Read Northwest Gbaya GIMA 115 Bible Online

GIMA 115 - Northwest Gbaya bible

GIMA 115

¹Bó nɛ́ ha̧ nin yɛ mɛ hur na, GASA WAN, bó nɛ́ ha̧ nin yɛ mɛ hur na, ɓɛɛ ɛ̀nɛ̀ dé ha̧ nin'nɛ́ mɛ hur ɛ̧, zaŋ yora-ɗoŋ-wen in gɔna-kita k’ɛ́nɛ́ nɛ̀ yuwar-a,

²wen ká o bíí nɛ̀ iŋ‘nɛ na tɛ́ɛ̀ mam yɛ tɔ̧ nɛnɛ‘e: «Sɔ̧ kɔ-wa nɛ̀ wa ndíkírí nin-a'i a̧a̧ bɔɔ déè?»

³Sɔ̧ k’ɛɛ nɛ̀ a̧a̧ yiwese de nɛ́ mɔ lɛŋ n'aa kɔ̧a̧.

⁴O géé-sɔ̧-ɓoo-lɔr in bu-mbɔi kɔ-wa nɛ́ géé mɔ nɛ‘i dee nɛ̀ er sɔɔ géè.

⁵O sɔ̧ nɔ‘i a̧a̧ nɛ̀ nú, ɓɛɛ wa tɔ̧ wen na, gbaayí-wa a̧a̧ sɛnɛ, ɓɛɛ wa zɔk mɔ na,

⁶zer-wa a̧a̧ sɛnɛ, ɓɛɛ wa zii mɔ na, zɔ̧ɔ̧-wa a̧a̧ sɛnɛ, ɓɛɛ nun pɛr mɔ na mbɛt.

⁷Er-wa a̧a̧ sɛnɛ, ɓɛɛ tam mɔ na, naŋ a̧a̧ sɛnɛ, ɓɛɛ wa nɛ nɔ̀ na, kóó be ku̧i̧amɔ gbo nɛ̀ kɔ̧ war ger-wa na.

⁸O wi-dui o géé-sɔ̧ nɔ‘i in o wi nɛ e ta nɛ wa tɛ hɔ kànà ŋmaa in wa.

⁹K’ɛ́nɛ́, o bezaŋ Israɛl, ɛ̀nɛ̀ é ta nɛ GASA WAN! Nɛ́ a̧ kpɔk ɓɛɛ a̧ duk nɛ́ wi-gbak'nɛ́ in ŋgee-biro k’ɛ́nɛ́.

¹⁰K’ɛ́nɛ́, o wi-ɗafi-sɔ̧, bezaŋ Arɔŋ, ɛ̀nɛ̀ é ta nɛ̀ GASA WAN! Nɛ́ a̧ kpɔk ɓɛɛ a̧ duk nɛ́ wi-gbak'nɛ́ in ŋgee-biro k’ɛ́nɛ́.

¹¹K’ɛ́nɛ́, o wi-yu-kíí GASA WAN, see'nɛ́ a̧ dúk tɛ GASA WAN! Nɛ́ a̧ kpɔk ɓɛɛ a̧ duk nɛ́ wi-gbak'nɛ́ in ŋgee-biro k’ɛ́nɛ́.

¹²Tɛ GASA WAN bi ɗoŋ yɛ na; a̧ tɛ tok de yoŋgo zu yɛ, a̧ tɛ tok de yoŋgo zu o bezaŋ Israɛl, a̧ tɛ tok de yoŋgo zu o bezaŋ Arɔŋ,

¹³a̧ tɛ tok de yoŋgo zu o wi-yu-kíí a̧, o bem gu nɛ̀ o gasawi mbɛt.

¹⁴GASA WAN a̧ dé h’ɛ́nɛ́ nyɛɓi in o bezaŋ‘nɛ́ lɛŋ;

¹⁵GASA WAN nɛ̀ dee yiwese in nù a̧ tók de yoŋgo zu'nɛ́.

¹⁶Yiwese nɛ́ ko GASA WAN, ɓɛɛ nù'ɛ a̧ ha̧a̧ ha̧ o bezaŋ Adam.

¹⁷Bó nɛ́ o fio nɛ̀ nú-wa kpea si ɗɔɔ nù mɛ a̧ tɛ zɔn GASA WAN na,

¹⁸ɓɛɛ k’ɛɛ, ɛ́ɛ́ zɔn nɛ GASA WAN, ku̧u̧naŋ-a kinii hegɔ yaknɛ kpoo nɛ kpoo. Aleluya!