Read Northwest Gbaya GIMA 27 Bible Online

GIMA 27 - Northwest Gbaya bible

GIMA 27

¹Gima ko David. GASA WAN nɛ́ sa̧a̧mɔ kɔ‘m in wan-kpas'am; kíì beka de'm ɓɔna. GASA WAN nɛ́ ŋga-fara-duk kɔ‘m; ŋma wi-pi̧-kíì tɛ‘m bo kɔ‘i na.

²Kà o wi-de-ɗaŋmɔ nɛ́ tɛ̀ɛ́ mɛ́ gbɛ‘m, kànà nɛ́ wa, o wisɛn nɔ‘i, a̧ naŋ tɛ mbali ŋmaa, ɓɛɛ wa tira a nù.

³Kóó nɛ́ o gíí wi-biro a̧ tɛ mɛ tik zu'm, tɛ‘m beka de nyir na kóó tikiɗi; kóó só nɛ́ ŋma gasa biro a̧ kur in am, mi tɛ e kànà ta nɛ̀ GASA WAN.

⁴Mɔ n'am kɔ̧ɔ̧ nyɛmna, n'am kii er GASA WAN, mɛ̀ nɛ́ wen ha̧‘m mɛ duk kɔ̧ tua kɔ̧-a̧ ŋgimbi lɛŋ n'am biti duk kpasa; ɓɛɛ ha̧‘m mɛ yeŋ gba de be tua kɔ̧-a̧ in ha̧‘m mɛ zɔk tua'i mbɛt nɛ̀ de-a,

⁵wen wese bɔnɛ a̧ tɛ e'm tɛ hu̧sa̧ fara kɔ̧ tua kɔ̧-a̧; a̧ tɛ hu̧s'am kɔ̧ tua-laa kɔ̧-a̧, ɓɛɛ a̧ tɛ ba'm e zu kam-ta mbɛt.

⁶Kinii mi tɛ ba zu'm nɛ̀ ŋgɔn ti o wisɛn kɔ‘m nɛ̀ zika'm; mi tɛ ɗafi Sɔ̧ de nɛ osoko ha̧ a̧ nɛ̀ tortɛ kɔ̧ tua-laa kɔ̧-a̧, ɓɛɛ mi tɛ bìì gima sumburi nɛ̀ a̧.

⁷GASA WAN, ɛ̀nɛ̀ zíí sara kɔ‘m, ɛ̀nɛ̀ dé ko ha̧‘m, ɓɛɛ ɛ̀nɛ̀ kífí nú ha̧‘m mbɛt.

⁸See-am hee ndé, à̧‘m kíí sɔnti'nɛ́ wó, ɓɛɛ sɔnti'nɛ́‘i nɛ́ mɔ‘i n'am kii'i, GASA WAN!

⁹K’ɛ́nɛ́ hu̧si sɔnti'nɛ́ nɛ̀‘m na. K’ɛ́nɛ́ ŋmásí wi-de-tom k’ɛ́nɛ́ yinɛ nɛ̀ ɗaŋsee na wen ɛ́nɛ́ nɛ́ wan-gbak-am; k’ɛ́nɛ́ zɔk am nɛ̀ yí na, k’ɛ́nɛ́ e'm duk na, Sɔ̧ Wan-kpas'am.

¹⁰Kóó kà dáà kɔ‘m in nàà kɔ‘m nɛ́ ea'm duk, GASA WAN tɛ kpɛk am.

¹¹GASA WAN, ɛ̀nɛ̀ úsí yuwar k’ɛ́nɛ́ ha̧‘m; ɛ̀nɛ̀ mgbɔ́‘m nɛ́ tɛ̀ de yuwar wen o bíí ndak nɛ́ ɗoŋ am mɛ de ɗaŋmɔ in am.

¹²K’ɛ́nɛ́ e'm er o wi-kur-zu'm na wen o wi-sedaako-ndela nɛ́ mɔ'ɔ nɛ̀ kur in am’ɛ; wa de nɛ da̧ mɛ de ŋgamɔ in am.

¹³Mi iŋa nɛ mbetɛ mi tɛ zɔk gba demɔ ko GASA WAN mgbara bíí zu nù'ɛ.

¹⁴Ɛ̀nɛ̀ é ta nɛ̀ GASA WAN! Ɛ̀nɛ̀ nyɔ́ŋ nin'nɛ́, ɛ̀nɛ̀ nɔ́ ŋgiɗi! Ɛ̀nɛ̀ é ta nɛ̀ GASA WAN!