Read Northwest Gbaya GIMA 32 Bible Online

GIMA 32 - Northwest Gbaya bible

GIMA 32

¹Gima ko David. Wi nɛ̀ Sɔ̧ ee yɔɔ-kaya in ɗaŋmɔ kɔ̧-a̧ ha̧ a̧ duk kɔ‘i nɛ̀ desee;

²wi nɛ̀ duk zóóŋ gee yí GASA WAN in nɛ̀ ŋma ɗaŋ taamɔ bo tɛ-a na, duk kɔ‘i nɛ̀ desee!

³Ŋgimbi n'am kpee nú‘m zu ɗaŋmɔ kɔ‘m, gba̧a̧-tɛ‘m mɔka tɛ gɔfamɔ kɔ‘m wese lɛŋ;

⁴er'nɛ́ dita zu'm ɗɔŋ-ɗɔŋ hee dɔnɔ ga zɛ nɛ wese; ŋgai-tɛ‘m ɔ̧sa̧ hee yì nɛ ɔ̧sa̧ gɔn mgbót-mgbót mɛ bɛɛ'ɛ ga.

⁵Ɓɛɛ nɛ́ mɔ'ɔ n'am tɔ̧a̧: «Mi tɛ nɛ tɛ GASA WAN mɛ gbar ɗaŋmɔ kɔ‘m,» ɓɛɛ sa'm gbar ɗaŋmɔ kɔ‘m lɛŋ ti'nɛ́; mi hu̧si yɔɔ-kaya kɔ‘m nɛ̀ ɛnɛ na, ɓɛɛ ɛnɛ baa ɗaŋmɔ kɔ‘m yinɛ, ɛnɛ ee yɔɔ-kaya kɔ‘m ha̧‘m mbɛt.

⁶Wen hegɔ o wi-mbo-zu h’ɛ́nɛ́ kpɔk kpɔk lɛŋ tɛ ai nú h’ɛ́nɛ́ ŋgimbi dita-see kɔ-wa; kóó nɛ́ yì a̧ ha̧a̧ so nyɛmna, yì‘i beka hɔ tɛ-wa na.

⁷Ɛnɛ nɛ́ fara-hu̧si-tɛ kɔ‘m, ɛnɛ pɛm am wese nɛ̀ mɔ ba tɛ‘m; tɛ kpasa'm n’ɛnɛ kpasa'i, ɛnɛ dee ha̧ o bíí mɛ bìì gima desee ha̧‘m.

⁸GASA WAN tɔ̧a̧: «Mi tɛ usi mɔ ha̧ mɛ, mi tɛ usi yuwar nɛ̀ mɛ tɛ ba; yí‘m tɛ ɓɔn tɛ mɛ, ɓɛɛ mi tɛ duk nɛ́ wi-tɔ̧-mbɔrɔ kɔ-mɛ.

⁹«Ká mɛ́ duk hee nyaŋa in sunda nɛ̀ mbɔ-zu-wa dam na’ɛ ga na, wen kà‘i pi̧ káná nú-wa na, wa mbo zu ha'i mɛ hɔ katɛ wa na.»

¹⁰Bɔnɛ nɛ̀ pɛm wi-ɗaŋ nyɛmna, ɓɛɛ kɔ̧ɔ̧mɔ ko GASA WAN zik kɔ‘i nɛ́ wi nɛ̀ e ta nɛ̀ a̧.

¹¹Tortɛ'ɛ bá‘nɛ́ nɛ̀ nin GASA WAN! O wi-de-mɔ nɛ yuwar-a, ɛ̀nɛ̀ dé nyɛŋɛ! O wi nɛ̀ see ɔ sa̧a̧ a̧ bíí gima nɛ̀ nin GASA WAN!