Read Northwest Gbaya GIMA 116 Bible Online

GIMA 116 - Northwest Gbaya bible

GIMA 116

¹Mi kɔ̧ɔ̧ GASA WAN wen a̧ zii aia-nú kɔ‘m zii;

²a̧ yeŋ zer pii tɛ‘m yeŋ; ŋgimbi n'am biti kpasa, mi tɛ sa sara sitɛ a̧.

³O nyak-fio hɛra so'm, o yɔk-fio yuɓura so'm mbɛt, dita-see in kíì bira so'm e nù;

⁴ɓɛɛ nɛ́ mɔ'ɔ n'am saa GASA WAN nɛ̀ nin tɔ̧ nɛnɛ‘e: «GASA WAN, ɛ̀nɛ̀ kpás'am!»

⁵GASA WAN nɛ́ wan-de-mɔ nɛ yuwar-a nɛ̀ duna nɛ kɔ̧ɔ̧mɔ; Sɔ̧ k’ɛɛ nɛ́ wan-de-ko;

⁶GASA WAN nɛ́ wan-yor-ɗoŋ o geɗek-wi; mi duka so nɛ́ ziɓa-wi, ɓɛɛ a̧ kpas'am.

⁷Sɔ̧-tɛ‘m, mɛ̀ sí ɗoŋ fara-ɔm-tɛ kɔ-mɛ, wen GASA WAN dee demɔ in mɛɛ.

⁸A̧ kpasa mɛ tɛ fio, a̧ dii mi̧i̧kɔ̧a̧ yí‘m yinɛ, a̧ baa naŋ-am nɛ̀ ŋgɔn ká‘m tɛɛ yo nù.

⁹Mi tɛ nɛ nɔ̀ ti GASA WAN zu nù mgbara o bíí nɛ ya kpasa.

¹⁰Mi nɛ́ mgbák wi-kɔsa; mɔ kpɔk, mi e ta nɛ̀ GASA WAN.

¹¹Tɛ ŋgimbi bɔnɛ kɔ‘m mi tɔ̧ɔ̧ so ndé: «Bíí nɛ̀ duk’ɛ, bó nɛ́ mɔ ha'i mɛ e nɛ̀ ta na.»

¹²Ge demɔ ge n'am tɛ de si ɗoŋ ha̧ GASA WAN oi dɔka demɔ n'aa dee ha̧‘m’ɛ ge?

¹³Mi tɛ ba bera-gan-zu-mɔ kɔ‘m nɛ̀ ŋgɔn sa nɛ̀ nin-a, de nɛ̀ osoko ha̧ a̧ wen n'aa kpasa'm.

¹⁴Mi tɛ de mɔ n'am baa ha̧ so nú wen-aa ha̧ a̧ sɛn ti dukbíí kɔ̧-a̧ lɛŋ.

¹⁵GASA WAN nyim tɛ tɛ fio ko o wi-mbo-zu ha̧ a̧ nyɛmna.

¹⁶GASA WAN, nɛ́ mi, wi-de-tom k’ɛ́nɛ́, nɛ́ mi, bem ko okoo-de-tom k’ɛ́nɛ́, nɛ́ mi ɛ́nɛ́ gboo tɛ yɔk-fio.

¹⁷Mi tɛ ɗafi Sɔ̧ de nɛ̀ osoko sa nɛ̀ GASA WAN nɛ̀ nin;

¹⁸mi tɛ de mɔ n'am baa ha̧ so nú wen-aa ha̧ GASA WAN sɛn ti dukbíí kɔ̧-a̧ lɛŋ.

¹⁹Mi tɛ de mɔ‘i ti mɔi̧a-a ko o bíí kɔ̧ bee-gara ko GASA WAN see Jerusalɛm mɛ. Aleluya!