Read Northwest Gbaya GIMA 14 Bible Online

GIMA 14 - Northwest Gbaya bible

GIMA 14

¹Gima ko David ha̧ wan-duk-zu-gima. O wi nɛ̀ bó nɛ̀ kpasa taamɔ na ta kɔ‘i ndé, Sɔ̧ bo na. Ɗaŋ taamɔ kɔ-wa ɗaŋa wa lɛŋ; ŋma wi-de-demɔ bó géé boa-a ɓɔna.

²GASA WAN duk yiwese mɛ mbaɗi nɛ mɔ pii zu o bezaŋ Adam ha̧ a̧ mɛ zɔk kà ŋma wi-iŋ-mɔ nɛ̀ kii Sɔ̧ nɛ̀ bòó sɛnɛ wó,

³ɓɛɛ kóó kpɔk bo na. Wa lɛŋ a̧ra̧, deemɔ kɔ-wa lɛŋ ɗaŋa, ŋma wi-de-demɔ bo géé boa-a kpɔk na.

⁴O wi-de-mɔ de na nyɔŋ kɔ‘i nɛ dukbíí kɔ‘m hee kam-nyɔŋ kɔ-wa ga. Wa sa nin GASA WAN na. Wa iŋ mɔ na nde?

⁵Bele tɛ zar wa nɛ̀ wa beka iŋ zu-a na wen Sɔ̧ a̧a̧ ɗoŋ o wi-de-mɔ nɛ yuwar-a.

⁶Ɛ́nɛ́ é k’ɛ́nɛ́ taamɔ ko o wi-kɔsa tɛ geemɔ, ɓɛɛ GASA WAN nɛ́ gi̧ɔ̧-hu̧si tɛ-wa.

⁷O'o tɛ tɛ nɛ̀ Siɔŋ mɛ kpasi o be Israɛl o? Ŋgimbi nɛ̀ GASA WAN tɛ gbo dukbíí kɔ‘i yinɛ tɛ bara, tortɛ tɛ ba Jakob ɓɛɛ o be Israɛl tɛ ya nɛ desee.