Read Northwest Gbaya GIMA 147 Bible Online

GIMA 147 - Northwest Gbaya bible

GIMA 147

¹Aleluya! Bia gima zɔn nɛ̀ Sɔ̧ k’ɛɛ nɛ́ demɔ; zɔna a̧ nɛ́ demɔ nyɛmna.

²GASA WAN nɛ́ wi-mbo Jerusalɛm nɛ̀ mbe-a! Nɛ́ à̧ á̧ mɔi̧a o bíí kɔ̧-a̧ pii nɛ ɗoŋ.

³Nɛ́ à̧ á̧ kpasa o wi nɛ̀ see-wa ŋmana; nɛ́ à̧ á̧ ɓara nyina a yí-da̧i̧ kɔ-wa.

⁴A̧ tɔra o sɔra yiwese dam lɛŋ ɓɛɛ a̧ a nin-wa kpɔk kpɔk mbɛt.

⁵Sɔ̧ k’ɛɛ ɔ gasa in a̧ ɔ ŋgaya mbɛt; wi nyɛm mɛ ba iŋamɔ kɔ̧-a̧ we nɛ̀ iŋamɔ ko bíí na.

⁶GASA WAN nɛ́ wi-gbak o wi-mɔka-see, ɓɛɛ a̧ nɛ́ wi-tir o wi-ɗaŋ a ɗɔɔ fuunu.

⁷Ɛ̀nɛ̀ bíí gima de nɛ̀ osoko ha̧ GASA WAN; ɛ̀nɛ̀ bíí gima nɛ̀ koloŋ ha̧ Sɔ̧ k’ɛɛ.

⁸Nɛ́ a̧ a̧ de ha̧ tura-zan mɛ kpe yí-zan, nɛ́ a̧ a̧ de ha̧ kórò mɛ hɔ, nɛ́ a̧ a̧ de ha̧ zɔ̧ mɛ hɔ zu o kaya, nɛ́ a̧ a̧ de ha̧ bɔr-nyɔnɔ mɛ dɛm;

⁹nɛ́ a̧ a̧ ha̧ nyɔŋmɔ ha̧ o ndai in o be gba-kɔra ŋgimbi nɛ wa hiɗi mɔ.

¹⁰Ŋgai ko nyaŋa in ŋgai ko ŋga wi-biro de tɛ-a na;

¹¹nɛ́ o wi-yu-kíí GASA WAN in o wi-e-ta nɛ̀ kɔ̧ɔ̧mɔ kɔ̧-a̧ a̧ de tɛ-a.

¹²Jerusalɛm, mɛ̀ gásí GASA WAN! Siɔŋ, mɛ̀ zɔ́n Sɔ̧ kɔ-mɛ!

¹³A̧ ŋgasa ɗoŋ nú tua kɔ-mɛ nɛ̀ de-a, a̧ toka de yoŋgo ha̧ o bem kɔ-mɛ;

¹⁴nɛ́ a̧ a̧ de ha̧ ga̧a̧mɔ mɛ duk zu nù kɔ-mɛ, in ha̧ zaŋ-mɛ mɛ sur nɛ̀ kam-gɔrɔ mbɛt.

¹⁵A̧ toma wen kɔ̧-a̧ pii zu nù, ɓɛɛ wen'i dam zaŋnu lɛŋ,

¹⁶ɓɛɛ a̧ tom ɓɔrɔ mɛ kpe zu nù hee nduu-gera ga; a̧ toma ɓɔrɔ tɛnɛ kpe zu nù lɛŋ.

¹⁷A̧ toma ɓɔrɔ tɛnɛ nɛ̀ dɔka-a; wi nɛ tɛ nyɛm mɛ yor ti gɛ̧ɛ̧ ɓɔrɔ‘i nɛ o?

¹⁸Nɛ́ mɔ'ɔ n'aa toma wen kɔ̧-a̧ tɛnɛ, ɓɛɛ ɓɔrɔ yeli dam fara lɛŋ; a̧ toma búk yu a zu ɓɔrɔ, ɓɛɛ ɓɔrɔ‘i yeli fok yaknɛ.

¹⁹A̧ usa wen kɔ̧-a̧ ha̧ Jakob, a̧ usa geŋa kɔ̧-a̧ ha̧ Israɛl.

²⁰Ŋma tugun bíí n'aa dee mɔ ha̧ wa hegɔ bo na, ŋma bíí nɛ̀ iŋa gɔna-kita kɔ̧-a̧ bo na, kànà nɛ́ Israɛl ɓɛɛ. Aleluya!