Read Northwest Gbaya GIMA 19 Bible Online

GIMA 19 - Northwest Gbaya bible

GIMA 19

¹Gima ko David ha̧ wan-duk-zu-gima.

²Yiwese we nɛ́ ɗoŋ gasamɔ ko Sɔ̧; gba̧a̧-yí-zan usi nɛ́ tom nɛ̀ er-a dea.

³Wese kpɔk kpɔk we nɛ́ ɗoŋ tom kɔ̧-a̧‘i ha̧ ŋmaa, ɓɛɛ zɛ kpɔk kpɔk tɔ̧ kànà nɛ́ wen-aa ha̧ o wan mɛ ɗoŋ yaknɛ.

⁴Ŋma gba̧a̧-wen kɔ-wa bo na, ŋma tɔ̧ɔ̧-wen kɔ-wa bo na, ŋma tiger-wa ha'i mɛ zii bo na mbɛt,

⁵ɓɛɛ mɔ nɛ̀ duk tɛ-wa dee sedaako ha̧ o bíí dam zu nù lɛŋ. Usamɔ kɔ-wa hɔɔ kànà nduti-nù mɛ. GASA WAN dee tua e zu wese ŋgɔn mɛ,

⁶ɓɛɛ wese gbo nɛ̀ kɔ̧ bɛr-tua'i nɛ̀ tortɛ hee wi-ba-kóò nɛ̀ mbe-a ga; ma nɛ yì yaknɛ ndɔɔŋ hee ŋma wi-a-yaa-gan-ŋmaa ga.

⁷Wese kur kura-a nɛ̀ nduti-zan mɛ tɛnɛ, ɓɛɛ a̧ nɛɛ kànà hegɔɔ hɔ nɛnɛ ɓii nduti-zan mɛ; ŋma mɔ nɛ̀ iŋ kpɔra-a kɔ̧-a̧ na bo na.

⁸Heembea ko GASA WAN dee nyɛmna, nɛ́ mɔɔ-ha̧ duka-kpasa ha̧ bíí. Usamɔ ko GASA WAN nɛ́ mɔɔ-e-nɛ-ta nyɛmna; usamɔ kɔ̧-a̧‘i gbak nɛ́ géé bíí mɛ kpa iŋa-mgbara-mɔ.

⁹O geŋa ko GASA WAN ɔ tana, nɛ́ mɔɔ-ha̧-desee ha̧ bíí. Heembea ko GASA WAN ɔ ŋgɛ́lɛ́lɛ́; nɛ́ a̧ a̧ kɛ̧ mgbara mɔ nɛ̀ sa̧a̧-a̧.

¹⁰Yuu-kíí GASA WAN ɔ sa̧a̧ mɔ‘i beka kaɗi na ɓɔnsɛnɛ. Gɔna-kita ko GASA WAN nɛ́ kpasawen; ɓɛɛ mɔ‘i lɛŋ duk nɛ yuwar-a.

¹¹Gɔna-kita kɔ̧-a̧ dee tɛ bíí gan de lɔr, kóó de sa̧a̧ lɔr; wen kɔ̧-a̧ ɔ̧ɔ̧ nyɔ̧ɔ̧ gan mbe nɔ̧́-gɔrɔ yaa-bu-sap.

¹²Nɛ́ usamɔ k’ɛ́nɛ́‘i a̧ duk nɛ́ de mbɔrɔ ha̧ wi-de-tom k’ɛ́nɛ́; wi nɛ̀ kasi o usamɔ nɔ‘i tɛ kpa zɔm yí-mɔ oi-aa.

¹³Nɛ́ o'o iŋa yɔɔ-kaya kɔ‘i nɛ̀ tɛ-wi o? Ɛ̀nɛ̀ é o yɔɔ-kaya n'am yɔa n'am iŋ na'i ha̧‘m.

¹⁴Ɛ̀nɛ̀ dór wi-de-tom k’ɛ́nɛ́ tɛ gasa-zu wen ká gasa-zu'i tɛɛ ɔ wan zu'm; ɓɛɛ hegɔ wen beka bo zu'm na, ɓɛɛ mi beka de gasa ɗaŋmɔ ti'nɛ́ na mbɛt.

¹⁵GASA WAN, ŋgimbi n'am duk ti'nɛ́, ɛ̀nɛ̀ dé ha̧ wen mɛ nú‘m in taamɔ mɛ kɔ̧ see-am lɛŋ mɛ nyɛm yí‘nɛ́. Ɛ́nɛ́ nɛ́ kam-ta kɔ‘m in wan-kpas'am!