Read Northwest Gbaya GIMA 22 Bible Online

GIMA 22 - Northwest Gbaya bible

GIMA 22

¹Gima ko David ha̧ wan-duk-zu-gima; ger gima’ɛ nɛɛ nɛ ɗoŋ tiger gima: Nana-zambɛrɛ mɛ gɔna-ndaa-zan.

²Sɔ̧ kɔ‘m, Sɔ̧ kɔ‘m wa, wen ge s’ɛnɛ ea'm duk ge? Mi ai nú‘m sitɛ‘nɛ́ takaɗi’ɛ, wen ge nde?

³Sɔ̧ kɔ‘m, kà‘m sá‘nɛ́ mɛ wese mbɛt, ɓɛɛ ɛnɛ kifi nú ha̧‘m na; kóó mɛ zɛ mbɛt mi ɔm tɛ‘m na.

⁴Ɓɛɛ k’ɛ́nɛ́, ɛ́nɛ́ nɛ́ Sa̧a̧-wi; wan nɛ̀ Israɛl zɔn, kànà nɛ́ ɛnɛ ɓɛɛ.

⁵O dáà k’ɛɛ ee so ta nɛ̀ ɛnɛ; wa ee ta nɛ̀ ɛnɛ, ɓɛɛ ɛnɛ kpasi wa.

⁶Wa saa so mɔ sitɛ‘nɛ́ ɓɛɛ wa kpasi; wa yaa so e nɛ̀ ta nɛ̀ ɛnɛ ɓɛɛ ziimɔ ba wa na.

⁷Ɓɛɛ kɔ‘m kinii, mi bó nɛ́ bíí ɓɔna; mi nɛ́ kokoɗo-dɔk, mi nɛ́ mɔɔ-da̧ ko bíí, wa e'm tɛ geemɔ.

⁸O wi-zɔk-am lɛŋ mam nɛ‘m wɛr nɛ̀ nú mi̧i̧ nɛ̀ zu-wa pii tɛ‘m;

⁹ɓɛɛ wa'e: «Hee mɔ'ɔ n'aa e ta nɛ̀ GASA WAN ga, GASA WAN'i a̧ kpasi kànà a̧ ŋgaɓo! GASA WAN nɛ́ kɔ̧ɔ̧ a̧ nɛ mbetɛ a̧ a̧ kpasi a̧, h’ɛ́ɛ́ zɔk!»

¹⁰Ɓɛɛ Sɔ̧, nɛ́ ɛnɛ'ɛ baa'm nɛ kɔ̧ zaŋ nàà kɔ‘m mɛ pi̧ nù, ɛnɛ'ɛ ea'm yí-ŋguɗi-a;

¹¹tɛ̀ gboa-a kɔ‘m nɛ̀ kɔ̧ zaŋ nàà kɔ‘m mɛ tɛnɛ a̧ wa pi̧i̧ nɛ̀‘m er'nɛ́. Ɛ́nɛ́ nɛ́ Sɔ̧ kɔ‘m nɛ̀ kɔ̧ zaŋ nàà kɔ‘m mɛ tɛnɛ.

¹²Kinii ŋgamɔ hɛɗa nɛ‘m dɔ̧ɔ̧ kaɗi, k’ɛ́nɛ́ duk nyɛi̧ nɛ‘m ɓɔna; ŋma wi-gbak-am bo na.

¹³O wi-kur-zu'm zika'm kpa nú ŋmaa hee o wiwii-ndai ga, o ŋgazu wiwii-ndai nú Basaŋ kɛra'm e see-a hee wan-da̧i̧-nam ga;

¹⁴wa ɓaa nú-wa pii tɛ‘m hee mɔ'ɔ nɛ dila sati nɛnɛ zu saɗi tuɓi nɛnɛ'ɛ ga.

¹⁵O gba̧a̧-tɛ‘m yela lɛŋ hee yì ga, tɛ‘m mɔka pútú-pútú kifi nɛ́ mbɔndɔ; see-am duk hee ndíá nɛ̀ yeli lɛtɛtɛ'ɛ ga.

