Read Northwest Gbaya GIMA 139 Bible Online

GIMA 139 - Northwest Gbaya bible

GIMA 139

¹Gima ko David ha̧ wan-duk-zu-gima. GASA WAN, ɛ́nɛ́ kia mɔ tɛ‘m, ɓɛɛ ɛ́nɛ́ iŋa'm.

²Kóó a̧‘m kur yor nɛ̀ ŋgɔn, kóó a̧‘m duk nɛ́ nù mbɛt, ɛ́nɛ́ iŋa; nɛ̀ fara-duk k’ɛ́nɛ́ mɛ tɛnɛ, ɛ́nɛ́ iŋa o taamɔ kɔ‘m lɛŋ.

³Kóó mi nɛ̀ɛ́ nɛ́ nɔ̀, kóó mi ɔ nɛ nù gɔn gado kɔ‘m, ɛ́nɛ́ iŋa, wen ŋma mɔ kɔ‘m nɛ̀ yɔɔ‘nɛ́ bo na.

⁴Kóó nɛ́ wen a̧ hɔ́ kɔ̧ nú‘m ha̧‘m mɛ tɔ̧, mi tɛ tɔ̧ wen'i hɔ̧ɔ̧ na, ɓɛɛ GASA WAN, ɛ́nɛ́ iŋa gba̧a̧ wen-aa kaɗi.

⁵Ɛ́nɛ́ zika'm e see-a, ɛ́nɛ́ guu er'nɛ́ zu'm;

⁶mi hɛɗi ká̧ iŋamɔ k’ɛ́nɛ́ na, wen iŋamɔ k’ɛ́nɛ́ nɛ́ zɔm mɔ n'am nyɛm mɛ kpa ndaa-a na.

⁷Ge fara ge a̧‘m tɛ nɛ sɛnɛ ká‘m kpa ŋmaa in ɔmi k’ɛ́nɛ́ na ge? Mi tɛ yu mɔ si déè nɛ̀ yí‘nɛ́ beka zɔk am na ge?

⁸Kà‘m é zu'm si gba̧a̧-yí-zan mɛ, ɓɛɛ ɛ́nɛ́ nɛ́ mɔ'ɔ n’ɛnɛ duk nɛ̀ ti’ɛ; kà‘m nɛ́ ye ko o fio, ɛ́nɛ́ nɛ́ mɔ'ɔ n’ɛnɛ duk’ɛ!

⁹Wɔr-ɓaa'm a̧ bó so ha̧‘m mɛ bu̧i̧ so si daŋa-wese mɛ, kóó ha̧‘m mɛ ku gba-tɔp si yee-wese mɛ wó,

¹⁰kànà nɛ́ er'nɛ́ a̧ tɛ̀ɛ́ mgbɔ‘m nɛnɛ kasi nɛ̀‘m sɛn hi̧i̧ mbɛt.

¹¹Kà‘m tɔ̧́ so'e ndé, sa̧a̧mɔ a̧ bá tum, ɓɛɛ tum a̧ kpé zu'm wó,

¹²tum duk kɔ‘i nɛ́ sa̧a̧mɔ ti'nɛ́, wen tum tok sɛn yí‘nɛ́ hee wese ga.

¹³Mɔ mɛ́ tɛ‘m lɛŋ, nɛ́ ɛ́nɛ́'ɛ dea; nɛ́ ɛ́nɛ́'ɛ mboɗa'm pi̧ kɔ̧ zaŋ nàà kɔ‘m.

¹⁴Mi de osoko h’ɛ́nɛ́ wen gasamɔ n’ɛnɛ dee sɛn tɛ‘m; ɛ́nɛ́ dee gasa mɔɔ-kíì sɛn tɛ‘m, mi iŋa'e o mɔ n’ɛnɛ dee tɛ‘m lɛŋ nɛ́ mɔɔ-gɔn-ɗɛɗɛ nɛ̀ mbetɛ.

¹⁵Ŋgimbi nɛ̀ o dokoɗo-tɛ‘m tɛ ye nú ŋmaa kɔ̧ zaŋ naa kɔ‘m na, ŋgimbi n’ɛnɛ a̧a̧ tɛ dea'm nɛ̀ hu̧sa̧-a̧, ɛ́nɛ́ iŋa'm kaɗi.

¹⁶O deemɔ kɔ‘m lɛŋ duk mgbák yí‘nɛ́; mɔɔ nɔ‘i lɛŋ yɔra zaŋ kalata k’ɛ́nɛ́. Nɛti sɛka wa biti ko'm, ɛ́nɛ́ tɔra zɛ duka-a kɔ‘m zu nù'ɛ dam lɛŋ kaɗi.

¹⁷Sɔ̧, ɔ ŋgaya ha̧‘m mɛ kpa ndaa taamɔ k’ɛ́nɛ́ hɔ nduti-a, wen wa dɔka gan iŋamɔ ko bíí.

¹⁸Mi kɔ̧ɔ̧ mɛ tɔr wa lɛŋ, ɓɛɛ wa dɔka gan nyɛmɛ; kóó mi tɔra so wa lɛŋ hɔ nduti-a, ɛ́nɛ́ nɛ́ mɔ'ɔ n’ɛnɛ duk’ɛ!

¹⁹Sɔ̧, ɛ̀nɛ̀ tɛ́ɛ̀ kum o wi-ɗaŋ yinɛ gbuɗuk na nde? Ɛ́nɛ́ o wi-gbɛ-zu, ɛ̀nɛ̀ yák nyɛi̧ nɛ‘m!

²⁰Sɔ̧, wa sa nin'nɛ́ nɛ̀ ɔrmɔ sɔɔ géè; wa sa nin'nɛ́ wen dee ɗaŋmɔ ɓɛɛ.

²¹GASA WAN, mi tɛ sɛn wan o wi-sɛn'nɛ́ na nde? See-am tɛ tu̧ zu o wi nɛ̀ de ŋgazu in'nɛ̀ɛ́ na nde?

²²Mi tɛ sɛn wa pi̧-er-tɛ-wee wen wa nɛ́ o wisɛn kɔ‘m mbɛt.

²³Sɔ̧, ɛ̀nɛ̀ kíí mɔ tɛ‘m hɔ kɔ̧ see-am mɛ; ɛ̀nɛ̀ wé‘m wen h’ɛ́nɛ́ mɛ iŋ taamɔ kɔ‘m.

²⁴Ɛ̀nɛ̀ zɔ́k naŋanɔ kɔ‘m ká‘m tɛɛ ba ɗaŋ war; ɛ̀nɛ̀ mgbɔ́‘m e tɛ de war nɛ̀ duk ɓɔnsɛnɛ.