Read Northwest Gbaya GIMA 135 Bible Online

GIMA 135 - Northwest Gbaya bible

GIMA 135

¹Aleluya! Ɛ̀nɛ̀ zɔ́n nin GASA WAN, ɛ̀nɛ̀ zɔn a̧, ɛ̀nɛ̀ o wi-de-tom kɔ̧-a̧,

²ɛ́nɛ́ o wi-de-tom kɔ̧ tua ko GASA WAN, ɛ́nɛ́ o wi-de-tom bee-gara ko Sɔ̧ k’ɛɛ!

³Ɛ̀nɛ̀ zɔn GASA WAN, wen a̧ ɔ dee! Ɛ̀nɛ̀ bíí gima nɛ̀ nin-a nɛ̀ mɔɔ-mbɛr, wen a̧ ɔ dee; a̧ nɛ́ wan nɛ‘i tɛ kɔ̧,

⁴wen a̧ hoka nɛ́ Israɛl, bezaŋ Jakob, mɛ́ duk nɛ́ mgbák mɔ kɔ̧-a̧.

⁵Ɓɛɛ kɔ‘m, mi iŋa GASA WAN ɔ gasa, GASA WAN, Sɔ̧ k’ɛɛ, gana o ŋma sɔ̧ lɛŋ,

⁶wen mɔ nɛ̀ GASA WAN kɔ̧ɔ̧ mɛ de lɛŋ, nɛ́ mɔ‘i a̧ a̧ de sɛn yiwese in mbɔɗɔnu hɔ ndaa ɗuka yì mɛ in ɗuka-fara mɛ mbɛt lɛŋ.

⁷Nɛ́ a̧ a̧ de ha̧ o tura-zan mɛ daŋ nɛ̀ ndaa-zan mɛ tɛnɛ; nɛ́ a̧ a̧ de ha̧ kórò mɛ pi̧, ha̧ kiitɛ yì-kórò mɛ hɔ, in ha̧ búk mɛ yu nɛ kɔ̧ gba-dam kɔ̧-a̧ mɛ tɛnɛ mbɛt.

⁸A̧ gbɛɛ o kaya-bem nú Egiptɛ yinɛ lɛŋ, o bíí gu nɛ̀ o mɔ-dai mbɛt;

⁹a̧ dee mɔɔ-usi-mɔ in mɔɔ-kifi pi̧ mgbara o be Egiptɛ, pi̧ zu wannu in o wi-de-tom kɔ̧-a̧ lɛŋ.

¹⁰A̧ kuma o tugun bíí a nù gbuɗuk, ɓɛɛ a̧ gbɛ o ŋga wannu yinɛ mbɛt;

¹¹a̧ gbɛɛ Sihɔŋ, wannu ko o be Amɔr, in Og, wannu Basaŋ, a̧ ɗaŋa o mɔɔ-wan ko Kanaŋ lɔkɔti-lɔkɔti,

¹²ɓɛɛ a̧ ha̧ nù ko o wi nɔ‘i nɛ̀ mɔɔ-oi ha̧ Israɛl, dukbíí kɔ̧-a̧.

¹³GASA WAN, nin'nɛ́ tɛ duk hegɔɔ ɓɔnsɛnɛ; tɛ yɛ tɛ mbaŋ ɗoŋ‘nɛ́ hɔ tɛ o bezaŋ yɛ nɛnɛ hegɔ kpoo nɛ kpoo,

¹⁴wen GASA WAN gɔn kita zu dukbíí kɔ‘i nɛ̀ yuwar-a, ɓɛɛ a̧ dee ko ha̧ o wi-de-tom kɔ̧-a̧ mbɛt.

¹⁵Sɔ̧́-de-nɛ-lɔr in bu-mbɔi nɛ́ géé fɛŋa-mɔ nɛ̀‘i dee nɛ̀ er sɔɔ géè,

¹⁶wen wa a̧a̧ nɛ̀ nú, ɓɛɛ wa tɔ̧ wen na, gbaayí-wa a̧a̧ sɛnɛ, ɓɛɛ wa zɔk mɔ na;

¹⁷zer-wa a̧a̧ sɛnɛ, ɓɛɛ wa zii mɔ na; ŋma géé ɔmi bo géé boa-a tɛ-wa na!

¹⁸O wi-ɓo o géé-sɔ̧ nɔ‘i in o wi nɛ̀ e ta nɛ̀ wa tɛ hɔ kana ŋmaa in wa!

¹⁹Ɛ́nɛ́ o bíí nutua ko Israɛl, ɛ̀nɛ̀ zɔ́n GASA WAN! Ɛ́nɛ́ o bíí nutua ko Arɔŋ, ɛ̀nɛ̀ zɔ́n GASA WAN!

²⁰Ɛ́nɛ́ o bíí nutua ko Levii, ɛ̀nɛ̀ zɔ́n GASA WAN! Ɛ́nɛ́ o wi-yu-kíí GASA WAN, ɛ̀nɛ̀ zɔ́n a̧!

²¹Zɔnamɔ a̧ dúk nɛ ko GASA WAN si Siɔŋ, wan nɛ̀ duk kɔ‘i Jerusalɛm mɛ! Aleluya!