¹⁶Kɔ̧ war ger-am kora kútú-kútú hee gbàrà-kpánà ga, leɓ‘am lata kɔ̧ war-ger-am. Ɛnɛ pi̧a'm tɛ fuunu-fio.

¹⁷O wi-de-ɗaŋmɔ kɛra'm e see-a hee gba gíí toyo ga; wa hɛra er-am in naŋ-am mbɛt.

¹⁸Mi ɔ̧ka̧ ba gba̧a̧; kɔ-wa, wa kɛ̧i̧ nɛ̀‘m ŋmaŋ nɛ̀ tɛ zu bɔnɛ kɔ‘m;

¹⁹wa kɛ̧ɛ̧ laa kɔ‘m nɛ̀ er ŋmaa, wa bìí mbaɗi gbɛ nɛ̀ laa kɔ‘m.

²⁰Ɓɛɛ GASA WAN, k’ɛ́nɛ́ duk nyɛi̧ nɛ‘m na! Ɛnɛ nɛ́ ŋgai kɔ‘m, ɛ̀nɛ̀ tɛ́ɛ̀ gbak am nɛ̀ haya-a na nde?

²¹Ɛ̀nɛ̀ kpás'am nú gba-paa ko o wi nɔ'ɔ, ɛ̀nɛ̀ kpás'am nú o toyo nɔ'ɔ,

²²ɛ̀nɛ̀ kpás'am nú o dila nɔ'ɔ, ɛ̀nɛ̀ kpás'am nú zak bara-nam nɔ'ɔ!

²³Ɓɛɛ mi tɛ de ha̧ nin'nɛ́ mɛ hur mgbara o nya'm; mi tɛ gasi'nɛ́ ti gba gíí bíí.

²⁴Ɛnɛ o wi-yu-kíí GASA WAN, ɛ̀nɛ̀ zɔ́n a̧! ɛnɛ o bezaŋ Jakob lɛŋ, ɛ̀nɛ̀ gásí a̧! Ɛnɛ o bezaŋ Israɛl lɛŋ, ɛ̀nɛ̀ dé kíì a̧!

²⁵Sɔ̧ e bɔnɛ ko wi-kɔsa tɛ geemɔ na, a̧ hu̧si sɔnti-a nɛ̀ a̧ na mbɛt; ŋgimbi n'aa saa sara sitɛ a̧, a̧ kifa nú ha̧ a̧.

²⁶GASA WAN, nɛ́ ɛ́nɛ́ a̧‘m gasi ti gba gíí bíí; mi tɛ de mɔ n'am baa ha̧ nú wen-aa ti o wi-yu-kíí‘nɛ́.

²⁷O wi-mɔka-see tɛ nyɔŋ mɔ zaŋ-wa sur; o wi-kíì GASA WAN tɛ gasi kànà a̧, ɓɛɛ duka-kpasa a̧ duk hegɔ ɓɔnsɛnɛ kpoo nɛ kpoo.

²⁸Tɛ o bíí zaŋnu lɛŋ tɛ mbaŋ ɗoŋ GASA WAN; wa tɛ pii ɗoŋ tɛ a̧. O pɛ́r-nam tɛ o tugun bíí lɛŋ tɛ gu nù ti a̧

²⁹wen wan nɛ́ ko GASA WAN kpɔk ɓɛɛ. Nɛ́ a̧ a̧ ɔ wan zu o tugun bíí.

³⁰O bíí nɛ̀ ɓɔna ɔɔ ya ɗɔɔ nù lɛŋ tɛ gu nù ti a̧; o fio tɛ gbɛ zugur nù ti a̧ mbɛt. GASA WAN e ha̧ wa mɛ duk kpasa kpoo nɛ kpoo na;

³¹o bezaŋ-am tɛ de tom ha̧ a̧. Bíí tɛ tɔ̧ wen ko GASA WAN ha̧ o bezaŋ-wa;

³²wa tɛ we ɗoŋ deemɔ nɛ yuwar-a kɔ̧-a̧ ha̧ dukbíí mɛ ɗoŋ nɛ̀‘i tɛ ko hɔ̧ɔ̧ na. Mɔɔ nɔ‘i lɛŋ nɛ́ GASA WAN a̧ dea.[5]