Read Northwest Gbaya GIMA 30 Bible Online

GIMA 30 - Northwest Gbaya bible

GIMA 30

¹Gima ko David wen gbaŋa tua ko Sɔ̧.

²Mi zɔn nɛ ɛnɛ, GASA WAN, wen nɛ́ ɛnɛ'ɛ baa'm e ŋgɔn; ɛ́nɛ́ é ha̧ o wisɛn kɔ‘m mɛ mam am na.

³GASA WAN Sɔ̧ kɔ‘m, mi saa so mɔ sitɛ‘nɛ́, ɓɛɛ ɛnɛ kpas'am;

⁴GASA WAN, nɛ́ ɛnɛ'ɛ foa'm nɛ̀ ye ko o fio pii ɗoŋ; mgbara o wi-zir si fara'i lɛŋ, ɛnɛ kpasa nɛ‘m ɓɛɛ.

⁵Ɛ̀nɛ̀ o wi-mbo-zu ha̧ GASA WAN, ɛ̀nɛ̀ bíí gima zɔ́n nɛ̀ a̧; tɛ‘nɛ́'ɛ mbaŋ ɗoŋ tom ko Sa̧a̧ Wi’ɛi, ɓɛɛ ɛ̀nɛ̀ gásí a̧,

⁶wen nyimsea kɔ̧-a̧ nɛ́ mɔ nɛ̀ duk ŋgolom ɓɛɛ; dee ko kɔ̧-a̧ duk kɔ‘i kpoo nɛ kpoo. Mɛ ga̧a̧mɔ ɓɛɛ nú‘m paŋa, mɛ tutuyɛ nú‘m gɔna mami.

⁷Tɛ desee kɔ‘m mi tɔ̧ɔ̧ so ndé, ŋma mɔɔ-fo-tɛ‘m bo na.

⁸GASA WAN, ɛ́nɛ́ dee so demɔ in am tɛ baa'm e zu kusa kaya; nɛ́ mɔ'ɔ n’ɛ̀nɛ́ hu̧sa̧ tɛ‘nɛ́ nɛ̀‘m, ɓɛɛ bele zar am pi̧ nù.

⁹GASA WAN, mi sa nɛ mɔ sitɛ‘nɛ́; Sɔ̧ kɔ‘m, ɛ̀nɛ̀ dé ko ha̧‘m na nde?

¹⁰Kà‘m fe, nɛ́ ge ɛ̀nɛ̀ tɛ kpa tɛ yee kɔ̧ kɔ‘m ge? Fuunu tɛ kur so mɛ gasi'nɛ́? Fuunu tɛ we so ɗoŋ dee demɔ k’ɛ́nɛ́ nde?

¹¹Ɛ̀nɛ̀ zíí sara kɔ‘m, GASA WAN, ɛ̀nɛ̀ dé ko ha̧‘m! GASA WAN, ɛ̀nɛ̀ gbák am wa!

¹²Ɛnɛ kpaia hi̧a̧-kɔ̧a̧-fio kɔ‘m nɛ̀ desee, ɛnɛ kpɔ̧i̧a̧ laa-zim-fio tɛ‘m yinɛ, pi̧ nɛ̀ laa-desee tɛ‘m;

¹³wen hegɔ, mi beka kpe nú‘m na, mi tɛ bìì kana gima! GASA WAN, Sɔ̧ kɔ‘m, mi tɛ gasi'nɛ́ ɓɔnsɛnɛ!