Read Northwest Gbaya GIMA 25 Bible Online

GIMA 25 - Northwest Gbaya bible

GIMA 25

¹Ko David. GASA WAN, Sɔ̧ kɔ‘m, mi gɔma er h’ɛ́nɛ́;

²mi e ta nɛ̀ ɛnɛ, k’ɛ́nɛ́ e ha̧ foe mɛ de'm na, k’ɛ́nɛ́ e ha̧ o wisɛn kɔ‘m mɛ gan zu'm na,

³wen wi nɛ̀ e ta nɛ̀ ɛnɛ, foe beka de a̧ na, ɓɛɛ ziimɔ tɛ ba nɛ o wi-e-ɗɔra tɛ‘nɛ́.

⁴GASA WAN, ɛ̀nɛ̀ dé ha̧‘m mɛ iŋ yuwar k’ɛ́nɛ́, ɛ̀nɛ̀ úsí war k’ɛ́nɛ́ ha̧‘m nɛ sa̧a̧-a̧;

⁵ɛ̀nɛ̀ mgbɔ́‘m nɛnɛ tɛ kpasawen k’ɛ́nɛ́, ɛ̀nɛ̀ úsí mɔ ha̧‘m wen ɛ́nɛ́ nɛ́ Sɔ̧ nɛ̀ kpas'am. Ŋgimbi lɛŋ mi e ta nɛ̀ ɛnɛ, GASA WAN;

⁶tɛ‘nɛ́'ɛ mbaŋ ɗoŋ demɔ in yora-ɗoŋ-wen k’ɛ́nɛ́ nɛ̀ duka nɛ̀ ku̧u̧naŋ-a mɛ tɛnɛ.

⁷Ká tɛ‘nɛ́ mbaŋ ɗoŋ ɗaŋmɔ in o yɔɔ-kaya kɔ‘m n'am dee so tɛ ŋgimbi daŋa-ŋgaiwi kɔ‘m na, ɓɛɛ tɛ dee demɔ k’ɛ́nɛ́, ɛ̀nɛ̀ dé ko ha̧‘m.

⁸GASA WAN ɔ dee in deemɔ kɔ̧-a̧ ɔ tana nyɛmna; nɛ́ a̧ a̧ mgbɔ o ɗaŋwi pii ɗoŋ tɛ tana-war.

⁹A̧ a̧ mgbɔ o wi-mɔka-see nɛnɛ tɛ deemɔ nɛ yuwar-a, nɛ́ a̧ a̧ usi war kɔ̧-a̧ ha̧ o wi-mɔka-see.

¹⁰Yuwar ko GASA WAN nɛ́ kɔ̧ɔ̧mɔ in kpasawen ha̧ o wi nɛ kasi heembea nɔɔ-tɔk kɔ̧-a̧.

¹¹GASA WAN, wen zu nin'nɛ́, ɛ̀nɛ̀ é o yɔɔ-kaya kɔ‘m ha̧‘m, wen yɔɔ-kaya kɔ‘m'i ɔ gasa.

¹²GASA WAN tɛ usi yuwar kɔ̧-a̧ ha̧ wi-yu-kíí a̧,

¹³ɓɛɛ wi’ɛi tɛ duk nɛ̀ de-a; o kpar bezaŋ-aa tɛ ba nù.

¹⁴GASA WAN tɛ usi ɗuka taamɔ kɔ̧-a̧ ha̧ o wi-yu-kíí a̧, ɓɛɛ a̧ usa nɔɔ-tɔk kɔ̧-a̧ ha̧ wa.

¹⁵Yí‘m ɓɔn tɛ GASA WAN wen nɛ́ a̧ a̧ bur yɔk yinɛ tɛ‘m.

¹⁶GASA WAN, ɛ̀nɛ̀ zík tɛ‘nɛ́ pii tɛ‘m, ɛ̀nɛ̀ dé ko ha̧‘m wen mi nɛ́ wi-kɔsa, wi-gbak-am bo na.

¹⁷Ɛ̀nɛ̀ dé ha̧ dita-see kɔ‘m mɛ ga̧, ɛ̀nɛ̀ mgbɔ́‘m yinɛ tɛ mɔ nɛ ba tɛ‘m;

¹⁸ɛ̀nɛ̀ zɔ́k ko tɛ‘m in bɔnɛ kɔ‘m, ɛ̀nɛ̀ é o ɗaŋmɔ kɔ‘m lɛŋ ha̧‘m.

¹⁹Ɛ̀nɛ̀ zɔ́k o wisɛn kɔ‘m dɔk dɔk siti; oee ŋga sɛnmɔ in dee ŋgamɔ kɔ-wa wa!

²⁰Ɛ̀nɛ̀ pɛ́m am! Ɛ̀nɛ̀ kpás'am! K’ɛ́nɛ́ e foe yí‘m na, wen fara-husi-tɛ‘m nɛ́ ɗoŋ‘nɛ́.

²¹Duka-a kɔ‘m zóóŋ in deemɔ kɔ‘m nɛ̀ tana-a a̧ yor ɗoŋ-am wen mi e ta nɛ̀ ɛnɛ.

²²Sɔ̧, ɛ̀nɛ̀ yé ɗoŋ Israɛl tɛ o ŋgamɔ nɛ̀ kpa a̧ lɛŋ!