i̧ nɛ zu.

²⁶GASA WAN, Sɔ̧ kɔ‘m, ɛ̀nɛ̀ gbák am! Ɛ̀nɛ̀ kpás'am tɛ dee demɔ k’ɛ́nɛ́!

²⁷Ɛ̀nɛ̀ dé ha̧ wa mɛ iŋ ndé, nɛ́ er'nɛ́'ɛ de mɔɔ nɔ‘i lɛŋ, nɛ́ ɛnɛ'ɛ gbak am!

²⁸Kóó wa foma so'm, k’ɛ́nɛ́ kànà nɛ́ toka de yoŋgo zu'm; kóó wa kia so nɛ́ wen in am, ziimɔ tɛ ba nɛ́ wa; ɓɛɛ kɔ‘m, wi-de-tom k’ɛ́nɛ́, mi tɛ duk kɔ‘m nɛ̀ desee.

²⁹Búù a̧ bá o wi-ɓir-wen e nú‘m; ziimɔ a̧ bá wa diti dík-dík hee gba-laa ga.

³⁰Kɔ‘m, mi tɛ de nɛ́ osoko ha̧ GASA WAN; mi tɛ zɔn nɛ́ a̧ mgbara o giiwi

³¹wen nɛ́ a̧ a̧ ye ɗoŋ wi-kɔsa mɛ kpas'a er o bíí nɛ̀ kɔ̧ɔ̧ mɛ gɔn ɗaŋ kita zu a̧ mɛ gbɛ a̧ yinɛ.